Navigation

Inhaltsbereich

Interpellaziun concernent la planisaziun da la scol'auta professiunala da pedagogia (SAP)

Sessiun: 30.01.2001
Sin il sectur da furmaziun datti grondas midadas. Per la fin da l'onn 2001 è vegnida empermessa ina scrittira d'infurmaziun al cussegl grond. Quella infurmaziun duess inditgar las tendenzas da svilup actualas e planisadas sin il sectur da furmaziun. Oz exista ina gronda intschertezza tar la magistraglia e las autoritads en las vischnancas da scola.

L'onn 1998 ha il pievel acceptà la scol'auta professiunala da pedagogia (SAP). L'institut da scolaziun ch'è da fitg gronda impurtanza per la scola populara dal Grischun, sto entschaiver ses manaschi l'avust 2003. Ni il parlament, ni la publicitad han obtegnì ina infurmaziun suffizienta davart il stadi da las lavurs.

Perquai supplitgain nus la regenza da respunder las suandantas dumondas:

1. Tge stadi han cuntanschì las lavurs da planisaziun enfin oz e tge lavurs èn anc da terminar fin l'avertura da la SAP l'avust 2003?
2. Vegnan admess tut las scolaras ed ils scolars ch'han reussì l'examen da maturitad senza stuair far in examen d'admissiun a la SAP?
3. Èsi da cumprovar enconuschientschas spezialas p.ex. da musica e sport?
4. Tge cundiziuns ston ademplir maturandas e maturands u absolventas ed absolvents cun in auter diplom?
5. Cun quantas studentas e quants students èsi da far quint a la SAP?
6. Co vesa ora la scolaziun da las magistras da lavur da maun e d'economia da chasa en il futur?
7. Tge pussaivladads han las magistras da lavur da maun che vegnan scoladas oz en il futur?
8. Tge diploms pon ins far a la SAP?
9. Èn las futuras persunas d'instrucziun da scola primara scoladas suffizientamain per instruir en ina scola d'ina classa, da pliras classas u en ina scola cumplessiva?
10. Tgeninas èn, tenor l'avis da la regenza, las incumbensas centralas da la scola primara?
11. Nus stuain puspè ans render conscients tuts che nus stuain avair quità dal mastergn da magister. Co pon ins dar dapli muntada a la professiun dal magister primar, per ch'en il futur tschernian puspè dapli umens quest mastergn?

Cuira, ils 30 da schaner 2001

Namen: Scharplatz, Caviezel, Feltscher, Ambühl, Bär, Barandun, Bühler, Butzerin, Casanova (Vignogn), Cathomas, Catrina, Cavegn, Christoffel, Claus, Conrad, Demarmels, Dermont, Federspiel, Furrer, Geisseler, Giacometti, Giuliani, Gunzinger, Hanimann, Hardegger, Hartmann, Hess, Jäger, Janett, Joos, Kehl, Keller, Kessler, Lardi, Locher, Loepfe, Looser, Luzi, Luzio, Maissen, Märchy, Marti, Michel, Nick, Parolini, Parpan, Patt, Pfenninger, Portner, Rizzi, Robustelli, Schmid (Sedrun), Schmid (Spleia), Schütz, Suter, Telli, Thomann, Toschini, Tremp, Tuor (Trun), Valsecchi, Walther, Wettstein

Session: 30.01.2001
Vorstoss: rg Interpellation

Resposta da la regenza

L'urari da la planisaziun da la scol'auta professiunala da pedagogia prevesa d'avair avant maun ils plans da studi a l'entschatta da l'onn 2002 en vista a l'entschatta da l'instrucziun l'atun 2003.

Pertutgant las dumondas concretas prenda la regenza posiziun sco suonda:

1. Actualmain vegnan elavurads cun emprima prioritad ils plans da studi da las scolaziuns fundamentalas a la scol'auta professiunala da pedagogia. Parallelamain a quai s'occupa la direcziun dal project dals secturs persunal, infrastructura, perscrutaziun e svilup, prestaziuns da servetsch. La furmaziun supplementara dals magisters è gia vegnida transferida dal DECA a la SAP. Las lavurs da planisaziun han l'intent da cuntanscher la renconuschientscha svizra dals diploms e da resguardar las relaziuns en il chantun Grischun. Infurmaziuns davart il stadi actual da la planisaziun obtegnan ins sut .
2. Gea.
3. Na; i na vegnan dumandadas naginas enconuschientschas che surpassan las pretaisas da la maturitad.
4. Per titularas e titulars d'in diplom d'ina scola media da diplom, d'ina scola media commerziala, d'ina maturitad professiunala e per professiunistas e professiunists cun in'experientscha professiunala da plirs onns vegn concepì in modul supplementar „furmaziun generala“ per cumplettar la furmaziun preliminara avant l'entschatta dal studi. Quel modul dura maximalmain in onn ed intermediescha, resguardond las enconuschientschas preliminaras individualas, quels cuntegns ch'èn relevants per la scolaziun a la SAP.
5. La planisaziun sa basa sin la recepziun da 300 studentas e students en la furmaziun fundamentala. Quest dumber da studentas e students èsi d'empruvar da cuntanscher a media fin a lunga vista. D'agiuntar èn absolventas ed absolvents da curs da furmaziun supplementara e da scolaziuns da diplom supplementar.
6. La lavur da maun respectivmain il zambregiar cun textilias vegnan integrads èn la scolaziun fundamentala da las persunas d'instrucziun da scola primara, l'economia da chasa en quella da las persunas d'instrucziun dal stgalim secundar I, perquai che la scolaziun da fin uss na vegn betg renconuschida en Svizra.
7. Las autorisaziuns d'instruir da las persunas d'instrucziun per lavur da maun ed economia da chasa restan valaivlas. La situaziun da las plazzas è actualmain buna. A la scol'auta professiunala da pedagogia vegn plinavant stabilida ina purschida per l'acquisiziun d'autorisaziuns d'instruir ulteriurs roms sin il stgalim da la scola primara.
8. A la scol'auta professiunala da pedagogia pon ins acquistar il diplom da persuna d'instrucziun da scolina ed il diplom da persuna d'instrucziun da scola primara.
9. La vasta qualificaziun d'instruir e la gronda part pratica en la scolaziun resguardan quest giavisch.
10. La finamira da la scola primara è formulada en l'art. 25 da la lescha davart las scolas popularas dal chantun Grischun: „La scola primara intermediescha als scolars ils elements fundamentals da la furmaziun. Sco scola fundamentala creescha ella las premissas per frequentar las scolas che mainan vinavant.“
Tenor l'avis da la regenza è l'incumbensa principala da quest stgalim da scola quella d'intermediar las tecnicas culturalas.
12. La regenza è dal medem avis sco las interpellantas ed ils interpellants ch'i saja d'avair quità dal mastergn da magistra e magister. Ina revalitaziun dal mastergn da magistra primara respectivamain magister primar dependa essenzialmain d'ina scolaziun moderna, da cundiziuns generalas attractivas e da la posiziun da la professiun en la publicitad.

27 da favrer 2001