Navigation

Inhaltsbereich

Sessiun: 28.03.2001
L'agricultura patescha da preschent fermamain sut las consequenzas da la crisa da BSE e da la zoppina. Ussa smanatscha in auter privel, la glitta da serenera. Quella è bain in ladim favuraivel, ma ella po er cuntegnair substanzas privlusas che pon influenzar a moda negativa ils products dal terren e da la racolta.

I sa tracta da restanzas da medicaments e d'antibiotics, ormons ed autras substanzas privlusas (metals grevs?) che pudessan far donn a l'agricultura.

Dal puntg da vista giuridic pudess finalmain il pur che dovra glitta da serenera vegnir fatg responsabel per eventuals donns da l'ambient.

Per quests motivs è la plattafurma "cultivaziun da plantas" da l'uniun purila svizra vegnida a la conclusiun ch'il diever da glitta da serenera en l'agricultura duai vegnir scumandà entaifer curt temp.

Cun il stabiliment per setgentar glitta da serenera a Cuira ha noss chantun mess en funcziun in stabiliment exemplaric. La dumonda è quella, sch'i duess vegnir scumandà dal tuttafatg d'utilisar glitta da serenera en la cuntrada ed en l'agricultura, quai d'ina vart en vista a l'impurtanza anc pitschna da la glitta da serenera sco ladim e da l'autra vart en vista a l'allontanament che fiss pussaivel en in auter lieu ed a la ristga existenta.

Nus supplitgain la regenza da respunder las sequentas dumondas:

1. Vegni anc mess glitta da serenera sin ils ers en il chantun Grischun?
2. Pudess tut la glitta da serenera vegnir setgentada e brischada?
3. Vegni anc duvrà glitta da serenera setgentada per la recultivaziun da scarpas?
4. Han ins constatà er tar nus substanzas privlusas en la glitta da serenera?
5. Han ins constatà restanzas er en noss terren?
6. Vegnan decumponidas las restanzas da medicaments, remedis e d'ormons u van ellas a finir en la glitta da serenera?
7. È la regenza pronta da s'engaschar sin plaun svizzer en favur d'in scumond da duvrar glitta da serenera?

Cuira, ils 28 da mars 2001

Namen: Christoffel, Farrèr, Dalbert, Battaglia, Brasser, Brüesch, Bucher, Butzerin, Caviezel, Hardegger, Joos, Locher, Luzi, Meyer, Patt, Pelizzatti, Pfenninger, Pfiffner, Scharplatz, Schmid (Val S. Pieder), Suter, Telli, Zanolari, Zinsli

Session: 28.03.2001
Vorstoss: rg Interpellation


Resposta da la regenza

Tranter 1971 e 2000 ha ina cumissiun chantunala da glitta da serenera sut la direc-
ziun da l'uffizi per l'ambient elavurà las dumondas da l'economisaziun da glitta da serenera. La lavur da questa cumissiun è stada concludida cun l'elavuraziun dal "Plan d'allontanament da glitta da serenera en il Grischun" l'avrigl 2000. Il center da l'allontanament da la glitta da serenera en il chantun Grischun è actualmain il stabiliment da setgentar glitta da serenera sin l'areal da la ARA a Cuira ch'è vegnida concepida per setgentar la glitta da serenera da l'entir chantun che na la lascha betg economisar. La glitta setgentada vegn alura arsa en l'interpresa da cement.

Il plan d'allontanament da glitta da serenera permetta er en il futur da duvrar glitta da serenera sco ladim. Per duvrar glitta da serenera en l'agricultura, per la produc-
ziun da pavel u per la producziun da verduras valan las sequentas cundiziuns da basa: cumprovar il basegn da ladim (eruì a basa d'ina bilantscha da ladim per il manaschi singul tras il servetsch da cussegliaziun agricula, Plantahof), duvrar a moda correcta la glitta, resguardar differentas pretensiuns da qualitad (p. ex. concernent igienisaziun, cuntegn da metals grevs e da AOX) e.u.v. Ultra da l'economisaziun sco ladim en l'agricultura po la glitta da serenera er vegnir duvrada per la recultivaziun. Per quest intent sto ella vegnir elavurada a cumpost ed alura vegnir maschadada cun material anorganic (material da stgav adattà, terren). Er qua ston ins resguardar differentas pretensiuns da qualitad e restricziuns da la quantitad che po vegnir sternida. La deci-siun, sche la glitta da serenera duai vegnir duvrada en l'agricultura, è en prima lingia chaussa dal pur. L'uffizi per l'ambient surveglia l'allontanament da glitta da
serenera e rapporta annualmain en chaussa. La statistica mussa che la quantitad da glitta da serenera economisada da 1995 fin 2000 è sa reducida da circa 4000 t materia setgentada (2000 t ladim, 2000 t recultivaziun) ad 800 t (320 t ladim, 480 t recultivaziun). Da princip èsi da dir ch'il diever da glitta da serenera n'è betg permess en l'agricultura biologica. Cun il dumber creschent da manaschis biologics vegn quest gener da sterner ladim a sa reducir.

Resposta a las dumondas:

1. Gea, l'onn 2000 èsi stà main che 5%.
2. Da princip gea.
3. Na, ins na dovra nagina glitta da serenera setgentada.
4. Da la glitta da serenera vegnan fatgas analisas da rutina concernent ses cuntegn da metals grevs e da cumbinaziuns d'alogens organics (AOX). En singuls cas vegnan constatads surpassaments da las valurs da limit.
5. Analisas da rutina da terren pertutgant il cuntegn da metals grevs mussan per part valurs augmentadas ed en singuls cas surpassaments da la valur directiva ch'èn limitads localmain. I na dat dentant nagina cumprova d'in connex cun il sterner glitta da serenera.
6. Davart il cumportament da medicaments e d'ormons en sereneras san ins pauc: Tut tenor las qualitads vegnan talas substanzas decumponidas en differentas mesiras. Las restanzas betg decumponidas van per part en il prefluent, per part en la glitta da serenera. Talas dumondas vegnan actualmain examinadas en differents projects sin plaun federal cun participaziun finanziala dals chantuns. Mez 2001 duai esser terminà in studi davart las ristgas per l'ambient en la glitta da serenera; il studi vegn fatg sin incumbensa da l'uffizi federal d'agricultura (UFA) e da l'uffizi federal d'ambient, guaud e cuntrada (UFAGC).
7. Il sterner glitta da serenera vegn gia reducì fermamain tras ina recumandaziun da l'UFAGC (en enclegientscha cun l'uffizi federal da veterinaria [UFV] ed il
UFA) dal 1. da mars 2001, e quai pervia da la problematica da BSE. La regenza vuless definitivamain prender posiziun davart in scumond sin plaun federal pir cur ch'il studi menziunà è avant maun.