Navigation

Inhaltsbereich

Interpellazion concernent il stadi da l'hotellaria en il Grischun

Sessiun: 30.05.2001
Fin la fin 2001 sto il cussegl federal preschentar in nov concept davart la promoziun dal turissem e da l'hotellaria. Il studi incumbensà dal seco (secretariat da stadi per l'economia) dat in nausch maletg da l'hotellaria svizra:
    - Surdebitaziun problematica; la quota da l'agen chapital munta a 10 %.
    - La productivitad da l'hotellaria svizra è flaivla.
    - Tenor las bancas grondas perda ca. 1/3 dals credits a l'hotellaria valur.
    - L'occupaziun da las chombras è miserabla en cumparegliaziun cun la UE.

Las bancas da lur vart han midà lur politica da credits. Decisiva è la valur d'interpresa d'in manaschi e betg pli principalmain la valur da l'immobiglia.

Ils 15 da december 2000 è vegnì inoltrà il postulat Strahm che vul abrogar la tariffa speziala da taglia sin la plivalur per l'hotellaria sin la fin da 2003 e duvrar ils daners che vegnan libers tras quai per far ina offensiva da qualitad e per meglierar las structuras en l'hotellaria.

Quests facturs han baud u tard per consequenza ch'il martgà n'è betg pli bun da finanziar ils hotels. L'hotellaria en furma da manaschis pitschens e mesauns, tipica per la Svizra, n'ha betg la pussaivladad da meglierar sia structura da chapital sur ils martgads da chapital publics. Plinavant han las fluctuaziuns nunprevisas en il turissem per consequenza che las bancas grondas stiman ina ristga pli auta.

Sin fundament da questa situaziun vulessan ils interpellants savair da la regenza:

    1. Co è la situaziun en il chantun Grischun?
    2. Tge posiziun ha la regenza envers la nova finanziaziun dals hotels tras la confederaziun?
    3. Tge consequenzas avess la realisaziun dal postulat Strahm per l'hotellaria en noss chantun?

Cuira, ils 30 da matg 2001

Namen: Bischoff, Walther, Jeker, Bachmann, Bär, Barandun, Brüesch, Bühler, Büsser, Butzerin, Cahannes, Capaul, Casanova (Cuira), Casanova (Vignogn), Catrina, Cavegn, Caviezel, Cavigelli, Christ, Christoffel, Claus, Conrad, Dalbert, Dermont, Feltscher, Giovannini, Giuliani, Godly, Gross, Hanimann, Hardegger, Hess, Hübscher, Joos, Juon, Kehl, Kessler, Kollegger, Lemm, Loepfe, Luzio, Marti, Nick, Parolini, Parpan, Pleisch, Portner, Rizzi, Robustelli, Sax, Schmid (Sedrun), Schmid (Spleia), Suenderhauf, Suter, Telli, Thomann, Tramèr, Tuor (Mustér), Tuor (Trun), Vetsch, Wettstein

Session: 30.05.2001
Vorstoss: rg Interpellation


Resposta da la regenza

1. Ils problems da l'hotellaria en il Grischun èn da princip ils medems sco en l'entira Svizra. Surtut sa tracti da resultats da gestiun nuncuntentaivels, d'ina pitschna occupaziun dals letgs, da pitschens manaschis, da memia pauc agen chapital e d'in basegn da recuperar investiziuns. Las investiziuns necessarias na pon savens betg vegnir finanziadas, perquai che las bancas na resguardan betg pli la valur d'investiziun dal bain immobigliar sco basa per conceder credits, mabain la valur da la rendita da l'interpresa ch'è savens pli bassa.

2. La finanziaziun da fin uss dals hotels tras la confederaziun n'ha betg pudì evitar ch'èn resultads e s'accentuads ils problems ch'èn vegnids preschentads. Perquai èsi gist da tschertgar novas vias.

Il cussegl federal vegn probablamain a s'occupar anc quest onn da la revisun da la lescha davart credits a l'hotellaria. Tenor las infurmaziuns dal secretariat da stadi per l'economia (seco) vulan ins render (puspè) attractiva l'hotellaria per investurs. Cumbinà cun quai vulan ins promover la midada da structura. Ins duai sustegnair surtut manaschis ch'han ina buna rendita, ma che disponan da memia pauc agen chapital. Il surpli da chapital ester duai vegnir substituì tras chapital da ristga a cundiziuns supportablas. La confederaziun spetga ch'ulteriurs partenaris sa participeschian per finanziar questa schliaziun.

La novaziun previsa para da princip utila a la regenza. Ins na dastga betg survesair che la rectificaziun da structura ch'ins vul cuntanscher vegn er a pertutgar manaschis en noss chantun. Ina valitaziun definitiva vegn ad esser pussaivla pir cur ch'il cussegl federal vegn ad avair suttamess sias propostas als chantuns per prender posiziun.

3. Ina realisaziun dal postulat Strahm avess consequenzas positivas e negativas per la hotellaria dal Grischun.

Sco fatg positiv giuditgain nus il diever cun cleras finamiras dals meds federals en favur d'ina offensiva da la qualitad, p.ex. sin il sectur da la scolaziun e da la furmaziun supplementara sco er per meglierar la structura. In fatg negativ fiss la finanziaziun previsa da questas mesiras cun desister da la tariffa speziala en la taglia sin la plivalur. La tariffa speziala resguarda las prestaziuns d'export en l'hotellaria ed è giustifitgada en il senn d'in tractament egual cun autras branschas economicas. L'abrogaziun da la tariffa speziala augmentass il pretsch da las purschidas en l'hotellaria e pegiurass sia cumpetitivitad. Perquai refusescha la regenza cleramain l'abrogaziun da la tariffa speziala.