Navigation

Inhaltsbereich

Postulat concernent l'offensiva d'internet en las scolas

Sessiun: 28.03.2001
En il rom d'in project per promover las tecnologias d'infurmaziun e communicaziun (TIC) vegn il parlament federal a tractar anc quest onn ina lescha federala. Il project che vegn sustegnì er dals chantuns e da l'economia privata (Swisscom, Apple, IBM, CISCO, Postfinance e Yellowworld) sa cloma „Private Public Partnership - la scola en la rait“.

Sin questa via vul la confederaziun impunder totalmain dapli che 100 milliuns francs repartids sin sis onns, e quai en il senn d'in program d'impuls per la scolaziun e furmaziun dals magisters sco er per promover projects d'integraziun da las TIC en l'instrucziun da tut ils stgalims. Las prestaziuns da las firmas participadas importan ulteriurs 100 milliuns francs.

Essenzialmain sa tracti d'ina gronda reducziun dal pretsch da la colliaziun d'internet, da las taxas currentas, da la hardware (computer) e da la software sco er dals apparats (stampader, scanner, beamer).

En quest pachet da prestaziuns ch'è da chapir sco cumplettaziun da las stentas chantunalas, vegnan resguardadas las suandantas pretaisas sin il sectur da las TIC:

    - Intermediaziun da las TIC per ch'i saja garantida l'egualitad da las schanzas tranter las persunas da domaduas schlattainas e tranter tut las regiuns.
    - Las scolaziuns e furmaziuns supplementaras spezialisadas sin il sectur da las TIC duain correspunder a las pretaisas dal martgà da lavur ed èn da resguardar sco mesiras da pli lunga vista cunter la mancanza actuala da spezialistas e spezialists en la branscha.
    - L'utilisaziun da las TIC cun in accumpagnament pedagogic e reflectà daventa pli e pli ina part indispensabla da l'incarica da la furmaziun en scola.
    - Questa offensiva d'internet è da chapir sco in agid concret cun ina impurtanza per l'economia publica a media ed a lunga vista.

Per che tut ils uffants e giuvenils en la scola populara possian emprender las cumpetenzas da basa necessarias en l'applicaziun dal „spazi virtual“, supplitgain nus la regenza da vulair:

    1. avair en mira la cooperaziun dal chantun Grischun en il project „Private Public Partnership - la scola en la rait“, sche pussaivel gia durant la fasa da pilot;
    2. elavurar e realisar cun prioritad in concept per integrar las TIC en l'instrucziun da tut ils stgalims da la scola populara;
    3. preparar e realisar mesiras accumpagnantas areguard la scolaziun fundamentala, la furmaziun supplementara ed il sustegn da las persunas d'instrucziun;
    4. garantir tras mesiras adattadas la preschientscha da la furmaziun en l'internet e metter a disposiziun las prestaziuns da servetsch d'internet necessarias per la furmaziun;
    5. examinar l'eventuala cooperaziun d'interpresas privatas dal chantun Grischun.

Cuira, ils 27 da mars 2001


Namen: Z a n o l a r i, Berther (Mustér), Farrér, Barandun, Berther (Sedrun), Bisculm, Brasser, Brüesch, Bühler, Büsser, Cahannes, Carisch, Casanova (Cuira), Casanova (Vignogn), Cathomas, Cavegn, Cavigelli, Christ, Claus, Conrad, Crapp, Dalbert, Federspiel, Feltscher, Giacometti, Giovannini, Giuliani, Hanimann, Hardegger, Hess, Joos, Kessler, Koch, Lardi, Loepfe, Märchy, Marti, Montalta, Nick, Parpan, Pedrotti, Pelizzatti, Peretti, Plozza, Portner, Quinter, Rizzi, Robustelli, Roffler, Sax, Scharplatz, Schmid (Sedrun), Schütz, Suenderhauf, Thurner, Tremp, Tuor (Mustér), Tuor (Trun), Walther, Zarro, Zegg, Zindel, Zinsli

Session: 28.03.2001
Vorstoss: rg Postulat


Resposta da la regenza

La regenza è er da l'avis che las tecnologias d'infurmaziun e communicaziun (TIC) sajan da gronda impurtanza spezialmain en il mund da lavur actual e futur ed ella è da princip pronta da prender mesiras per promover l'applicaziun pedagogica da las TIC en la scola populara.

