Navigation

Inhaltsbereich

Interpellaziun concernent l'instrucziun da religiun sco rom d'instrucziun obligatori

Sessiun: 30.01.2001
La lescha da scola dal chantun Grischun è dacurt vegnida suttamessa ad ina revisiun cumplessiva. Las finamiras da furmaziun numnadas en l'artitgel 1 n'èn betg vegnidas midadas. La scola duai tranter auter "furmar ils uffants tenor princips cristians a members da la communitad independents e cun senn da responsabladad".

L'instrucziun da religiun sezza vegn dada en noss chantun tras las baselgias chantunalas dal dretg public. Ils purtaders da scola han sulettamain da metter a disposiziun gratuitamain las localitads da scola. L'instrucziun da religiun è bain in dals roms obligatoris da scola, ma las persunas cun la pussanza da genitur pon dispensar lur uffants da l'instrucziun.

En la pratica datti er en il Grischun adina dapli uffants che na frequentan nagina instrucziun da religiun, e quai per differentas raschuns. Generalmain è sa reducida considerablamain l'impurtanza da la religiun en nossa societad ed uschia er en las scolas durant ils davos onns. Plinavant na chapesch'ins oz savens betg pli la separaziun confessiunala da l'instrucziun. En numerus cas chaschuna ella er problems organisatoris adina pli gronds.

En in temp ch'è caracterisà adina dapli da "mittadad religiusa" e d'ina mancanza d'orientaziun etica sto la scola s'occupar cun nova forza da la significaziun da l'instrucziun da religiun en il senn da l'art. 1 da la lescha da scola. Latiers sto la furmaziun fundamentala da religiun en scola vegnir chapida en in senn cumplessiv, quai vul dir en in senn giudaic-cristian, ecumenic e multicultural. Sco pass positiv en quella direcziun pon ins taxar la nova organisaziun da l'instrucziun da religiun al gimnasi inferiur da la scola chantunala a Cuira.

La regenza vegn supplitgada da respunder las sequentas dumondas:

1. Co è sa cumprovada l'instrucziun da religiun ecumenica a la scola chantunala grischuna?
2. È la regenza er da l'avis che, en il senn da l'artitgel d'intent da la lescha da scola, l'instrucziun da religiun a nossas scolas stoppia vegnir rinforzada, ma ch'ella stoppia er vegnir dada per gronda part a moda ecumenica?
3. En tge furma pudess la regenza s'imaginar in obligatori?
4. Sustegna la regenza l'idea ch'i saja ina finamira ch'è d'aspirar a lunga vista che l'instrucziun da religiun, sco er ils ulteriurs roms, vegniss manada er dals purtaders da scola sezs u en in partenadi cunvegnent cun las baselgias chantunalas?
5. È la regenza pronta da far tractativas respectivas cun las baselgias chantunalas?
6. S'engascha la regenza per che las futuras persunas d'instrucziun a la SAP vegnian scoladas per ina instrucziun da religiun ch'è eventualmain suttamessa a la responsabladad dal stadi?

Cuira, ils 30 da schaner 2001

Namen: Jäger, Locher, Arquint, Battaglia, Beck, Brüesch, Butzerin, Cathomas, Catrina, Cavegn, Caviezel, Christ, Christoffel, Claus, Dalbert, Dermont, Feltscher, Frigg, Giuliani, Gross, Hardegger, Janett, Joos, Lardi, Loepfe, Looser, Luzi, Mani, Meyer, Noi, Patt, Pedrini, Pfenninger, Pfiffner, Ratti, Robustelli, Sax Scharplatz, Schmid (Spleia), Schmutz, Schütz, Stiffler, Thomann, Trepp, Valsecchi, Walther, Zanolari, Zindel, Zinsli

Session: 30.01.2001
Vorstoss: rg Interpellation

Resposta da la regenza


Ils "princips cristians" menziunads en l'artitgel 1 da la lescha da scola furman ina basa solida e francada en l'istorgia per la lavur d'instrucziun e d'educaziun a la scola populara dal Grischun. Ina muntada speziala ha l'instrucziun da religiun a las scolas popularas che vegn dada tras las baselgias chantunalas. Quest'instrucziun intermediescha ultra da las tenutas fundamentalas etic-religiusas er cuntegns religius concrets e gida uschia als giuvens umans ad obtegnair ina "patria confessiunala". Valurs etic-religiusas ston far part da mintga educaziun. Er en ina societad pluralistica contribuischan las magistras ed ils magisters da tut ils roms d'instrucziun a la crea-ziun da las tenutas fundamentalas etic-religiusas dals uffants, perquai che mintga instrucziun vegn er caracterisada tras la persunalitad da la persuna d'instrucziun.

Tar las dumondas concretas dals interpellants pon ins dir il sequent:

1. La nova posiziun da l'instrucziun da religiun a la scola chantunala grischuna è pia ina consequenza da la varietad religiusa entaifer las classas e la refurma da la maturitad. L'instrucziun da religiun en pliras classas ensemen po furmar la basa per exercitar la chapientscha e la toleranza vicendaivla en dumondas da religiun. La direcziun da la classa daventa pli simpla, pretenda dentant pedagogicamain fitg bler da las persunas d'instrucziun. Unitads d'instrucziun spezialas, confessiunalas, sco per exempel l'instrucziun da cresma e da confirmands, vegnan frequentadas per regla ordaifer las uras da scola, cun la reducziun respectiva da l'instrucziun da religiun en scola. Las experientschas da l'instrucziun interreligiusa a la scola chantunala èn bunas.
2. En vista a la gronda muntada da l'educaziun etic-religiusa en il rom da la furmaziun da la persunalitad èsi in giavisch da la regenza da betg render pli flaivla "l'instrucziun da religiun" e da sustegnair las stentas per in'ecumena.

3. La regenza pudess be s'imaginar in obligatori per ina "instrucziun da religiun" che vegn dada en ina maniera che n'excluda nagin. Ina tala instrucziun che vegniss frequentada communablamain da tut las scolaras e tut ils scolars d'ina classa, independentamain da lur religiun ed ideologia, stuess per regla vegnir dada betg sulettamain a moda "interconfessiunala", mabain er a moda "inter-religiusa".

4. La regenza beneventa da princip il "model per l'instrucziun da religiun" sbozzà en cifra 3. L'iniziativa per ina midada uschè fundamentala da las finamiras stuess dentant vegnir da las baselgias chantunalas directamain pertutgadas. Ina "instrucziun inter-religiusa" avess per questas surtut la consequenza ch'ins na pudess en il futur betg pli offrir cuntegns specificamain confessiunals en il rom da l'instrucziun da religiun.

5. La regenza è da princip pronta d'entrar en tractativas cun las baselgias chantunalas concernent ina nova furma da l'instrucziun da religiun. L'iniziativa a talas discussiuns sto dentant vegnir cleramain da las baselgias chantunalas renconuschidas dal dretg public. Emprims contacts en connex cun la resposta da la preschenta interpellaziun mussan che, or dal puntg da vista da las confessiuns directamain pertutgadas, la via ad ina "instrucziun inter-religiusa" è da preschent anc bloccada tras numerus impediments.

6. Sche l'instrucziun da religiun duai in di vegnir suttamessa a la responsabladad dal stadi, fissi senz'auter ina incumbensa da la scol'auta da pedagogia (SAP) da preparar las futuras persunas d'instrucziun per quest fatg. Fin a quel mument po vegnir purschida ina pussaivladad facultativa, e quai, sco fin uss, en enclegientscha cun las baselgias chantunalas.

27 da favrer 2001