Navigation

Inhaltsbereich

Interpellaziun concernent la "cumposiziun da la cumissiun federala dal Parc naziunal"

Sessiun: 30.01.2001
Differents eveniments en connex cun il Parc naziunal svizzer laschan presumar che la relaziun tranter ina part da la populaziun da la regiun dal Parc naziunal ed ils gremis dal Parc naziunal saja disturbada. Tar la votaziun consultativa davart la creaziun d'ina zona perifera a Zernez è il resultat stà cleramain negativ. Quai è per part da motivar cun la mancanza da fidanza da la populaziun envers ils gremis dal Parc naziunal. Era il fatg che la proposta da la regenza grischuna per il presidi da la cumissiun federala dal Parc naziunal (CFPN) è vegnida refusada n'è betg stà in agid per crear fidanza.

La CFPN sa cumpona da 9 commembers; i po vegnir proponì mintgamai be in commember da las vischnancas dal Parc naziunal e dal chantun Grischun. En cumparegliaziun cun auters Parcs naziunals è la represchentanza da la regiun pertutgada en la CFPN pitschna. En il Parc naziunal Hohe Tauern a Carinzia/Austria per exempel sa cumpona la cumissiun dal Parc da 12 represchentants dals proprietaris da terren, da 6 represchentants da las vischnancas dal Parc e da 12 represchentants che vegnan elegids da la regenza da la Carinzia. Cun questa ferma integraziun da las persunas ch'èn directamain pertutgadas en il gremi directiv dal Parc naziunal Hohe Tauern han ins fatg fitg bunas experientschas.
Per crear ina meglra basa da fidanza en la regiun dal Parc naziunal svizzer faschessi er basegn d'avair ina represchentanza bler pli ferma da la regiun dal Parc naziunal e dal chantun Grischun. Independentamain d'ina eventuala discussiun futura davart l'engrondiment dal Parc naziunal èn ils sutsegnads da l'avis ch'ina nova cumposiziun da la CFPN saja necessaria.

Ils sutsegnads fan en quest connex las sequentas dumondas a la regenza:

1. Co valitescha la regenza la cumposiziun actuala da la CFPN?

2. È ella medemamain da l'avis che las vischnancas dal Parc ed il chantun Grischun duessan avair il dretg da proposta per almain 50% dals commembers da la CFPN?

3. È la regenza pronta da s'engaschar tar la confederaziun per ina revisiun correspundenta da la lescha federala dal Parc naziunal?

Cuira, ils 30 da schaner 2001

Namen: Parolini, Tramèr, Biancotti, Bär, Battaglia, Beck, Berther (Mustér), Brüesch, Capaul, Casanova (Vignogn), Catrina, Cavegn, Christ, Christoffel, Conrad, Crapp, Dalbert, Deplazes, Federspiel, Geisseler, Giovannini, Giuliani, Göpfert, Gross, Gunzinger, Hanimann, Hartmann, Hübscher, Janett, Kessler, Lemm, Loepfe, Luzio, Maissen, Mani, Märchy, Marti, Möhr, Montalta, , Parpan, Patt, Peretti, Portner, Quinter, Ratti, Rizzi, Sax, Schmid (Sedrun), Schmid (Spleia), Stiffler, Thomann, Thöny, Tuor (Trun), Wettstein, Zinsli

Session: 30.01.2001
Vorstoss: rg Interpellation

Resposta da la regenza


La cumissiun dal Parc naziunal svizzer (CFPN) che vegn elegida dal cussegl federal è tenor la legislaziun federala dal Parc naziunal l'organ suprem da la fundaziun "Parc naziunal svizzer" (fundaziun PNS) e sa cumpona da nov commembers. Dus commembers represchentan la confederaziun. Il chantun e las vischnancas dal Parc han il dretg da proponer mintgamai in commember da la cumisssiun. Trais commembers vegnan numnads da la Pro Natura e dus da l'Academia svizra da las scienzas natiralas (ASSN). Questa cumposiziun da la CFPN tenor gruppas d'interess è da vesair en il context istoric cun la fundaziun dal PNS l'onn 1914. L'iniziativa per fundar il Parc è numnadamain vegnida quella giada da la Societad federala per la perscrutaziun da la natira (oz ASSN). Ma er la Lia svizra per la protecziun da la natira (oz Pro Natura) ha contribuì considerablamain a la fundaziun dal Parc. Questas duas organisaziuns han sustegnì la fundaziun dal Parc tant a moda ideala sco er finanziala, e quai fin oz. La cumposiziun actuala da la CFPN è perquai colliada stretgamain cun l'istorgia dal Parc.
Ils interpellants fan la dumonda, sch'ina CFPN che sa cumpona tenor gruppas
d'interess possia anc ademplir sia incumbensa sco gremi directiv strategic en l'ambient social e politic d'oz en ina maniera che fa senn e ch'ha ina clera finamira. La commembranza da represchentants d'interess en la CFPN cumpiglia effectivamain il privel ch'i vegnia dà dapli paisa al mantegniment dals interess particulars ch'a l'incumbensa directiva strategica. En il rom da la procedura da consultaziun che la confederaziun ha realisà l'onn 1999 concernent in'eventuala revisiun da la lescha federala dal Parc naziunal ha il chantun er rendì attent a questa situaziun che na cuntenta betg or dal puntg da vista actual. Ultra da quai ha il chantun intimà, en il rom da la procedura da consultaziun menziunada, ch'i sajan er da metter en dumonda la furma giuridica, la finanziaziun e la structura organisatorica da la fundaziun PNS. En il fratemp n'è dentant sa midà nagut vi da questa valitaziun che la regenza ha fatg l'onn 1999. Concernent il giavisch concret da rinforzar l'influenza dal chantun tar
l'elecziun dals commembers da la CFPN è la regenza dal medem avis sco ils interpellants che tranter la confederaziun d'ina vart ed il chantun resp. las vischnancas da l'autra vart duess valair il princip da la paritad da far propostas electoralas. Er quest giavisch giustifitgà ha il chantun gia preschentà en la procedura da consultaziun davart la revisiun da la lescha federala dal Parc naziunal. En quai che reguarda l'ulteriura procedura è la regenza da l'avis che la dumonda da la cumposiziun da la CFPN duai vegnir tractada sche pussaivel en il rom da las ponderaziuns cumplessivas surmenziunadas. En quest senn è la regenza er pronta da s'engaschar per adattaziuns correspundentas tar la legislaziun federala dal Parc naziunal.

27 da favrer 2001