Dumonda en scrit concernent l'adattaziun da las directivas COSAS sin il 1. da schaner 2001; applicaziun ineguala en las vischnancas grischunas
Sessiun: 28.03.2001
Sin il 1. da schaner 2001 èn vegnidas elavuradas las directivas COSAS (conferenza svizra da l'agid social). Tranter auter èsi vegnì fixà che la vischnanca da fin uss sto pajar la prestaziun da sustegn per l'emprim mais suenter la partenza, sche retschavidras e retschaviders d'agid social midan abitaziun. Quai gida tranter auter a las vischnancas ad avair temp avunda per sclerir resp. fixar in eventual sustegn social per persunas che vegnan natiers. Questa regulaziun po dentant funcziunar tant entaifer noss chantun sco er en l'entira Svizra be sche tut las vischnancas sa cumportan medemamain.
Entant che tschertas vischnancas da noss chantun applitgeschan quest princip dapi l'entschatta da l'onn, han concludì singulas autras vischnancas da betg finanziar quest emprim mais successiv ad ina midada da chasa da retschavidras e retschaviders d'agid social. Questa tenuta nunsolidara chaschuna stringentamain differenzas tranter las vischnancas sco er ina malsegirezza considerabla per vegnir a frida cun situaziuns correspundentas.
Nus supplitgain la regenza da respunder las sequentas dumondas:
1. È la regenza da l'avis che tut las vischnancas duaian sa cuntegnair medemamain en il Grischun areguard la finanziaziun da l'emprim mais suenter la partenza (applicaziun da la recumandaziun COSAS)?
2. Per evitar in uschenumnà „turissem social“ fissi gia dapi ditg util, sch'i vegniss applitgada ina pratica unifitgada per il sustegn en tut las vischnancas da noss chantun. Quant lunsch èn progredidas las stentas correspundentas en questa direcziun da vart dals uffizis chantunals?
Cuira, ils 27 da mars 2001
Namen: Jäger
Session: 28.03.2001
Vorstoss: rg SchriftlicheAnfrage
Resposta da la regenza
La regenza respunda las dumondas sco suonda:
1. La regenza è er da l'avis che tut las vischnancas duaian suandar la recumandaziun da la conferenza svizra da l'agid social, tenor la quala la vischnanca da domicil da fin uss ha da pajar il sustegn per ina persuna manglusa per l'emprim mais suenter sia partenza. In nunadempliment da questa recumandaziun tras singulas vischnancas maina ad ina pratica ineguala e pia inevitablamain a discordias tranter las vischnancas. Ella augmenta plinavant la lavur da scleriment ed administrativa per mintga singul cas.
2. Las prestaziuns finanzialas da l'agid social duain gidar a mantegnair l'integraziun sociala da las persunas manglusas, a franar lur desintegraziun ed a promover lur reintegraziun. A la regenza pari pia impurtant che la pratica da sustegn da las vischnancas vegnia concepida a moda unifitgada. Ina concepziun unifitgada da la pratica da sustegn ha er per consequenza ch'i na dat betg pli midadas dal lieu da domicil motivadas sulettamain da l'aspectativa da prestaziuns socialas pli generusas.
La conferenza svizra da l'agid social (COSAS) ha edì directivas per la concepziun e calculaziun da l'agid social. Quellas vegnan renconuschidas per la concepziun da la pratica en l'entira Svizra ed èn decisivas.
Fin la fin da zercladur 2001 prevesa la regenza da prescriver impegnativamain a las autoritads socialas communalas l'applicaziun da las directivas COSAS elavuradas sin il 1. da schaner 2001, e quai a cundiziuns generalas ch'èn anc da definir.