Navigation

Inhaltsbereich

Moziun concernent meglierar la responsabladad dal stadi

Sessiun: 30.01.2001
Ils trists eveniments en ils ospitals da Berna, Lugano ed er da Cuira dattan chaschun als moziunaris sutsegnads d'obligar la regenza da reveder noss dretg da responsabladad dal stadi ch'è fixà en la lescha da responsabladad (DG 170.050).

Ins na spera gea mai ch'i capitan tals cas tragics. Ma sch'els capitan tuttina, alura duessan ils pertutgads almain vegnir indemnisads adequatamain cun agid d'in dretg da responsabladad modern. Quai pon impedir duas regulaziuns restrictivas en nossa lescha da responsabladad. D'ina vart exista ina responsabladad per tschertas categorias da corporaziuns, spezialmain las corporaziuns ed ils instituts autonoms da dretg public, dentant er per vischnancas e circuls che mainan ospitals regiunals, ma be, sche lur autoritads u funcziunaris han agì cun intenziun u per greva negligientscha. En cas d'ina leva negligientscha scroda tutta responsabladad.

Per l'auter maun surannescha il dretg d'ina indemnisaziun dal donn gia suenter in onn. En cas da responsabladads contractualas, sco ch'ellas existan en l'entir dretg privat, munta la surannaziun a tschintg onns, mintgatant schizunt a 10 onns. Sch'ils pertutgads na fan betg valair a temp l'indemnisaziun, alura po il resultat esser dublamain tragic per els, perquai ch'els han eventualmain pers ina persuna u perquai ch'in donn da provediment na vegn betg cuvrì suffizientamain da la AVS.

Questas duas regulaziuns spezialas signifitgan in tractament inegual ed ina discriminaziun dal burgais. Entant ch'il burgais giauda p.ex. envers ina clinica privata in dretg contractual da responsabladad, cun ina surannaziun da tschintg onns, per scadina culpa, pia er per leva negligientscha, n'ha el naginas schanzas da vegnir indemnisà a l'ospital chantunal ed en in ospital regiunal, sch'in derschader constatescha sulettamain leva negligientscha (quai che pudess esser il cas tar la gronda part da las sentenzias). Per cumplettar èsi dentant da dir che bleras da questas instituziuns han extendì lur responsabladad er sin leva negligientscha tras lur assicuranza u lur statuts. Ma quai n'è betg ina garanzia suffizienta e permanenta gist per il cas d'ina schliaziun d'assicuranza. En emprima lingia dentant èn las regulaziuns totalmain confusas e ston vegnir unifitgadas. I n'è er betg sclerì dal tuttafatg, sch'in schefmedi ch'operescha en in ospital public surprenda la responsabladad en la partiziun privata be tenor dretg public u tenor dretg privat. Nus essan da l'opiniun ch'il stadi stuess star bun gist tuttina sco ina persuna privata e ch'i fiss da chattar ina schliaziun simpla, identica a quella dal dretg privat.

La situaziun preschentada dals fatgs da sanadad è be in exempel d'ina situaziun nuncuntentaivla. Tenor l'avis dals moziunaris n'è la responsabladad dal stadi generalmain betg pli adequata al temp. Perquai dattan ils moziunaris l'incumbensa a la regenza d'examinar en tge lieus, e pia betg mo sin il sectur da sanadad, ch'igl exista ina responsabladad dal stadi limitada e da reveder la lescha da responsabladad.

Cuira, ils 30 da schaner 2001

Namen: Hess, Pfenninger, Portner, Ambühl, Arquint, Augustin, Bär, Barandun, Battaglia, Berther (Sedrun), Biancotti, Bucher, Bühler, Cahannes, Casanova (Cuira), Cathomas, Catrina, Caviezel, Christ, Claus, Conrad, Crapp, Dalbert, Demarmels, Deplazes, Dermont, Farrér, Federspiel, Frigg, Giacometti, Giuliani, Gunzinger, Hanimann, Hartmann, Hasler, Hübscher, Jäger, Janett, Joos, Kehl, Keller, Kessler, Koch, Lardi, Lemm, Locher, Loepfe, Loi, Luzio, Maissen, Mani, Marti, Möhr, Nick, Noi, Parpan, Pedrini, Plozza, Quinter, Rizzi, Robustelli, Sax, Scharplatz, Schmid (Sedrun), Schmid (Spleia), Schmid (Val S. Pieder), Schütz, Suenderhauf, Suter, Telli, Toschini, Tramèr, Tremp, Trepp, Tuor (Trun), Walther, Wettstein, Zarn, Zinsli

Session: 30.01.2001
Vorstoss: rg Motion

Resposta da la regenza

En il chantun Grischun è reglada la responsabladad dal stadi en la lescha davart la responsabladad da las autoritads, dals funcziunaris e da las corporaziuns da dretg public dals 29 d'october 1944 (LR). La responsabladad grischuna dal stadi è concepida sco responsabladad per la culpabilitad. Areguard la dimensiun da la respon-
sabladad distingua la lescha tranter corporaziuns chantunalas e districtualas (chantun, instituts chantunals e districts, art. 8 LR) d'ina vart e las ulteriuras corporaziuns (circuls, vischnancas, corporaziuns autonomas da dretg public ed instituts, art. 9 LR) da l'autra vart.

