Navigation

Inhaltsbereich

Interpellaziun concernent la fusiun da las ONO cun las ovras chantunalas affiliadas a la Axpo

Sessiun: 30.01.2001
Las ONO, ensemen cun las ovras chantunalas affiliadas, daventan las pli grondas producentas e distributuras d'electricitad en Svizra, e quai sut in nov tetg cun num Axpo Holding. Per la fundaziun dal concern d'electricitad planisà han las regenzas dals chantuns Argovia, Appenzell, Glaruna, Schaffusa, Son Gagl, Turgovia, Zug e Turitg dà glisch verda. Las aczias da las ONO e da la SA commerziala Axpo ch'era vegnida fundada gia pli baud, las qualas sa chattan tuttas en possess dals chantuns surmenziunads, vegnan pia surdadas a la Axpo Holding che vegn a cumenzar sia activitad operativa l'entschatta 2001.

La finamira da l'Axpo è quella da furnir „electricitad da la turbina a la bischla“ e pia da mantegnair la posiziun da leader en il futur martgà d'electricitad en Svizra.

Per quest intent sa structurescha l'interpresa en quatter secturs. Las ONO atom SA sco er l'Axpo idro SA èn previsas sco societads da producziun e da participaziun. L'Axpo rait da transmissiun SA è concepida per il transport sur la rait naziunala d'auta tensiun. L'Axpo rait da distribuziun SA e l'Axpo commerziala SA procuran per il transport regiunal da l'electricitad e mainan raits localas e fan er commerzi a l'engrossa en Svizra ed a l'exteriur. La procedura da concentraziun progredescha a moda rasanta e vegn er ad avair consequenzas sin las structuras dal martgà indigen.

Da las experientschas ch'èn vegnidas fatgas en martgads ch'èn gia liberalisads sa laschan deducir las suandantas constataziuns:

Ils producents gronds pon influenzar ils pretschs. Els creschan spert a concerns da monopol e concentreschan il martgà e vegnan silsuenter ad empruvar da surprender la direcziun dal martgà.

Ils pretschs da l'electricitad èn sa sbassads ferm ed han in'auta volatilitad. La clientella vegn reunida e qualifitgada per ina bursa d'electricitad. Ils contracts cun la clientella vegnan stipulads gia avant che la liberalisaziun saja concludida politicamain.

Sin fundament da las marschas che vegnan a sa mussar en las finanzas naziunalas dad 1 fin 2 rp./kWh èsi da partir dal fatg ch'i vegnan ad esser necessaris plirs tschientmilli clients per in'elavuraziun economica da quest segment da clientella.

Il chantun Grischun è s'engaschà fermamain tar la Rezia energia SA. Tenor il rapport a las medias dals 6-12-99 vul la regenza sa segirar il dretg da cogestiun tras questa participaziun. Or da vista actuala pon ins giuditgar mo cun difficultad, sch'ella ha tschernì la dretga strategia e sch'ella ha tschentà ils gists facturs da success per surviver. Il concept strategic da la RE para d'esser identic cun quel da l'Axpo: producziun, commerzi, provediment. La dimensiun sco er il potenzial da clientella dals dus interprendiders demussa dentant ina gronda discrepanza.

Tenor noss avis duess la strategia da la politica d'energia en il svilup che sa mida spert vegnir examinada da nov ed obtegnair ina vasta basa politica. La strategia dal chantun è er la norma per la politica d'energia da bleras vischnancas/regiuns ed ha perquai ina gronda impurtanza.

Co giuditgescha la regenza las schanzas da la Rezia energia SA en il martgà liberalisà e dominà da gronds concerns globals?

Tge muntada ha il substrat da return a tschep da las ovras electricas per il chantun e las vischnancas?

Co giuditgescha ella, sut l'aspect da l'avertura al martgà, il svilup da las valurs da participaziun en connex cun las singulas participaziuns dal chantun?

Cuira, ils 30 da schaner 2001

Namen: Zinsli, Brüesch, Hübscher, Ambühl, Bär, Battaglia, Beck, Butzerin, Catrina, Christoffel, Conrad, Feltscher, Göpfert, Gross, Gunzinger, Hanimann, Hardegger, Hess, Janett, Kessler, Luzi, Mani, Märchy, Marti, Montalta, Parolini, Parpan, Patt, Peretti, Ratti, Rizzi, Robustelli, Schmid (Spleia), Schütz, Stiffler, Tremp, Tscholl, Vetsch, Walther, Wettstein

Session: 30.01.2001
Vorstoss: rg Interpellation

Resposta da la regenza

Las decleraziuns generalas dals interpellants davart la liberalisaziun dal martgà d'electricitad èn gia cuntegnidas per gronda part en la missiva da la regenza al cussegl grond davart las consequenzas da la liberalisaziun dal martgà d'electricitad per il chantun Grischun (carnet nr. 8/1999-2000). A chaschun da la sessiun da mars 2000 ha il cussegl grond prendì enconuschientscha da quest rapport e discutà quel detagliadamain.

