Dumonda en scrit concernent la zoppina
Sessiun: 28.03.2001
Il mais favrer 2001 è prorutta or la zoppina en l'Engalterra. En il fratemp èn vegnids pertutgads er differents stadis sin il continent europeic. Questa malsogna autamain contagiusa vegn chaschunada da virus, e tut ils animals ad unglas pon vegnir malsauns. L'epidemia d'animals n'è betg contagiusa per umans, ma quels pon transmetter ils virus ed infectar uschia auters animals. Ils scherms infectus pon vegnir transferids tras animals infectads, tras lur products e tras material ch'è stà en contact cun quests animals.
Da la zoppina resultan gronds donns economics. Sulettamain en l'Engalterra quintan ins fin oz cun perditas da circa 8 milliardas francs en l'agricultura e da 12 milliardas francs en il turissem.
Pervia d'in cumbat discutabel cunter l'epidemia han ins gia mazzà ed eliminà millis d'animals. Quai vegn confermà, perquai che questas mesiras prendidas dapi l'entschatta da l'epidemia en l'Engalterra n'han betg gì il success giavischà. L'eliminaziun d'animals sauns en questa moda e maniera è l'admissiun ch'ils umans na sajan betg capavels da cumbatter la zoppina. Quai na dastga betg succeder tar nus.
Per proteger noss effectivs d'animals, ma er per sclerir la publicitad ed ils proprietaris d'animals han ils responsabels invià mesiras da precauziun sin differents stgalims. Per questa lavur meritan els engraziament e renconuschientscha. Las mesiras preventivas èn da realisar a moda coordinada en l'entir pajais. Qua po nossa regenza far valair sia influenza.
Il sutsegnà envida la regenza da respunder las sequentas dumondas:
1. Per differents motivs na fan ins dapi 1990 naginas vaccinaziuns pli cunter l'epidemia en l'entira Europa occidentala. Na fissi betg raschunaivel d'introducir la vaccinaziun preventiva en l'entir territori svizzer?
2. Igl è vegnì decretà in stop d'importar animals ad unglas da pajais da la UE. Co statti cun l'import da products d'animals, essend ch'er pajais betg europeics (p. ex. l'Argentinia) èn pertutgads da la zoppina?
3. Martgads ed exposiziuns cun participaziun d'animals da l'exteriur èn vegnids scumandads. Co statti cun l'access d'animals svizzers ad exposiziuns estras? Na stuess ins betg decretar in scumond general da martgads e d'exposiziuns?
4. Sin in'autostrada svizra han ins chattà in vehichel vid per transportar animals, betg schubregià e betg dischinfectà, che aveva transportà animals ordaifer la Svizra e traversava noss pajais per il viadi da return. Na stuess betg resultar da quai er in scumond per viadis da transit senza animals tras la Svizra?
5. Tge mesiras pli rigurusas stuess ins prender, sche l'epidemia sa derasass vinavant en ils pajais cunfinants?
6. Co è sa preparà il chantun Grischun per in eventual cas da zoppina en quai che pertutga il persunal, l'organisaziun e las finanzas?
Cuira, ils 28 da mars 2001
Namen: Patt
Session: 28.03.2001
Vorstoss: rg SchriftlicheAnfrage
Resposta da la regenza
1. L'uffizi internaziunal da las epidemias d'animals fa la differenza tranter pajais ch'èn libers da la zoppina senza vaccinaziun, pajais ch'èn libers da la zoppina, ma che fan vaccinaziuns e pajais cun zoppina. Be l'emprima categoria da pajais, tar la quala vegn quintada er la Svizra, dastga far commerzi illimità cun products d'animals. Cun la reintroducziun d'ina vaccinaziun cunter la zoppina en l'entir pajais fissan colliadas restricziuns dal commerzi che avessan grevas consequenzas per l'entira agricultura e per l'industria da victualias. Betg sulettamain ils exports da charn, mabain er quels da products da latg cun in volumen annual da circa 500 milliuns francs vegnissan restrenschids considerablamain.
