Navigation

Inhaltsbereich

Dumonda en scrit concernent ils termins da maturitad a la scola chantunala grischuna da l'onn da scola 2002/2003

Sessiun: 28.03.2001
Cun l'introducziun dal RRM sa reducescha il temp da la furmaziun gimnasiala da fin uss 7 onns a 6 onns. Ils students ch'èn da preschent en las tschintgavlas classas gimnasialas èn ils davos che vegnan ad acquistar la maturitad tenor il sistem vegl. Per la fin da l'onn da scola 2002/2003 n'èsi probablamain betg pussaivel da fixar ils examens finals per dus annadas il medem mument.

Fin oz na san ni las scolaras ed ils scolars ni las persunas d'instrucziun, co che l'urari dals examens da maturitad vegn a sa preschentar concretamain. Cunzunt per la planisaziun da la materia d'instrucziun durant ils dus davos onns da scola fissi necessari per tuttas varts da conuscher ils detagls il pli prest pussaivel.

La regenza vegn perquai dumandada:

Co sa preschenta il plan temporal correspundent per ils examens da maturitad da las tschintgavlas resp. quartas classas gimnasialas actualas a la scola chantunala grischuna?

Cuira, ils 27 da mars 2001

Namen: B r a s s e r

Session: 28.03.2001
Vorstoss: rg SchriftlicheAnfrage


Resposta da la regenza

La realisaziun da la refurma da furmaziun 98 chaschuna ch'ins sto organisar l'onn 2003 ina matura dubla a tut las scolas medias grischunas che mainan in gimnasi. Persunas d'instrucziun da la scola chantunala èn engaschads sco experts als examens finals da las scolas medias privatas e commembers da la direcziun da las scolas medias privatas han la funcziun d'experts a la scola chantunala.

La planisaziun dals termins per ils examens finals da l'onn 2003 na dastga perquai betg cumpigliar sulettamain ils termins d'examen da la scola chantunala, mabain ella sto er resguardar quels da las scolas medias privatas. Ils pass da planisaziun correspundents èn gia vegnids fatgs da la conferenza dals recturs gimnasials grischuns. La planisaziun detagliada dals termins per ils examens finals da l'onn 2003 vegn ad esser terminada il fanadur 2001 e las datas correspundentas stattan a disposiziun a las persunas d'instrucziun ed a las scolaras/als scolars.

Per ils examens finals a la scola chantunala èn previsas las sequentas datas d'examen, resguardond las cundiziuns da basa menziunadas:
Examens da maturitad da la scolaziun da tschintg resp. set onns (tenor l'ordinaziun davart la renconuschientscha da la maturitad ORM)
examens en scrit: 10 da mars - 17 da mars 2003
examens a bucca: 14 d'avrigl - 17 d'avrigl 2003

Examens da maturitad da la scolaziun da quatter resp. sis onns (tenor l'ordinaziun davart la renconuschientscha da la maturitad ORM)
examens en scrit: 2 da zercladur - 6 da zercladur 2003
examens a bucca: 30 da zercladur - 4 da fanadur 2003

Ils examens finals per la scolaziun da tschintg resp. set onns han pia lieu in pau pli baud che usità. Cun quai ch'ils termins d'examen vegnan ad esser conuschents il fanadur 2001 per tut las scolas medias pon ins adattar l'intermediaziun da la materia d'instrucziun durant ils davos dus onns da scola avant la maturitad.