Navigation

Inhaltsbereich

Sessiun: 28.03.2001
Suenter che la regenza ha preschentà en sia consultaziun davart la revisiun parziala da l'ordinaziun executiva davart il stadi civil ina varianta dals circuls ed ina dals districts, pretenda il postulat Hübscher da l'october 2000 che la reorganisaziun dal stadi civil vegnia suspendida e coordinada cun la revisiun pendenta da la constituziun, per betg pregiuditgar la libra discussiun davart las futuras funcziuns administrativas ch'èn tranter auter chaussa da la revisiun da la constituziun. Il postulat è alura vegnì acceptà durant la sessiun da november 2000, cuntrariamain a la voluntad da la regenza. La regenza è pia bloccada en sias stentas da regiunalisaziun fin che la discussiun politica davart la nova constituziun chantunala è terminada.

Independentamain da quai introducescha uss la confederaziun in sistem central da EED numnà INFOSTAR per manar electronicamain il register dal stadi civil. En quest sistem vegnan manadas las datas a moda centrala ed endatadas d'in sulet uffizial da stadi civil; tras quai vegnan tscherts registers (p.ex. register dal stadi civil) actualisads per uschedir automaticamain ed il char barat da fin uss tranter il register d'eveniments e da famiglia scroda. Tant la federaziun svizra da las uffizialas e dals uffizials da stadi civil sco er ils chantuns che s'expriman en la consultaziun approvan quest project da la confederaziun.

L'introducziun dal sistem da EED na succeda dentant betg sco menziunà en il postulat durant ils onns 2004/2005, mabain sco constatà gistamain en la resposta da la regenza gia l'onn 2002, e quai per dretg federal ed en tut ils chantuns il medem mument. L'emprima fasa da pilot cumenza l'entschatta da l'onn 2002 e dura maximalmain 18 mais; uschespert che tut ils uffizis svizzers da stadi civil èn colliads cun INFOSTAR vegn iniziada ina segunda fasa da pilot; la conclusiun da quella la fin da zercladur 2003 signifitga il passadi al manaschi cun plaina capacitad: tut ils uffizis svizzers da stadi civil vegnan a duvrar INFOSTAR tant per endatar persunas en il sistem sco er per registrar eveniments (brev da l'uffizi federal dal stadi civil dals 25 da schaner 2001 a las autoritads chantunalas da surveglianza en il stadi civil).

Ils custs per quest intent vegnan classifitgads en custs d'investiziun, da scolaziun e d'attatg d'ina suletta giada sco er en custs da diever che sa repetan annualmain. Tenor la calculaziun dal mars 2001 tras l'uffizi d'informatica dal Grischun resultan per las singulas vischnancas sco lieu da staziunament ils suandants custs per attatg:

    1. Custs d'ina suletta giada: custs d'investiziun, installaziun da l'attatg WAN, router, scolaziun da basa (sch'ella n'è betg gia succedida a moda suffizienta) e scolaziun d'Infostar, dentant senza indemnisaziun dal temp da lavur e da las spesas, da fr. 18'140.--.
    2. Custs che sa repetan annualmain: messa a disposiziun tras l'uffizi d'informatica dal chantun Grischun (UI): capacitad da transmissiun, attatg WAN, taxa fundamentala d'attatg per apparat final, custs da manaschi per l'Infostar, mantegniment dal router (sco opziun), dentant anc senza custs da persunal e senza custs da colliaziun cun la Swisscom, da fr. 12'176.--.

Ins sto ir d'accord cun la resposta da la regenza al postulat Hübscher dals 31 d'october 2000 pertutgant l'argument ch'ils custs per bunamain 200 talas installaziuns, inclusiv la scolaziun dals applitgaders gist uschà numerus, na sajan betg da responsar sulettamain per in'utilisaziun transitoria. I sa tractass en scadin cas sulettamain d'ina utilisaziun transitoria, independentamain dal fatg, sch'i vegn favurisada la varianta dals circuls u quella dals districts en la proxima revisiun dals uffizis da stadi civil. Tras quai vulain nus er dir che quest postulat na pregiuditgescha nagina da las variantas che stattan en discussiun.

