Navigation

Inhaltsbereich

Interpellaziun concernent la posiziun dal chantun Grischun sco acziunari da la SAirGroup

Sessiun: 28.03.2001
Il chantun Grischun è acziunari da la SairGroup, tenor infurmaziuns or da las medias cun 10'000 aczias da la SAir. I dat numerus mussaments per il fatg ch'il cussegl administrativ e la direcziun dal manaschi da la SairGroup ha valità a moda sbagliada il futur da l'interpresa. Examinaziuns intensivas vegnan probablamain anc a mussar, sch'i dat anc ulteriuras irregularitads che han chaschunà la crisa da l'interpresa.

Sco acziunari è il chantun Grischun pertutga directamain da questa politica da fatschenta, essend ch'il curs da las aczias è sa sbassà enormamain suenter ch'il fiasco finanzial presumtiv è vegnì conuschent. Ils interpellants supplitgeschan la regenza da respunder las sequentas dumondas:
1. Han ins resguardà correspundentamain en il quint 2000 resp. resguardan ins correspundentamain en il quint 2001 la sbassada dal curs da las aczias? En tge dimensiun sa movan las perditas presumtivas dal chantun Grischun? Vegn eventualmain tratga en consideraziun ina vendita da las aczias?
2. Considerescha la regenza dal chantun Grischun sco gist, co che vasts circuls d'acziunaris han gia annunzià da refusar da preschent la distgargia al cussegl administrativ sco er al post da revisiun da la SairGroup?
3. Considerescha la regenza sco gist da sustegnair la proposta d'in'examinaziun speziala che vegn probablamain inoltrada en occasiun da la proxima radunanza generala?
4. Cun 10'000 aczias tar in volumen d'aczias da circa 13 milliuns è il chantun Grischun plitost in acziunari pitschen. Considerescha la regenza sco raschunaivel da coordinar ils interess dals chantuns e da fixar eventualmain ina strategia communabla en vista a la proxima radunanza generala, suenter che differents ulteriurs chantuns pertutgads considereschan gia mesiras sco p. ex. refusar la distgargia, examinaziun speziala u schizunt plants da responsabladad.


Cuira, ils 26 da mars 2001

Namen: Suenderhauf, Keller, Loepfe, Augustin, Berther (Mustér), Binacotti, Bisculm, Büsser, Cahannes, Capaul, Carisch, Casanova, Cathomas, Crapp, Dermont, Farrér, Federspiel, Giuliani, Lardi, Maissen, Parpan, Pedrotti, Schmid (Sedrun), Schmid (Val S. Pieder), Thurner, Tremp, Tuor (Mustér), Tuor (Trun), Zanolari, Zegg

Session: 28.03.2001
Vorstoss: rg Interpellation


Resposta da la regenza

La regenza observa dapi emnas e cun gronda attenziun ils svilups tar la SAirGroup. Ella deplorescha fitg che questa "interpresa da model" svizra sa chatta en difficultads seriusas. Igl è da sperar che la nova squadra sut la direcziun da Mario Corti saja abla da midar direcziun e da manar l'interpresa puspè en las cifras neras.

Da l'autra vart na fissi betg inditgà per il chantun da reagir a moda smesiraivla en vista a las difficultads da la Svissair. En la strategia d'investiziuns èsi mintatant meglier da "tegnair" empè da "vender". Ina vendia da las aczias n'è da preschent er betg previsa, tant pli che la participaziun dal chantun è da taxar sco pitschna, sco ch'ils interpellants constateschan gistamain. Ultra da quai dattan ils experts d'aviatica malgrà tut bunas schanzas per l'avegnir a la Swissair (cf. artitgel en la SO dals 4-4-2001), uschia ch'ins po presumar ch'er il curs da las aczias vegn puspè a sa remetter.

Tar las dumondas:

1. En il rendaquint 2000 figureschan las aczias da la SAir cun ina valur da bilantscha da fr. 1'660'000.-. Tar in curs d'aczias da fr. 122.- ils 27-4-2001 sa chatta la valur da bilantscha da las aczias bain sur la valur da martgà. Ils 27-3-2001 era il curs dentant anc fr. 193.-. Pervia da questas differenzas enormas ed en vista a las bunas schanzas ch'ins conceda malgrà tut a l'interpresa èsi da preschent difficil da fixar la valur da bilantscha "correcta". En vista al rendaquint 2001 duain ins dentant observar la valur da bilantscha. Da preschent na vegni betg en dumonda da vender las aczias.

2. Avant la radunanza generala ha la confederaziun numnà ina gruppa da lavur, da la quala fa part er il chantun Turitg sco ulteriur acziunari grond dal maun public. Questa gruppa s'occupa dals differents aspects da la procedura pussaivla en il cas da la Swissair. Dapi intgin temp hai dà contacts cun questa gruppa da lavur. Il chantun vegn ad accordar ses cumportament da vuschar a la radunanza generala a quel dal chantun Turitg. En il fratemp èsi conuschent ch'ils acziunaris han pretendì da suttametter la SAirGroup ad in'examinaziun speziala; en consequenza da quai ha il cussegl administativ desistì dad el enor da la distgargia.

3. Sco ch'igl è sa mussà durant la radunanza generala èsi stà necessari a basa da las circumstanzas cumplessivas da sustegnair l'ordinaziun d'ina examinaziun speziala.

4. A la regenza pari da princip raschunaivel sch'ils acziunaris dal maun public coordineschan lur proceder gia a l'entschatta. Ina coordinaziun cun la confederaziun e cun il chantun Turitg ha pia er gì lieu en vista a la radunanza generala dals 25-4-2001, sco gia menziunà. Plinavant è il chantun stà represchentà a questa radunanza generala per pudair s'orientar directamain davart ils ulteriurs pass da la direcziun da l'interpresa e per pudair vuschar en l'interess dal maun public.