Navigation

Inhaltsbereich

Interpellaziun concernent las consequenzas da la taxa sin il traffic da camiuns pesants tenor prestaziun (TCPTP/LSVA) per l'agricultura e las interpresas pitschnas ruralas

Sessiun: 28.03.2001
Dapi il schaner 2001 ston las interpresas da transport consegnar a la confederaziun la taxa sin il traffic da camiuns pesants tenor prestaziun (TCPTP). Igl è cler ch'i vegn imponì taglia sin ils products agriculs e sin ils meds da producziun per l'agricultura cur che quels èn sin via dal bain puril vers ils posts da vendita. (Surtut manaschis pitschens cun pitschnas quantitads u transports, nua ch'igl è da far quint cun viadis da vid, èn evidentamain dischavantagiads). Intschert èsi anc co ch'ils custs supplementars vegnan quintads. Ils grossists han dentant gia annunzià ch'ils custs supplementars tras la TCPTP ch'èn cumprovads vegnan mess a quint als furniturs.

Medemamain pertutgads èn ils manaschis pitschens en las regiuns periferas, nua ch'ils differents custs daventan pli e pli ina dumonda existenziala. La capacitad da concurrer da scadina producziun sa pegiurescha constantamain en las regiuns periferas. Quai è ina giada dapli in dischavantatg per il territori rural, nua ch'in transferiment sin la viafier n'è insumma betg pussaivel.

Sche nus vulain mantegnair plazzas da lavur en las regiuns, alura stuain nus crear las cundiziuns generalas necessarias. Nus stuain er sclerir, quant ferm che la crisa en l'agricultura ed er en autras branschas vegn ad esser influenzada tras las incaricas.

En il preventiv 2001 preschenta la regenza co ch'ils daners duain vegnir impundids. La part anticipada duai vegnir attribuida a las finanzas generalas.

Ils interpellants fan las sequentas dumondas a la regenza:

1. È er la regenza da l'opiniun che spezialmain quellas regiuns che na possedan betg in access a la viafier sentian il pli fitg las consequenzas da la TCPTP?
    2. Co quinta la regenza da far frunt al dischavantatg da las regiuns periferas e na sa laschan ils viadis da vid betg evitar pervia da las pussaivladads mancantas da cumbinar transports?

Cuira, ils 27 da mars 2001

Namen: Battaglia, Telli, Parpan, Bachmann, Barandun, Beck, Capaul, Casanova (Cuira), Casanova (Vignogn), Cavegn, Caviezel, Claus, Conrad, Federspiel, Giovannini, Giuliani, Gross, Hartmann, Heinz, Joos, Kessler, Lardi, Maissen, Märchy, Parolini, Patt, Pedrotti, Peretti, Plozza, Portner, Ratti, Roffler, Schmid (Spleia), Schmid (Val S. Pieder), Thomann, Thöny, Thurner, Walther, Zarro, Zegg

Session: 28.03.2001
Vorstoss: rg Interpellation


Resposta da la regenza

Ina grevezza dals manaschis pitschens rurals tras la TCPTP na sa lascha betg snegar. Pertutgads èn manaschis pitschens en l'entira Svizra. Igl è evident ch'igl è pli difficil d'evitar viadis da vid nungiavischads en il territori vast e pauc populà dal chantun Grischun che giu la Bassa fermamain populada. Tuttina cumbattan las interpresas pitschnas da la Bassa sin quist champ schebain a moda main accentuada cun sumegliants problems. Ina tscherta cumpensaziun per la situaziun difficila da la regiun perifera è qua segiramain la clav da repartiziun dals daners da la TCPTP favuraivla per noss chantun e per tut sias regiuns.

A l'agricultura chaschuna la TCPTP ina grevezza supplementara che na sa lascha betg pli indossar u recuperar uschiglio insaco. Las cundiziuns da producziun dals purs da muntogna èn plinavant sa pegiuradas, uschia ch'igl exista qua in basegn d'agir. Pertutgads èn spezialmain ils transports d'animals sur lungas distanzas, ils lungs viadis per rimnar il latg ed indirectamain er per construir stallas e chasas. Per mitigiar la situaziun duain vegnir impundids en l'avegnir dapli meds chantunals en favur d'ina elavuraziun dal latg e da la charn pli economica pussaivla.

La regenza respunda las dumondas sco suonda:

1. En noss chantun n'èn numerusas valladas betg accessiblas cun la viafier. In transferiment direct dal transport da rauba sin ils binaris n'è pia betg pussaivel. La mancanza d'ina colliaziun da viafier en proxima vischinanza è segiramain in dischavantatg en connex cun la TCPTP, perquai ch'en questas regiuns n'èsi betg pussaivel d'optimar ils custs dal traffic pesant cun transferir quel sin ils binaris. Bleras distanzas èn dentant memia curtas per il transport cun la viafier. Uschia vegnan duvrads camiuns per ina gronda part dals transports regiunals da rauba er suenter l'introducziun da la TCPTP, malgrà ch'igl exista ina colliaziun da viafier. Il criteri decisiv per il dischavantatg da questas regiuns n'è pia da princip betg la mancanza da la colliaziun da viafier, mabain la transibladad da la rait da vias per camiuns resp. il grad da l'avertura da la rait da vias per transports cun camiuns pesants.

2. La regenza ha gia prendì differentas mesiras en favur da las regiuns. Totalmain vegnan attribuids bunamain 45 % dals retgavs da la TCPTP al quint da las vias ed al traffic public regiunal. Uschia na vegn betg mo duvrà l'entir volumen da l'uschenumnada part principala da la TCPTP per intents dal traffic, mabain er ina part da l'uschenumnada part anticipada per las regiuns periferas e da muntogna. En cumparegliaziun: la maioritad dals chantuns obtegna ils meds da la TCPTP exclusivamain da la part principala da la TCPTP. Il november 2000 ha la regenza fixà las limitas da paisa per vehichels a motor sin las vias principalas e da colliaziun. A questa chaschun ha ella concludì ina avertura pli u main cumplessiva da l'entira rait da vias principalas. Perquai èsi uss da far quint che la part anticipada chantunala da la TCPTP vegnia a chalar. Plinavant vegnan a s'augmentar ils custs da mantegniment per nossa rait da vias, uschia che l'avertura pli u main cumplessiva vegn a chaschunar grevezzas supplementaras considerablas per las finanzas dal chantun. La regenza vegn a suttametter al cussegl grond durant la sessiun d'october 2001 in project per reducir sin la media svizra las taglias sin vehichels a motor dals camiuns. Questa mesira duai distgargiar cun cleras finamiras ils transportaders pertutgads da la TCPTP. Finalmain duain vegnir augmentadas las contribuziuns chantunalas agriculas en favur dals manaschis d'elavuraziun da latg e da charn per 500'000 francs en il preventiv 2002. Ina reducziun da quests custs d'elavuraziun pussibiltescha in meglier pretsch dal latg e da la charn als manaschis purils.