Navigation

Inhaltsbereich

Interpellaziun concernent la muniziun d'uran en il chantun Grischun

Sessiun: 30.01.2001
Las discussiuns davart la muniziun d'uran curran anc. Quasi mintgadi cumparan novs facts. Il cussegl federal vuless s'engaschar per in scumond mundial da talas armas. Perquai ch'i dat insaquantas plazzas militaras da tir, èsi da far intginas dumondas en quest connex.

1. Han ins duvrà insacura muniziun che cuntegna uran en il chantun Grischun?
2. Tge scleriments èn vegnids fatgs en quest connex?
3. Sch'ins ha duvrà questa muniziun: nua e cura è quai succedì ed han ins fatg donn ad umans, animals u a l'ambient?

Cuira, ils 30 da schaner 2001

Namen: Trepp, Frigg, Pfenninger, Bucher, Jäger, Locher, Looser, Meyer, Noi, Pfiffner, Schmutz, Schütz, Zindel

Session: 30.01.2001
Vorstoss: rg Interpellation

Resposta da la regenza

La fin da l'onn passà èsi vegnì enconuschent che las forzas armadas da la NATO han duvrà muniziun d'uran en la Ex-Jugoslavia. La Oerlikon-Bührle SA ha concedì
silsuenter che tala muniziun è vegnida sajettada er en Svizra. Ma quai duain esser stads experiments limitads temporalmain e localmain.

Las dumondas ch'èn vegnidas fatgas en l'interpellaziun po la regenza respunder sco suonda:

1. En il chantun Grischun n'è mai vegnida duvrada muniziun d'uran.

2. Ils scleriments ch'il departament da defensiun, protecziun da la populaziun e sport (DDPS) ha fatg, han mussà ch'ins n'ha mai sajettà muniziun d'uran en il chantun Grischun. L'armada sezza ha exequì la fin da l'onn 1980 ina suletta emprova, a moda che la gruppa d'armament ha duvrà totalmain 16 projectils cun parts d'uran en in chanal da tir serrà da la fabrica federala da muniziun a Thun. Ils ulteriurs experiments enconuschents èn vegnids exequids da la fabrica d'armas Oerlikon-Bührle SA la fin dals onns 70 sin ina atgna plazza da tir d'emprova „Ochsenboden“ a Studen, vischnanca d'Unteriberg SZ, ed en pitschna dimensiun er en in agen chanal da tir a Genevra.

4. Dapi ch'ins n'ha duvrà nagina muniziun d'uran en il chantun Grischun, daventa la resposta da questa dumonda obsoleta.

20 da favrer 2001