Dumonda en scrit concernent la „segirezza da la via d'Engiadina, cruschada access a Scuol vest e via da colliaziun a Ftan“
Sessiun: 30.01.2001
A l'uschenumnada „cruschada da la staziun“ a Scuol hai dà in accident mortal ils 21 da december 2000. I na sa tracta malavita betg da l'emprim grev accident cun consequenzas mortalas sin questa cruschada.
A quest lieu sbucca d'ina vart la nova via da colliaziun Scuol - Ftan sco er l'access Scuol vest en la via d'Engiadina A 27. Ultra da quai traversa ina gronda part dal traffic tranter il center da la vischnanca da Scuol e la staziun Scuol - Tarasp, las pendicularas Motta Naluns sco er singuls quartiers questa cruschada. Il traffic da questa cruschada centrala è fitg grond en cumparegliaziun cun quel d'autras cruschadas en la regiun. Quest traffic vegn anc ad augmentar suenter ch'il project „correctura da la via Nairs - Scuol vest“ è terminà. Alura vegn numnadamain serrada definitivamain per il traffic la veglia via chantunala inferiura Nairs - Scuol Brentsch. Per motivs da segirezza èsi perquai necessari da tschertgar schliaziuns per in meglier andament dal traffic sin questa cruschada. Davart la construcziun d'in giratori han gì lieu discurs gia avant trais resp. dus onns tranter ils represchentants da la vischnanca da Scuol ed ils responsabels da l'uffizi da construcziun bassa dal chantun Grischun.
Il sutsegnà fa las sequentas dumondas als responsabels dal departament da construcziun, traffic e selvicultura:
1. Han ins gia chattà schliaziuns adattadas per augmentar la segirezza dal traffic a questa cruschada?
2. In giratori vegn considerà en general sco in element artifizial ch'impedescha il traffic sin l'axa principala. Na ston ins dentant betg prender en cumpra in lev impediment dal traffic sin l'axa principala, sch'el permetta d'eliminar la cruschada da grond traffic e privlusa?
3. Po la construcziun d'in giratori vegnir entschavida e realisada sco davosa etappa dal project „correctura da la via Nairs - Scuol vest“?
Cuira, ils 30 da schaner 2001
Namen: Parolini
Session: 30.01.2001
Vorstoss: rg SchriftlicheAnfrage
Resposta da la regenza
Tar l'access a Scuol vest/Ftan sa tracti d'ina cruschada relativamain ferm frequen-
tada che vegn a daventar anc pli impurtanta suenter che l'amplificaziun da la via principala en il traject da Nairs fin Scuol è terminada.
Sin fundament da quest svilup èn vegnidas fatgas ponderaziuns gia avant trais onns per augmentar la segirezza en quest center da traffic. Perquai ch'en questa cruschada sa scuntran duas vias chantunalas orientadas tenor il traffic e cun ina intensitad dal traffic sumeglianta, s'impona la construcziun d'in giratori, schebain che la via principala sa chatta en la zona ordaifer il vitg.
L'uffizi da construcziun bassa dal Grischun ha perquai er prendì en egl, dal tuttafatg en il senn da la dumonda, d'integrar la midada da construcziun da questa cruschada en il project per la via principala „Nairs - Scuol vest“ e da realisar quella sco davosa etappa. Ma quai vegn ad esser pussaivel en connex cun las lavurs currentas be, sche l'uffizi federal da vias renconuscha che quest'amplificaziun dal project ha dretg da contribuziuns.
20 da favrer 2001