Navigation

Inhaltsbereich

Postulat concernent la creaziun d'ina partiziun per il svilup da la scola per il chantun Grischun

Sessiun: 28.03.2001
Durant la sessiun d'october 2000 dal parlament grischun ha la regenza prendì posiziun pertutgant ils sequents projects da refurma da la scola populara:

1. Instrucziun bilingua a la scola primara
2. Concept da linguas al stgalim superiur
3. Refurma dal stgalim superiur
4. Promoziun cumplessiva e giudicat da scolaras e scolars
5. Promoziun d'uffants cun talents spezials.

Tut ils projects sa chattan en la fasa d'elavuraziun u en la fasa da la realisaziun graduada. Els èn concepids uschia ch'ina terminaziun succeda mintgamai durant ils proxims 3-10 onns. Collià cun quels projects è ina scolaziun sco er ina furmaziun supplementara intensiva da la persuna d'instrucziun.

Pli baud existeva in post da lavur pedagogic entaifer il secretariat dal departament d'educaziun, cultura e protecziun da l'ambient. En la pratica actuala s'occupan per gronda part ils inspecturs da scola dal svilup e da la tgira dals projects da refurma da la scola. Ils magisters e las autoritads da scola da las vischnancas pon contactar ils inspecturs da scola sch'i dat problems. Las visitas en scola ch'èn vegnidas realisadas pli baud en intervals regulars en l'entir chantun na pon dentant betg pli vegnir fatgas en consequenza da la gronda lavur cun ils projects da refurma. Da quai resulta che la gronda part da las magistras e dals magisters han darar visitas dals inspecturs da scola. L'accumpagnament professiunal da la magistraglia ed il feedback d'in spezialist mancan pia. Er la veritabla surveglianza da scola n'exista betg pli en la mesira oriunda.

Ils inspecturs da scola portan gia oz ina chargia dubla. Ins na po betg er anc surdar ad els l'elavuraziun da las futuras refurmas da scola. Per dumagnar questas incumbensas èsi indispensabel da crear - analogamain ad auters chantuns - ina partiziun spezialisada per il svilup da la scola. Questa partiziun sto er esser il post da contact per vischnancas, direcziuns da scola e cussegls da scola. Uschia pon ins cuntanscher ina realisaziun optimala da las futuras refurmas da scola en il Grischun.

La regenza vegn envidada da realisar la creaziun d'ina partiziun per il svilup da la scola en il secretariat dal departament cumpetent, d'iniziar pussaivladads per stgargiar efficaziamain ils inspecturs da scola ed eventualmain da preparar la creaziun da novas plazzas.

Cuira, ils 27 da mars 2001

Namen: Claus, Suter, Jäger, Ambühl, Brüesch, Bucher, Butzerin, Carisch, Casanova (Cuira), Christoffel, Dermont, Donatsch, Feltscher, Giuliani, Hartmann, Hess, Lardi, Locher, Maissen, Meyer, Nick, Pedrotti, Pfiffner, Robustelli, Scharplatz, Stiffler, Thomann, Tramèr, Trepp, Walther

Session: 28.03.2001
Vorstoss: rg Postulat


Resposta da la regenza

Las incumbensas dal post da lavur pedagogic / post da stab furmaziun cumpigliavan la cussegliaziun dal departament en dumondas pedagogicas; la constataziun a temp da novas incumbensas e da novs problems sco er l'elavuraziun da propostas da soluziun correspundentas; il scleriment preliminar, la planisaziun, l'elavuraziun, la realisaziun u l'accumpagnament da projects da scola e d'experiments da scola,
inclusiv l'evaluaziun; la represchentanza dal chantun en gremis concernent dumondas pedagogicas da svilup. Il post da lavur pedagogic / post da stab furmaziun dal secretariat dal departament d'educaziun n'è betg sulettamain s'occupà da dumondas sin il sectur da la scola populara, mabain er d'incumbensas dal stgalim secundar II e dal sectur da furmaziun terziar. Surtut sin il sectur da scola media ed en projects che cumpigliavan plirs stgalims da furmaziun han ils collavuraturs dal post da lavur pedagogic / post da stab furmaziun prestà lavurs impurtantas da coordinaziun, concept e project.

Cur ch'ins ha stuì reorganisar entaifer il departament l'uffizi per las scolas popularas e las scolinas, è vegnì abrogà l'onn 1999 il post da lavur pedagogic / post da stab furmaziun en il secretariat dal departament; ils collavuraturs èn vegnids integrads en l'uffizi. En connex cun questa mesira organisatoria han ins stuì reducir incumbensas u las attribuir da nov. L'elavuraziun d'incumbensas sin il sectur da la scola media vegn fatga essenzialmain tras il secretariat dal departament e tras il rectorat da la scola chantunala grischuna. Tar la nova repartiziun da las lavurs han ins resguardà, cun tge post da servetsch che l'incumbensa ha la relaziun la pli stretga concernent ses cuntegn. Questa nova repartiziun da las incumbensas ch'è stada necessaria ha chaschunà lavurs supplementaras per ils singuls posts da servetsch, uschia er per ils collavuraturs da l'uffizi per las scolas popularas e las scolinas, dal qual fan part ils inspecturs da scola. Il davos temp pon ins dentant er constatar in svilup spezialmain dinamic sin il sectur da scola che sa mussa sin tut ils stgalims tras ina gronda quantitad da projects da refurma. Ensemen cun auters facturs chaschunan er quels la dimensiun da lavur dals inspecturs da scola che vegn skizzada en il postulat. Ina gruppa da lavur che duai proponer pussaivladads per reorganisar la surveglianza da las scolinas e da las scolas ha gia entschavì sia lavur. Cun quest'occasiun duai surtut vegnir sclerì, cun tge structuras ed attribuziuns da lavur ch'ins po dumagnar las incumbensas ch'èn d'ademplir a moda pli effizienta pussaivel. In'optica cumbinatorica, en la quala ins sto er integrar ils effects sistemics ch'ins spetga da la scol'auta professiunala da pedagogia, è qua d'impurtanza prioritara.

Tranter ils chantuns che sa laschan cumparegliar cun il Grischun è noss chantun il sulet che na dispona ni d'ina partiziun per il svilup da la scola / post da stab furmaziun ni d'ina partiziun da scola media. La regenza è da princip er da l'avis exprimì en il postulat che la creaziun d'ina partiziun per il svilup da la scola / post da stab furmaziun gidass ad optimar la realisaziun da refurmas en il sectur da la scola publica e dal stgalim secundar II (spezialmain scola media) ed a distgargiar ils inspecturs da scola. La situaziun finanziala actuala dal chantun, il stop da crear plazzas ed il quità per l'equiliber da las finanzas na laschan dentant a la regenza strusch libertad d'acziun avunda per crear pliras plazzas novas a curta vista.

La regenza è pronta d'acceptar il postulat en quel senn ch'ella sustegna la creaziun d'ina partiziun per il svilup da la scola / post da stab furmaziun en il secretariat dal departament d'educaziun sco er l'introducziun da mesiras per ina distgargia effizienta dals inspecturs da scola. La realisaziun d'ina partiziun per il svilup da la scola / post da stab furmaziun duai succeder a l'entschatta cun transfurmar plazzas, spustar plazzas u tras delegaziun uffiziala.