La regenza ha chapì a temp ch'il svilup general sin il sectur da las TIC influenzescha er il svilup da la scola populara. Dapi la mesadad dals onns 80 èn vegnidas realisadas pliras mesiras, particularmain sin il sectur da la furmaziun supplementara dals magisters sco er tras l'introducziun per plan d'instrucziun da la furmaziun da basa en informatica en il stgalim superiur da la scola populara (1993-1997) e davent da 1998 tras la nominaziun da la cumissiun da cussegliaziun per medias ed informatica en la scola populara. Actualmain vegn elavurada la basa pedagogica per l'applicaziun da las TIC en la scola primara, e quai en il project da las classas da pilot per novas medias en l'instrucziun da la scola primara (2000 fin 2002). Sin il sectur d'infrastructura sa stenta la regenza da resguardar ils basegns per in'applicaziun da las TIC en l'elavuraziun actuala da las directivas chantunalas per construcziuns novas e renovaziuns da chasas da scola. La cumissiun per medias ed informatica en la scola populara garantescha la collavuraziun cun auters chantuns sco er il contact cun il project naziunal Private Public Partnership e cun il project Servers Svizzers da Furmaziun.

Il program d'impuls naziunal Private Public Partnership (PPP) e plirs projects chantunals actuals da promoziun (tranter auter SG, VS, VD, FR) documenteschan l'enconuschientscha ch'ulteriuras stentas sajan indispensablas per pussibilitar l'access a l'epoca d'informatica a las scolas. Las mesiras prioritaras en la scola populara dal Grischun per cuntanscher questa finamira èn: la scolaziun dals magisters (en vista a la futura scol'auta professiunala da pedagogia) e la furmaziun supplementara dals magisters, colliaziun cun l'internet da las scolas, applicaziun pedagogica da las TIC en las scolas primaras, optimar ulteriurmain l'integraziun da las novas
medias en l'instrucziun da las scolas dal stgalim superiur, actualisar las infrastructuras necessarias en las scolas. Las aspectativas da cuntanscher ina meglra furma-ziun en las scolas grazia a l'introducziun da las TIC sa basan actualmain en emprima lingia sin ponderaziuns tecnologicas ed economicas.

En vista a l'omnipreschentscha da la publicitad, a la fidaivladad dubiusa da las funtaunas d'infurmaziun sco er a l'enorm dumber da datas, daventa l'abilitad da selec-
ziunar, valitar ed integrar infurmaziuns en las enconuschientschas existentas e segiras il punct cardinal da las incumbensas futuras da la scola. I daventa pia pli e pli impurtant da mussar tge ch'è impurtant e tge betg, tge ch'è dretg e tge fauss e co ch'ins po distinguer l'in da l'auter.

Cun las structuras existentas na sa laschan strusch realisar las stentas spezialas ch'èn necessarias per ademplir questas mesiras, inclusiv la cooperaziun al project naziunal PPP sco er las mesiras necessarias per integrar las scolas grischunas en il server svizzer da furmaziun.

Perquai beneventa la regenza ch'il departament cumpetent numnia ina gruppa da lavur cun las sequentas incumbensas:

1. Elavurar fin il schaner 2002 variantas da concept per l'integraziun da las TIC en l'instrucziun da la scola populara e preschentar concepts da realisaziun en il rom da projects chantunals da promoziun. Ina paisa speziala èsi da dar a la collavuraziun cun ils responsabels per la scolaziun resp. furmaziun supplementara dals magisters.

2. Realisar pli spert pussaivel la cooperaziun dal chantun Grischun al project PPP e preschentar las mesiras necessarias er areguard la cooperaziun d'interpresas privatas dal chantun Grischun.

3. Render accessibla a moda optimala la preschientscha en l'internet e las prestaziuns da servetsch da l'internet a las scolas grischunas e quai spezialmain cun garantir la collavuraziun cun il server svizzer da furmaziun.

Per ademplir questas trais incumbensas èn da far las budgetaziuns correspundentas e la gruppa da lavur sto obtegnair ils meds necessaris.

En il senn da las explicaziuns surmenziunadas è la regenza pronta d'acceptar il postulat.