Navigation

Inhaltsbereich

Interpellaziun concernent la zoppina

Sessiun: 28.03.2001
Pervia dals cas ils pli novs da zoppina ils davos dis en noss pajais vischins Frantscha e Germania na sa lascha betg pli excluder in'erupziun da la malsogna er en Svizra. Ins ha infurmà ils proprietaris d'animals e la publicitad e prendì emprimas mesiras.

Epidemias d'animals pertutgan circuls pli vasts che mo l'agricultura, perquai che mesiras per cumbatter l'epidemia, sco isolaziuns d'entirs territoris, chaschunan custs a l'economia publica. In'erupziun en noss chantun avess per consequenza surtut grondas perditas en il turissem. Ultra da quai sa laschan talas isolaziuns realisar be cun stentas enormas, causa la mobilitad da la populaziun odierna. Vaccinaziuns stattan adina puspè en discussiun sco alternativa. Ils dischavantatgs da quellas èn dentant enconuschents.

En Germania discurran ins en il fratemp d'uschenumnadas vaccinaziuns collectivas circumscrittas. Là vegnan vaccinads ils effectivs d'animals be en in tschert territori circumscrit enturn in cas d'epidemia, per franar l'extensiun. Las vaccinaziuns collectivas circumscrittas duain reducir ils dischavantags da las vaccinaziuns cumplettas.

Ils interpellants supplitgeschan la regenza da respunder las sequentas dumondas:

    1. Po la regenza empermetter da s'engaschar sin plaun federal per ch'en il cas d'ina erupziun da la zoppina vegnian tractads egualmain tut ils participads al traffic d'animals (alpegiadas, exposiziuns da muvel, fieras, commerzi privat e.u.v.) e per che las eventualas mesiras vegnian realisadas en in concept?
    2. Co giuditgescha la regenza la realisabladad da mesiras sco isolaziuns, sche la zoppina erumpa?
    3. Vesa la regenza pussaivladads da s'opponer naziunalmain cunter il squitsch per vaccinaziuns, e quai per mantegnair a lunga vista ils avantatgs da nossa agricultura en la fiera d'export?

Cuira, ils 27 da mars 2001

Namen: Schmid (Val S. Pieder), Hanimann, Heinz, Bär, Battaglia, Beck, Berther (Mustér), Biancotti, Brüesch, Butzerin, Capaul, Carisch, Casanova (Vignogn), Caviezel, Cavigelli, Christoffel, Claus, Conrad, Dalbert, Dermont, Farrér, Federspiel, Geisseler, Gross, Hartmann, Joos, Kessler, Lardi, Lemm, Loepfe, Maissen, Märchy, Parolini, Patt, Pedrotti, Peretti, Portner, Quinter, Ratti, Rizzi, Sax, Schmid (Sedrun), Stiffler, Telli, Thöny, Tramèr, Tuor (Mustér), Tuor (Trun), Zanolari, Zarro

Session: 28.03.2001
Vorstoss: rg Interpellation


Resposta da la regenza

1. Il tractar epidemias d'animals fermamain contagiusas ed il proceder en connex cun singulas epidemias d'animals vegnan reglads exactamain en la lescha federala davart epidemias d'animals (LFE) ed en l'ordinaziun federala davart epidemias d'animals (OFE). Perquai pon ins partir dal fatg che las prescripziuns legalas vegnian exequidas a moda unifitgada en l'entira Svizra. Tenor LFE po l'uffizi federal da veterinaria convocar in stab da crisa sch'i dat in'epidemia. Quest stab da crisa sa cumpona da represchentants dals veterinaris chantunals, da l'economia e da la scienza ed è responsabel per la coordinaziun da las mesiras ch'èn da prender e ch'èn previsas per cumbatter epidemias fermamain contagiusas. En il cas d'ina erupziun da la zoppina vul la regenza s'engaschar che, a basa da la moda da proceder fixada en la lescha, vegnian tractadas egualmain tut las persunas ch'èn participadas al traffic d'animals e che las mesiras ch'èn da prender vegnian realisadas tenor in concept da procedura unifitgà e coordinà da la confederaziun che po vegnir consultà er en l'internet sco planisaziun da cas d'urgenza.

2. Cun il conclus da la regenza dals 6 da mars 2001 è vegnì incumbensà il schef dal stab directiv chantunal da numnar, en enclegientscha cun l'uffizi da veterinari, in stab parzial per la zoppina ch'ha da preparar tut las mesiras preventivas, tranter auter er isolaziuns, a moda ch'ins possia agir immediat sch'i avess da dar in cas d'epidemia. L'isolaziun d'in bain pertutgà dependa mintgamai da las circumstanzas localas e sto vegnir adattada a la situaziun. Suenter che la stagiun d'enviern en las regiuns da turissem è terminada e ch'il traffic da persunas tras la gronda part da las regiuns è sa reducì considerablamain, valitescha la regenza la realisabladad d'isolaziuns en l'entir territori chantunal plitost sco positiva.

3. L'uffizi internaziunal da las epidemias d'animals (OIE) distingua pajais ch'èn libers da la zoppina senza stuair vaccinar, pajais ch'èn libers da la zoppina, ma che vaccinan e pajais che n'èn betg libers da la zoppina. Be l'emprima categoria da pajais, da la quala fa part er la Svizra, po far commerzi illimitadamain cun products d'animals. Quest avantatg sin il martgà na dastga betg vegnir periclità cun introducir vaccinaziuns cunter la zoppina en l'entir pajais. Encunter ina vaccinaziun pledan er numerus motivs da la medischina veterinara. Ils vaccins che stattan oz a disposiziun fan effect be cunter in dals 7 serotips da la zoppina e na permettan betg da cuntanscher ina protecziun da 100 %. La durada da l'immunitad suenter ina emprima vaccinaziun è limitada sin 4 mais e silsuenter sto la vaccinaziun vegnir repetida annualmain. La vaccinaziun chaschuna, analog a l'infecziun natirala da la zoppina, ina furmaziun d'anticorpuls cunter il virus da la zoppina en il sang. Cun metodas serologicas n'èsi betg pussaivel da distinguer animals vaccinads d'animals infectads cun il virus. La vaccinaziun na po betg proteger animals ad ungla cunter ina infecziun cun subtips dal virus divergents geneticamain ed er betg adina cunter la malsogna. Igl è pussaivel che singuls animals ad ungla vaccinads portan il virus en els e quel sorta da l'organissem onns ora senza che sintoms clinics sa mussian. Tras quai vegn zuppà l'andament da l'epidemia, in fatg che difficultescha u impussibilitescha schizunt il cumbat cunter la zoppina.

Igl è da distinguer da la vaccinaziun profilactica en l'entir pajais la vaccinaziun d'urgenza che succeda sco vaccinaziun collectiva circumscritta da l'extern vers l'intern enturn in gnieu d'epidemia. Ina tala vaccinaziun d'urgenza pudess ins s'imaginar, sche l'epidemia erumpess en Svizra, p.ex. sch'ins na pudess betg mazzar spert avunda ils animals infectads en ina zona isolada. Ina reserva da 300'000 ampullas dal vaccin è pronta per l'effectiv da muvel en Svizra e po vegnir applitgada entaifer curt temp suenter che la decisiun respectiva è vegnida prendida. Per mantegnair il bun stadi areguard l'epidemia, stuessan ins mazzar ils animals vaccinads.

A basa da quai ch'ella ha explitgà è la regenza cunter ina vaccinaziun cunter la zoppina en l'entir pajais e vegn a s'exprimer eventualmain er envers il cussegl federal en quest senn.