L'emprim èsi da constatar che la Rezia energia SA è bain activa sin ils medems champs da fatschenta sco la Axpo. Ma il concept strategic da la Rezia energia SA sa distingua considerablamain da quel da la Axpo. Las differenzas pertutgan spezialmain ils secturs provediment e commerzi. Sin il champ dal provediment vul la Rezia energia SA giugar l'emprima rolla en la Svizra sidorientala. Sia finamira è quella da mantegnair la clientella e d'acquirir novs clients e distributurs finals sco er d'offrir prestaziuns da servetsch cumpetentas e cumpetitivas sin il sectur commerzial, energetic e tecnic (p.ex. facturaziun da l'energia, schliaziuns communablas d'informatica, cooperaziun en la gestiun da la rait, access al commerzi d'electricitad, marketing e.u.v.). Sin il champ dal commerzi vul la Rezia energia SA trair a niz sias fermezzas sco offerenta speziala en ils segments da nischa. Per quest intent sa concentrescha ella sin la forza idraulica, tira a niz sias aspectativas en il commerzi internaziunal e naziunal e sa profilescha cun ina strategia da marketing innovativa.

Resposta da las singulas dumondas:

1. Be la grondezza d'ina societad na garantescha er en il martgà liberalisà betg il success. La grondezza ha bain in tschert avantatg per il sectur dals custs. Decisivas per il success èn dentant ina strategia correspundenta a la grondezza, in marketing innovativ, bunas marcas, ina ferma orientaziun a la clientella, flexibili
tad ed ina moda d'agir speditiva. La Rezia energia SA sa profilescha pia sco offerenta da prestaziuns spezialas cun ina clera strategia da nischa e betg sco of


ferenta bunmartgada. Plinavant examinescha la Rezia energia SA actualmain in program per far retenziuns ed amortisaziuns spezialas - sco usità en la branscha - che duai crear custs da producziun commerzialisabels. La fusiun da las ovras electricas OEB, OEG e OR sco er l'integraziun energetica da la Grischelectra SA en la Rezia energia SA ha rinforzà la cumpetitivitad en vista al martgà liberalisà. Quai cumprovan l'emprim rapport semestril da la nova gruppa sco er il rapport a chaschun da la radunanza generala extraordinaria l'atun 2000.

2. Returns a tschep impurtants na succedan betg pli per ils proxims 30 fin 40 onns. L'electricitad producida a moda regenerativa vegn tranter auter a daventar pli impurtanta en vista a las grevezzas per l'ambient ed a la sminuziun da las reservas d'ieli. La situaziun actuala cun in martgà da cumpraders expressiv dastgess alura esser antiquada. Cun fundar la Grischelectra SA è vegnida creada gia avant onns ina pussaivladad per trair a niz opziuns existentas da return a tschep. Questa pussaivladad è vegnida rinforzada supplementarmain cun la fundaziun da la Rezia energia SA. Sa basond sin questas perspectivas na perdan ils dretgs da return a tschep per il chantun e las vischnancas insumma betg lur muntada en il futur, dentant vegnan els schizunt ad offrir ulteriuras schanzas considera-
blas.

3. L'avertura dal martgà metta las ovras electricas actualmain sut in grond squitsch finanzial. Sco reacziun cunter quel han la gronda part da las interpresas prendì mesiras extraordinarias (p.ex. rectificaziuns da la valur, reducziuns dals custs, cooperaziuns), e quai per augmentar lur cumpetitivitad. Questa tendenza cumprovan ils novs rapports da fatschenta da las singulas societads d'ovras electricas en il Grischun. Plinavant pon ins constatar ch'ins pudess avair superà il punct il pli bass dals pretschs d'electricitad. Quai resulta dal svilup dals pretschs d'electricitad fitg bass. Er l'economia d'electricitad è dal rest da quest avis. Sin fundament da questas mesiras e da las bunas perspectivas per la forza idraulica menziunadas, pon ins partir dal fatg che las participaziuns a las ovras electricas dal chantun e da las vischnancas vegnian a sa sviluppar a moda positiva tant a media sco er a lunga vista.

20 da favrer 2001