Navigation

Inhaltsbereich

Interpellaziun concernent l'eutanasia en chasas da vegls e da tgira en il chantun Grischun

Sessiun: 28.03.2001
L'october ha il departament da sanadad e protecziun da l'ambient da la citad da Turitg reglà da nov l'eutanasia activa en las chasas da vegls e da tgira da Turitg. Cun quai è vegnì abrogà dapi il 1. da schaner 2001 il scumond da realisar e sustegnair suicidis en chasas da vegls da la citad.

Suicidi en chasas da vegls e da tgira exprima il fatg ch'in uman na considerescha sia vita betg pli sco degna da vegnir vivida.

La regenza vegn supplitgada da respunder las sequentas trais dumondas:

1. Tge posiziun ha la regenza envers la tendenza creschenta en la societad da crear models da suicidi en la vegliadetgna e pia envers la liberalisaziun dal suicidi en chasas da vegls e da tgira? È il suicidi e l'assistenza al suicidi in model pussaivel per dumagnar greva suffrientscha e malsogna nuncurabla?
2. Sustegna la regenza la strategia valaivla fin oz che malsogna e mort vegnan experimentadas cun dignitad er en chasas da vegls e da tgira, e quai grazia a mesiras medicinic-palliativas, ad ina tgira d'auta qualitad ed a dapli affecziun umana e spirituala?
3. Sin tge stgalim vegnan tratgas las decisiuns concernent questa problematica fitg cumplexa per nossas instituziuns grischunas?

Cuira, ils 27 da mars 2001

Namen: Zindel, Schütz, Bucher, Arquint, Battaglia, Brasser, Brüesch, Cavegn, Cavigelli, Christoffel, Hanimann, Hardegger, Locher, Looser, Märchy, Meyer, Pelizzatti, Pfenninger, Pfiffner, Scharplatz, Trepp

Session: 28.03.2001
Vorstoss: rg Interpellation


Resposta da la regenza

La regenza respunda las dumondas fatgas sco suonda:
1. L'eutanasia e l'accumpagnament dals muribunds han ina dimensiun etic-religiusa sco er ina dimensiun giuridica.

Tenor l'art. 10 da la constituziun federala ha mintga uman il dretg da la vita e da sia libertad persunala. La resposta a la dumonda, perquant ch'il dretg da pudair decider sez davart si'atgna mort saja collià cun il dretg da la vita, dependa ultra dals aspects giuridics da la tenuta fundamentala etica e religiusa da mintga singul. La valitaziun etic-religiusa da l'eutanasia e da l'accumpagnament dals muribunds è pia ina decisiun autamain persunala che dependa da las circumstanzas. Correspundentamain na sa senta la regenza betg legitimada da far ina valitaziun etic-religiusa da l'eutanasia e da l'accumpagnament dals muribunds.

Per la valitaziun giuridica ston ins far la differenza, sch'i sa tracta d'ina assistenza activa directa, d'ina assistenza activa indirecta u d'ina assistenza passiva al suicidi. L'eutanasia activa (omicidi premedità per scursanir las suffrientschas d'in auter uman) è chastiabla tenor l'art. 111 (omicidi intenziunà), l'art. 113 (mazzament) e l'art. 114 (omicidi sin giavisch) dal cudesch penal. Betg regladas en la lescha èn perencunter l'assistenza activa indirecta al suicidi (per mitigiar las suffrientschas vegnan duvradas medischinas che pon avair l'effect secundar da reducir la durada da la vita) e l'assistenza passiva al


suicidi (renunzia al diever da mesiras che mantegnan la vita u l'interrupziun da talas). Tenor il rapport da la gruppa da lavur "Eutanasia" al departament federal da giustia e polizia dal mars 1999 valan quellas da princip sco permissas. La procura publica entschaiva ina procedura penala en scadin cas d'assistenza al suicidi per sclerir, sch'il dretg relevant saja vegnì resguardà.

2. La finamira da la medischina e tgira palliativa è quella da mitigiar las suffrien-
tschas d'umans malsauns che pateschan d'ina malsogna progressiva nuncurabla tras tractaments medicinals, intervenziuns da tgira sco er tras sustegn psichic, social e spiertal e da garantir la meglra qualitad da viver pussaivla a la persuna malsauna ed a ses confamigliars. La regenza beneventa la declera-
ziun che la federaziun svizra professiunala da las tgirunzas e dals tgirunzs (FST) e da la federaziun da las medias e dals medis svizzers (FMH) han deliberà il 1. da favrer 2001 ch'i saja da pussibilitar a mintga uman l'access a la tgira palliativa a la fin da sia vita. Er umans en la fasa finala da lur vita han il dretg da la meglra assistenza pussaivla dal puntg da vista da la medischina e da la tgira.

3. La decisiun d'admetter l'eutanasia u l'accumpagnament dals muribunds è ina decisiun etic-religiusa che sto vegnir fatga mintgamai dals purtaders da las chasas da vegls e da tgira. Premissa è che la direcziun da l'instituziun tscher-tga il discurs cun la persuna pronta per il suicidi e - quai ch'ins vegn a stuair valitar individualmain en scadin cas - cun ils confamigliars e ch'ella recumonda da consultar ina persuna dal fatg independenta. Latiers duain ins render attent a las pussaivladads da la medischina e tgira palliativa. Ultra da quai ha la direcziun da l'instituziun da garantir suenter in suicidi cun l'assistenza d'ina organisaziun d'eutanasia ch'i vegnia fatga la communicaziun dal mortori extraordinari a la polizia u a la procura publica.