Entant che la responsabladad da las corporaziuns chantunalas e districtualas cumpiglia ultra dal donn intenziunà er il donn per greva e leva negligientscha, è la responsabladad da las ulteriuras corporaziuns limitada sin cas da donns chaschunads cun intenziun u per greva negligientscha.

Ils moziunaris crititgan la discrepanza da la dimensiun da la responsabladad, tut tenor a tge communitad che l'acziun che fa donn è d'attribuir. A maun d'in exempel concretiseschan els las disposiziuns ch'èn tenor lur avis insuffizientas e rinvieschan al fatg ch'in pazient, al qual i vegn fatg donn per leva negligientscha en il rom d'in tractament en in ospital, possia far valair il donn sin fundament da la LR be en il cas ch'el è vegnì tractà en in ospital chantunal, dentant betg, sch'el è vegnì tractà per exempel en in ospital regiunal.

Plinavant crititgan ils moziunaris il (curt) termin da surannaziun da sulettamain in onn. Els rinvieschan al fatg ch'er qua pudess resultar ina discrepanza nunsatisfacenta cun auters pazients. Uschia giauda in pazient che sa lascha tractar en ina clinica privata ils termins da surannaziun bainquant pli lungs dal dretg contractual.

En quest connex èsi tuttina da precisar ch'il termin da surannaziun d'in onn da la LR entschaiva a currer dapi l'enconuschientscha dal donn e betg pir a partir dal mument dal donn, sco ch'ins pudess concluder da la moziun. La LR actuala supiglia pia evidentamain la regulaziun da la disposiziun per fixar la surannaziun da dretgs pervia d'ina acziun betg permessa tenor il dretg d'obligaziuns (art. 60 al. 1 DO).





Ils moziunaris resguardan la regulaziun da la responsabladad dal stadi en il chantun Grischun sco betg pli adequata al temp ed intimeschan da far ina revisiun. La regenza è conscienta da la situaziun che resulta pervia da la lescha da responsabladad. A chaschun da la publicaziun, tenor dretg da submissiun, da l'assicuranza da respon-sabladad per il plaz d'ospitals Cuira (ospital chantunal, ospital da la Crusch, ospital da dunnas) l'atun 1999 ha ella er empruvà da cuntanscher che la leva negligientscha vegnia includida gia en ils documents da publicaziun. La polissa d'assicuranza è sil-
suenter vegnida concludida correspundentamain. Sco ils moziunaris è la regenza dentant da l'avis ch'ina gulivaziun per contract d'assicuranza da la differenta dimensiun legala da responsabladad na satisfetschia betg.
Da l'autra vart avessan ils circuls, las vischnancas e las ulteriuras corporaziuns da dretg public la pussaivladad, d'extender per via legislativa lur atgna responsabladad sin leva negligientscha analogamain al chantun. Da questa pussaivladad han els fatg diever mo cun resalva.

Actualmain maina la confederaziun ina procedura da consultaziun davart la revisiun e l'unificaziun dal dretg da responsabladad. Intginas propostas per midadas vegnan accentuadas sco suonda: igl è previs da substituir ils artitgels 41 fin 61 dal DO tras ina part generala dal dretg da responsabladad (uschenumnadas disposiziuns generalas). Ultra da quai prevesa il project da limitar pli ferm che oz l'autorisaziun dals chantuns da decretar prescripziuns che divergeschan da questas disposiziuns generalas. Plinavant duai vegnir restrenschida, en la lescha federala da responsabladad, la responsabladad dal stadi sin l'activitad da dretg suveran. Plinavant vegni mess en discussiun in termin ordinari da surannaziun da trais onns dapi l'enconuschientscha dal donn ed in termin subsidiar da 20 onns dapi il donn.

Tenor l'avis da la regenza duessan ins spetgar l'unificaziun dal dretg da responsabla-dad sin plaun federal, avant ch'examinar la lescha chantunala da responsabladad. Uschia pon ins evitar duplicitads.

Dal rest han fatg diever, sco ins auda, plirs ospitals e pliras federaziuns d'ospitals da la pussaivladad da l'art. 9 al. 2 LR ed extendì lur responsabladad almain per contract d'assicuranza u er per statuts er sin cas da leva negligientscha. Ina directa urgenza temporara per reveder la LR n'exista perquai betg sut quest aspect.

La regenza è pronta d'acceptar la moziun en il senn da las explicaziuns.

27 da favrer 2001