Cunter ina vaccinaziun discurran er numerus motivs da la medischina veterinara. Ils vaccins ch'èn oz disponibels èn effectivs be cunter in dals 7 serotips da la zoppina, ed ins na po betg cuntanscher ina protecziun da 100% tras la vaccinaziun. La vaccinaziun chaschuna, analog ad ina infecziun natirala cun la zoppina, la furmaziun d'anticorpuls cunter il virus da la zoppina en il sang. Cun metodas serologicas n'èsi betg pussaivel da distinguer ils animals vaccinads dals animals infectads cun il virus. La vaccinaziun na po betg proteger animals ad unglas cunter ina infecziun cun subtips da virus natirals antigeneticamain divergents; ella na po er betg adina proteger cunter la malsogna. I dat la pussaivladad che singuls animals ad unglas portan en els il virus e che quel sorta da lur organissem durant onns, senza ch'is animals mussian sintoms clinics. Tras quai vegn zuppentà il decurs da l'epidemia, quai che difficultescha u renda schizunt nunpussaivel da cumbatter effizientamain la zoppina. Per ils motivs menziunads è la regenza da l'opiniun ch'ina vaccinaziun cunter la zoppina en l'entira Svizra e da tut l'effectiv d'animals ad ungla na saja betg raschunaivla.
2. L'uffizi federal da veterinaria (UFV) ha decretà gia ils 14 da mars 2001 in scumond d'import per charn da l'Argentinia perquai che las autoritads da quel pajais n'han betg pudì respunder a moda satisfacenta las dumondas da la Svizra concernent la zoppina en Argentinia. A basa da la situaziun pli critica da l'epidemia en Europa ha il UFV ordinà en in decret dals 28 da mars 2001 ulteriuras mesiras da protecziun cunter la zoppina, ultra dal stop d'import d'animals ad unglas decretà gia ils 13 da mars 2001. Products da charn sco er latg e products da latg elavurads da la UE ston dapi quella giada vegnir examinads dals veterinaris da cunfin.
3. Martgads ed exposiziuns cun participaziun d'animals esters n'èn betg pli pussaivels a basa dal scumond d'import d'animals ad unglas. Ina participaziun d'animals svizzers ad exposiziuns a l'ester è pauc probabla, perquai che quests animals na pudessan betg pli vegnir reimportads en Svizra. La regenza è persvadida che las mesiras da l'UFV èn suffizientas per evitar che l'epidemia vegnia importada en Svizra. Per quest motiv na dovri da preschent nagin scumond general da martgads e d'exposiziuns.
4. Tenor in'ordinaziun da l'UFV dals 28 da mars 2001 dastgan vehichels vids per transportar animals be anc entrar en Svizra, sch'ils manischunzs pon cumprovar cun l'attestat d'in veterinari uffizial ch'il char è vegnì schubregià e dischinfectà suenter il davos transport d'animals. Tenor l'avis da la regenza èn questas mesiras da l'UFV suffizientas.
5. Sche l'epidemia sa derasa en ils pajais limitrofs na dovri tenor l'opiniun da la regenza naginas mesiras. Ulteriuras mesiras èn pir da prender cur ch'i dat in cas da zoppina en Svizra.
6. Il schef da stab dal stab directiv chantunal è vegnì incumbensà da la regenza da numnar en enclegientscha cun l'uffizi da veterinari in stab parzial per la zoppina che ha da preparar tut las mesiras profilacticas, uschia ch'ins po agir immediat en il cas d'ina infecziun. Il chantun dispona d'in equipament per cumbatter epidemias d'animals fitg contagiusas sco er d'ina unitad mobila per schubregiar e dischinfectar. Equipas da cumbat scoladas correspundentamain per il diever da quests instruments èn disponiblas da tut temp.