Navigation

Inhaltsbereich

Interpellaziun concernent ils programs d'integraziun per ils dischoccupads ch'han consumà lur dretg d'indemnisaziun

Sessiun: 28.03.2001
Il sguard sin la scala dal dumber actual dals dischoccupads pudess trumpar facilmain. Malgrà la prosperitad economica resta la dischoccupaziun da basa sin ca. 1,5 pertschient. Anc adina datti gruppas da la populaziun ch'èn dependentas d'in sustegn social ed economic.

Las communicaziuns pli e pli frequentas il davos temp davart serradas da manaschis laschan chapir che la prosperitad economica stagnescha. Las consequenzas enconuschain nus dals onns precedents: i crescha il dumber dals dischoccupads e da las persunas ablas da lavurar che n'èn betg pli integradas en il process da lavur.

La liberalisaziun tar las VFF, la Posta e la Swisscom ha marginalisà pli e pli las regiuns da muntogna. Totalmain èn gia passa 20 000 plazzas da lavur vegnidas eliminadas en Svizra. Oz ed uss hai num tenor noss avis d'optimar ils programs d'integraziun, per che nus sajan pronts per ils eveniments futurs.

Il program d'integraziun per ils dischoccupads ch'han consumà lur dretg d'indemnisaziun sut il titel „Rait sociala dal Grischun“ è gia sa cumprovà stupent tenor mias experientschas. Engaschada en la cussegliaziun e l'intermediaziun, ha l'organisaziun creà ina plazza fixa per las persunas senza lavur. La finanziaziun da l'administraziun e da l'intermediaziun vegn garantida tras l'agid social. Quai vul dir che questas persunas èn dependentas da las vischnancas malgrà lur lavur. In'occupaziun che na motivescha betg! Las experientschas cun il program d'occupaziun, nua che las persunas obtegnan ina paja per lur lavur, p.ex. en il Pro Rec, èn sa cumprovadas stupent. La motivaziun da lavurar da las persunas ch'obtegnan lur da viver da l'agid social è bainquant pli pitschna.

En quest connex faschain nus las sequentas dumondas:

    1. Co giuditgescha la regenza la differenta finanziaziun dals programs d'integraziun?
2. È er la regenza da l'avis da las interpellantas e dals interpellants ch'i fiss da crear ina schliaziun unifitgada, q.v.d. d'empruvar da cuntanscher ina separaziun da l'agid social?
    3. Han ins pudì finanziar ulteriurs agids d'integraziun en il rom dals meds federals? Vegnan tals programs elavurads concretamain?

Cuira, ils 26 da mars 2001

Namen: Schütz, Locher, Frigg, Arquint, Brasser, Bucher, Jäger, Koch, Looser, Märchy, Noi, Pelizzatti, Pfenninger, Pfiffner, Schmutz, Trepp, Zanolari, Zindel

Session: 28.03.2001
Vorstoss: rg Interpellation


Resposta da la regenza

La regenza è dal medem avis sco las interpellantas ed ils interpellants, tenor il qual igl è da far quint er en il futur cun ina dischoccupaziun da basa, malgrà ch'i dat indicaziuns per in progress da l'economia. Pertutgadas èn spezialmain persunas ch'han deficits da scolaziun e che, pervia da motivs persunals, socials u da sanadad, na chattan betg plazzas da lavur u las chattan be grazia ad in accumpagnament permanent. Per questa gruppa da persunas èn vegnidas sviluppadas purschidas tras il project „Rait sociala dal Grischun“.

Il project vegn sustegnì actualmain cun 175'000 francs per onn or dal fond grischun per dischoccupads. Questa summa cuvra ils custs d'organisaziun. Ils custs da las participantas e dals participants als programs d'occupaziun e l'indemnisaziun resp. la remuneraziun vegnan finanziads da l'agid social.

Dals programs d'integraziun existents per dischoccupads en il chantun (p.ex. Pro REC) fan diever tant ils centers regiunals d'intermediaziun da lavur da l'uffizi da lavur sco er la rait sociala. Las premissas legalas per finanziar quests programs d'integraziun tras l'assicuranza da dischoccupads d'ina vart e l'agid social da l'autra vart varieschan. L'assicuranza da dischoccupads finanziescha be programs d'integraziun per persunas che n'han anc betg consumà lur dretg d'indemnisaziun. Quellas persunas che na pon betg pli far valair in dretg d'indemnisaziun envers l'assicuranza da dischoccupads sto dentant sustegnair l'agid social. Or dal punct da vista dals pertutgads pari nuncunvegnent ch'ins è obligà da restituir l'indemnisaziun finanziada da l'agid social.

En il rom da l'ulteriur svilup dal project „Rait sociala dal Grischun“ sclerescha l'uffizi dal servetsch social co ch'ins pudess meglierar ils dischavantatgs ed ils puncts debels da la finanziaziun dals programs d'integraziun tras l'agid social. Sco mesira a curta vista vegni examinà, sche e quant enavant ch'ils programs d'integraziun per persunas che na pon betg pli far valair in dretg d'indemnisaziun envers l'assicuranza da dischoccupads pon vegnir finanziads tras la lescha d'impedids. Sco mesira a pli lunga vista vegni examinà, sche la finanziaziun dals programs d'integraziun po vegnir reglada da nov en ina furma ch'eliminescha ils dischavantatgs existents en il rom da la lescha davart il sustegn public.

Da meds federals (assicuranza da dischoccupads) pon vegnir finanziads ils custs per la furmaziun supplementara, la rescolaziun, ils programs d'occupaziun, las contribuziuns d'introducziun e.u.v. sco agids d'integraziun be durant in termin general da dus onns. Per la finanziaziun d'agids d'integraziun pli vasts tras meds federals manca la basa legala. Il cussegl federal na prevesa betg da crear ina tala basa legala a chaschun da la proxima revisiun da la lescha davart l'assicuranza da dischoccupads, malgrà ina proposta correspundenta da la conferenza svizra dals directurs chantunals dals fatgs socials. Ina tala aveva pretendì expressivamain er la regenza grischuna en il rom da la consultaziun davart la revisiun da la lescha.