Navigation

Inhaltsbereich

Interpellaziun concernent il salari per persunas d'instrucziun

Sessiun: 30.01.2001
Parallelamain a la midada da la societad èn sa midadas fermamain er las incumbensas da las magistras e dals magisters en il decurs dals davos decennis. Midadas na sa mussan betg sulettamain en furma da novs cuntegns d'instrucziun (extensiun da l'instrucziun da linguas, informatica, educaziun da sanadad e.u.v.), mabain er en las novas furmas e metodas d'instrucziun (reducziun da l'uschenumnada instrucziun frontala, dapli differenziaziun ed individualisaziun, promoziun e giudicaziun cumplessiva, dapli lavur en gruppas, plans da l'emna, emnas da project, lavur da team e.u.v.). Las singulas classas èn daventadas adina pli eterogenas durant ils davos onns (integraziun d'uffants impedids, integraziun d'uffants da lingua estra, promoziun da talents spezials e.u.v.) Er las incumbensas educativas che tutgan ultra da l'instrucziun tar las incaricas fundamentalas da las magistras e dals magisters èn s'augmentadas considerablamain durant ils davos onns. Latiers vegnan anc novas incumbensas sin il sectur da la direcziun da la scola e dal svilup da la scola. Sco resumaziun ston ins dir che las pretaisas envers las persunas d'instrucziun èn s'augmentadas fitg durant ils davos onns.

La paja da las magistras e dals magisters per lur lavur impurtanta è bain er s'augmentada. Lur engaschament e lur salarisaziun sa basan dentant anc adina sin in dumber fix da lecziuns ch'èn d'instruir durant in onn da scola. Cun quest sistem da salarisaziun vegnan registradas be nunsuffizientamain numerusas da las novas incumbensas (collavuraziun tar la direcziun da la scola, collavuraziun tar il svilup da la scola, perfecziunament permanent). La professiun è en privel da perder l'attractivitad per in dumber creschent da magistras e magisters. En differents chantuns vul ins perquai empruvar da cumbatter quest privel cun in'obligaziun reducida d'instrucziun u cun auters models d'engaschament.

En quest connex fan ils sutsegnads las sequentas dumondas a la regenza:

1. Co taxescha la regenza la relaziun tranter la lavur e la salarisaziun tar las persunas d'instrucziun da la scola populara dal Grsichun en la cumparegliaziun interchantunala?

2. En tge interval ha la regenza l'intenziun d'adattar la salarisaziun da las persunas d'instrucziun a las incumbensas midadas? Considerescha la regenza per exempel ina reducziun da las lecziuns d'instrucziun sco ina mesira adattada per ademplir las midadas sin il sectur professiunal da las persunas d'instrucziun?

3. Tge mesiras concretas èn previsas a curt termin u a termin mesaun per mantegnair l'attractivitad da la professiun da las magistras e dals magisters en il Grischun?

Cuira, ils 30 da schaner 2001

Namen: Lardi, Keller, Giuliani, Augustin, Biancotti, Bucher, Butzerin, Cathomas, Claus, Demarmels, Dermont, Hasler, Hübscher, Jäger, Joos, Locher, Mani, Möhr, Noi, Pedrini, Peretti, Pfenninger, Portner, Schmid (Sedrun), Schmid (Val S. Pieder), Schütz, Trepp, Zanolari

Session: 30.01.2001
Vorstoss: rg Interpellation

Resposta da la regenza


La regenza è da la medema opiniun sco las sutsegnadas ed ils sutsegnads da l'interpellaziun che las pretaisas envers las persunas d'instrucziun sajan s'augmentadas fermamain durant ils davos onns. Quai è er il cas tar numerusas autras professiuns. Bleras novaziuns e midadas che han fatg crescher las pretaisas envers las magistras ed ils magisters vegnan menziunadas en il text da l'interpellaziun ed han chaschunà discussiuns concernent adattaziuns sin il sectur da las cundiziuns d'engaschament.

Oz retschaiva ina persuna d'instrucziun en plazza stabla ina paja annuala per las differentas prestaziuns ch'ella fa per la scola. Questa paja sa basa sin in tschert dumber da lecziuns che vegnan instruidas durant 38 emnas da scola. La basa da calculaziun actuala sveglia en la publicitad adina puspè la supposiziun sbagliada ch'ina persuna d'instrucziun cun in pensum cumplain da 30 lecziuns per emna possia retrair la paja per 38 x 30, quai vul dir per total 1140 lecziuns instruidas entaifer in onn. La preparaziun, las lavurs posteriuras, las correcturas, las incumbensas sin il sectur da la direcziun da scola, la furmaziun supplementara e.u.v. van savens a perder tar l'indicaziun tenor lecziuns da l'obligaziun dals magisters. In'examinaziun,
fatga da professer Hermann Forneck l'onn 2000 en il chantun Turitg, ha mussà cleramain che las persunas d'instrucziun da tut ils stgalims fan ina gronda lavur e n'han da temair nagina cumparaziun cun autras professiuns concernent lur temp da lavur.

Per che las magistras ed ils magisters possian ademplir lur lavur a moda optimala dovran els bunas cundiziuns da lavur. La paja gioga qua segir e franc ina rolla im
purtanta, schebain betg la suletta. Almain uschè impurtants èn auters facturs, sco p. ex. ina furmaziun supplementara sistematica u la stima da la professiun en la societad.

Davart las dumondas concretas da l'interpellaziun pon ins dir il sequent:

1. En la cumparaziun interchantunala è la relaziun tranter la lavur e la paja tar las persunas d'instrucziun dal Grischun da localisar en la segunda mesadad da la retscha. Sch'ins resguarda la forza finanziala en la cumparaziun interchantunala è questa rangaziun giustifitgada.

2. Tenor l'avis da la regenza n'èn da preschent betg urgents in augment general da la paja u ina reducziun generala dals pensums obligatoris. Ins ha perencunter da tegnair en egl en quest connex las midadas actualas en tut la Svizra da la furmaziun da basa da las magistras e dals magisters. Ultra da quai èsi planisà d'augmentar cuntinuadamain durant ils proxims onns las purschidas da la furmaziun supplementara per garantir la qualitad da la scola (tranter auter er per il sectur direcziun da scola).

3. La regenza sustegna las stentas da render pli transparenta en la publicitad l'entira paletta da prestaziuns furnidas da las persunas d'instrucziun. Igl è da dir ch'il temp da lavur annual da persunas d'instrucziun - sco quel d'auters lavurants - munta a circa 2000 uras per onn. Ina persuna d'instrucziun ademplescha questas uras per part en furma da lecziuns, per part en furma da lavur cun ils geniturs, lavur da team, contacts cun autoritads sco er en furma da furmaziun supplementara. Entant ch'il temp da lavur "en il cas normal" cumpiglia 48 emnas à 42 uras, sa reparta il temp da lavur annual d'ina persuna d'instrucziun sin pli paucas emnas cun in pensum pli grond. Sco ulteriura mesira vegn da preschent examinà in augment sistematic da la furmaziun supplementara.
La regenza spera che questas mesiras gidian a rinforzar ed a meglierar il maletg che las persunas d'instrucziun han dad ellas sezzas sco er il maletg ch'ellas han en la publicitad ed uschia er l'attractivitad da la professiun da magistra e magister en general.
27 da favrer 2001