Interpellaziun concernent il post da cussegliaziun catolic e refurmà per dumondas da lètg e da vita
Sessiun: 30.01.2001
Sin basa da l'art. 171 CCS sustegna il chantun dapi onns ils posts da cussegliaziun da las duas baselgias chantunalas. Durant ils davos onns è la contribuziun successivamain vegnida augmentada considerablamain. Quest onn munta l'import a fr. 200 000.--. Quest augment è pli che mo giustifitgà en vista a l'augment da l'activitad da cussegliaziun, a la funcziun sociala sco er al fatg ch'ils posts vegnan manads cun grond engaschament; el na duai vegnir mess en dumonda en nagina maniera.
Las midadas da la societad n'èn er betg sa fermadas avant noss chantun. La circumstanza che numerus clients derivan dad ambients confessiunalmain maschadads u indifferents, pretenda ina vasta activitad da cussegliaziun ch'è independenta da la confessiun. Ina tala è fin uss er vegnida garantida. La fundaziun da "staziuns exteriuras" decentralas (Tavau, Samedan) ha er promovì la pratica supraconfessiunala. La garanzia da la neutralitad confessiunala è dal rest fixada en l'incumbensa da prestaziun dal chantun cun las baselgias chantunalas.
En il decurs da quest onn e da l'onn proxim vegnan ad ir en pensiun tant il titular dal post da cussegliaziun catolic per dumondas da lètg e da vita sco er il titular refurmà. Quai dess ina buna occasiun per in inventari e per ina nova orientaziun conceptuala dals posts da cussegliaziun. Entant che la baselgia chantunala catolica ha gia previs d'occupar da nov la plazza, è vegnida inoltrada ina moziun al cussegl grond evangelic che supplitgescha il cussegl da baselgia da sclerir la dumonda da purtaders ecumenics per ils posts da cussegliaziun.
Senza ch'ins vuless metter en dumonda l'autonomia da las duas ovras da la baselgia chantunala, èn ils interpellants da l'avis ch'il chantun haja en questa situaziun er da s'occupar da las perspectivas futuras da questas instituziuns ecclesiasticas ed haja da far valair sia influenza, quai betg il davos pervia da l'engaschament finanzial considerabel.
Els renvieschan a l'exempel da Turitg, nua che la baselgia catolica e refurmada furman in purtader ecumenic che surpiglia la responsabladad cumplessiva per manar il post da cussegliaziun. La direcziun ecumenica da la cussegliaziun da lètg funcziuna gia dapi 24 onns cun grond success.
Ils interpellants dumondan la regenza:
1. È la regenza da l'avis ch'in purtader ecumenic per ils posts da cussegliaziun da lètg e da famiglia da las baselgias chantunalas saja raschunaivel e saja da beneventar en vista al svilup da la societad?
2. È la regenza en quest senn pronta da far valair sia influenza tar las baselgias chantunalas en il rom da sias pussaivladads? È ella da l'avis ch'i pudess esser util per las baselgias chantunalas da discutar las perspectivas a lunga vista inclusivamain ils purtaders dals posts da consultaziun avant ch'occupar da nov las plazzas, ed è ella er pronta da prender l'iniziativa per ina tala discussiun?
Cuira, ils 30 da schaner 2001
Namen: Arquint, Bucher, Frigg, Jäger, Locher, Looser, Meyer, Noi, Pfenninger, Schütz, Trepp, Zindel
Session: 30.01.2001
Vorstoss: rg Interpellation
Resposta da la regenza
Tenor l'art. 171 CCS han ils chantuns da procurar ch'ils consorts cun problems da lètg possian sa drizzar communablamain u sulets a posts da cussegliaziun da lètg u da famiglia. Ils chantuns han gronda libertad da realisar quest'incumbensa. Igl è dentant gia vegnì fixà en la missiva che la neutralitad confessiunala stoppia esser garantida (BBl 1979, p. 1273).
Il chantun Grischun è sa decidì per ina soluziun, tar la quala i vegnan sustegnidas finanzialmain tschertas instituziuns per ademplir quest'incumbensa legala. Latiers quintan oz ultra da las duas baselgias chantunalas il post da cussegliaziun da famiglias, sexualitad e gravidanza, la centrala da dunnas ed il servetsch psichiatric per uffants e giuvenils. Questas instituziuns porschan las cussegliaziuns necessarias ultra dals servetschs socials regiunals u communals resp. ultra dals psicologs cun activitad da gudogn independenta u ulteriuras persunas. Er ils posts da cussegliaziun da las baselgias vegnan obligads en las cunvegnas respectivas a mantegnair la neutralitad confessiunala. Il basegn per in'activitad da cussegliaziun tras las duas baselgias chantunalas è cumprovà ed ha er chaschunà durant ils davos onns che las contribuziuns chantunalas èn vegnidas augmentadas successivamain. L'engaschament finanzial dal chantun munta oz a fr. 200'000.--
Gia l'onn 1996, en occasiun d'ina reuniun da la regenza grischuna cun la cumissiun administrativa da la baselgia catolica dal chantun, è vegnì tematisà il futur da ses posts da cussegliaziun da lètg e famiglias. La baselgia ha exprimì il giavisch per ina nova orientaziun ed ina nova repartiziun da las incumbensas. La pensiun dals dus manaders dals posts da cussegliaziun ecclesiastics, dr. phil. Giosch Albrecht e dr. Hans Senn duai furmar il rom temporar per questas midadas. La regenza ha declerà gia quella giada sia prontezza da discutar novas pussaivladads en collavuraziun cun las duas baselgias chantunalas ed eventuals ulteriurs circuls interessads.
1. La creaziun da purtaders ecumenics per ils posts da cussegliaziun da lètg e famiglia che vegnan manads da las baselgias chantunalas correspunda als giavischs da la regenza, en vista a l'obligaziun dal chantun da metter a disposiziun posts da cussegliaziun cun ina ideologia suffizientamain neutrala.
2. La regenza è pronta da s'engaschar per crear in purtader ecumenic e da discutar il futur dals posts ecclesiastics da cussegliaziun per dumondas da lètg e da vita cun las baselgias chantunalas. Questa discussiun vegn tuttina a daventar necessaria en in circul pli vast, er en connex cun ina da las finamiras prioritaras dal program da regenza 2001-2004, tenor la quala tut las contribuziuns chantunalas ston vegnir examinadas puncto lur necessitad ed efficacitad. La regenza vegn a tractandar il tema en occasiun da la proxima sesida cun ils represchentants da las baselgias chantunalas.
27 da favrer 2001