Il preschent postulat ha pia l'intent da preservar las vischnancas da consequenzas finanzialas nunnecessarias. La bloccada da la regenza provocada dal postulat Hübscher duai vegnir abrogada. Il preschent postulat vul envidar la regenza da puspè reprender sias stentas da reorganisaziun resp. restructuraziun e da progredir cun quellas correspundentamain.

Cuira, ils 27 da mars 2001

Namen: Tramèr, Hübscher, Brüesch, Ambühl, Bär, Barandun, Berther (Sedrun), Bischoff, Butzerin, Cahannes, Casanova (Cuira), Catrina, Caviezel, Christoffel, Claus, Donatsch, Farrér, Feltscher, Giacometti, Gross, Hanimann, Hartmann, Hess, Jeker, Juon, Kehl, Kessler, Lemm, Maissen, Marti, Nick, Rizzi, Robustelli, Roffler, Scharplatz, Schmid (Spleia), Stiffler, Suter, Thomann, Thöny, Tramèr, Tuor (Mustér), Walther, Zanolari, Zarro

Session: 28.03.2001
Vorstoss: rg Postulat


Resposta da la regenza

Cun acceptar il postulat Hübscher (PCG 3/2000/2001 p. 523 ss.) dal cussegl grond en la sessiun da november 2000 cun 44 a 19 vuschs han ins pretendì ch'i saja da suspender la revisiun da l'ordinaziun executiva davart il stadi civil (DG 213.100) e da coordinar las lavurs cun la revisiun pendenta da la constituziun. Tras quai sa laschia evitar ina pregiudicaziun da la libra discussiun davart las futuras funcziuns administrativas.

Independentamain da la professiunalisaziun dals uffizis da stadi civil prescritta dal dretg federal (art. 3 al. 1bis OSC; CS 211.112.1, en vigur dapi il 1. da schaner 2000) metta la confederaziun a disposiziun a partir dal schaner 2002 ina banca da datas da stadi civil per l'entira Svizra che sa cloma Infostar. Ils chantuns ed ils uffizis da stadi civil vegnan colliads davent da la primavaira 2002 pass per pass cun Infostar. Davent da l'onn 2003 vegn la banca da datas ad entschaiver ses manaschi cun plaina capacitad. Tras il sistem Infostar daventan obsolets ils registers manads fin uss sin palpiri, sco il register d'eveniments (register da naschientschas, mortoris, lètgs e da renconuschientschas) ed il register da famiglia che vegn manà al lieu d'origin e ch'è extraordinariamain cumplitgà. Els vegnan substituids tras unitads electronicas da datas.

Ina colliaziun da tut ils uffizis da stadi civil chaschunass custs considerabels per las vischnancas, abstrahà da l'impussibilitad factica da dar l'instrucziun spezialisada necessaria. Tenor calculaziuns da l'uffizi d'informatica dal chantun Grischun muntan ils custs d'investiziun d'ina giada per plaz da lavur a var fr. 18'000.--. Latiers n'èn betg anc resguardads ils custs dal temp da lavur e las indemnisaziuns da las expensas per la scolaziun dals funcziunaris cumpetents. D'agiuntar èn custs da manaschi che sa repetan annualmain da var fr. 12'000.-- per plaz da lavur, plus las expensas dal persunal e la quota als custs da manaschi d'Infostar.

Spezialmain per quest motiv e pervi dal fatg ch'i sto vegnir realisà in grond dumber d'intensivas surdadas d'uffizi, na duain ins betg spetgar pli ditg per reorganisar resp. restructurar ils uffizis da stadi civil. Pli paucs uffizis da stadi civil ch'existan e pli favuraivel ch'il servetsch civil daventa en il futur per las vischnancas reunidas en in circul da stadi civil.

La regenza è perquai pronta d'acceptar il postulat Tramèr. Uschia po vegnir abrogada la bloccada subentrada pervi dal postulat Hübscher e las lavurs da revisiun per l'ordinaziun executiva chantunala davart il stadi civil sco er la reorganisaziun dals uffizis da stadi civil pon cuntinuar.