Navigation

Inhaltsbereich

Dumonda en scrit concernent la via da velos en il Schin

Sessiun: 30.05.2001
La Svizra sco cuntrada da velos posseda in bun concept per vias da velos che pussibilitescha da viagiar per velo tras l'entira Svizra. Er il Grischun sco chantun da turissem profitescha segir e franc da quai. Igl è dentant difficil da manar quellas rutas tras la regiun da muntogna.
La ruta 6, ruta dal Grischun, maina tranter auter er tras il Schin, e quai per lung da la via principala. Il velocipedist sto traversar dus tunnels: Passmal (425 m) e Solas (1142 m). Il velocipedist n'ha nagin'autra pussaivladad che da duvrar l'ur dretg dal vial. Ultra da quai è l'illuminaziun fitg flaivla.
Ins na po betg excluder ch'er famiglias cun uffants circuleschan sin questa ruta. Sin il sectur dals tunnels è il privel tschertamain pli grond.
Per lung dals tunnels sa chattan da domaduas varts passapes che fissan er adattads sco vias da velo. Deplorablamain vargan or las chaschas da SOS gist en quest sectur dals passapes, uschia ch'igl è privlus da passar là cun il velo.

Jau vuless far las suandantas dumondas a la regenza:

1. Pudessan ils passapes en ils tunnels er vegnir signalisads sco vial per velos?
2. Fissi pussaivel d'integrar ils elements che vargan or a medem nivel en la paraid dal tunnel?
3. Po il passape eventualmain vegnir schlargià in pau sin donn e cust dal vial?
4. Na fissi betg raschunaivel da marcar l'ur dal passape tras ina lingia alva?

Cuira, ils 30 da matg 2001

Namen: Frigg

Session: 30.05.2001
Vorstoss: rg SchriftlicheAnfrage


Resposta da la regenza

Tenor las directivas per stabiliments da traffic da velos munta la largezza minimala d'in vial da velo resp. d'ina via da velo ad 1.00 m, quai dentant sulettamain sut la premissa d'in spazi liber da las varts da mintgamai 50 cm e d'ina egualitad dal nivel dals vials. Ils banchets existents elevads en ils tunnels Passmal e Solas han dentant
ina largezza che na cuntanscha mintgatant gnanca 80 cm. Las dimensiuns necessarias per motivs da la tecnica da segirezza per in'utilisaziun sco vial da velo na vegnan pia lunschora betg cuntanschidas. Da questas explicaziuns resulta:

    1. Per ponderaziuns da segirezza na dastgan ins sut naginas circumstanzas promover u schizunt prescriver cun ina signalisaziun da charrar sin ils banchets elevads en ils dus tunnels, quai pervia da la largezza insuffizienta e l'ur privlus dal banchet.
    2. Per questa raschun na pon e na dastgan ins betg render pli attractiva l'utilisaziun dals banchets privlus per velocipedists tras meglieraziuns architectonicas sco p. ex. allontanar las chaschas da SOS e signals e.u.v.

    3. I n'è tecnicamain betg pussaivel da sbassar ils banchets. Er in schlargiament a donn e cust dal vial na sa lascha betg realisar, perquai ch'il profil existent dal spazi a disposiziun dal vial na posseda naginas reservas e na dastga betg vegnir restrenschì, quai spezialmain en vista al dumber creschent da camiuns e cars pli lads.

    4. L'ur dal vial è gia uss marcà en domadus tunnels cun colur alva. Ultra da quai è la part verticala dals urs dal banchet marcada cun alv. Per ils motivs gia menziunads pon ins perquai desister d'in'ulteriura marcaziun sin il banchet.

Gia a l'entschatta han tut ils participads considerà il traject tranter Tusaun e Casti da la ruta svizra d'ir cun velo nr. 6 gia a l'entschatta sco critic pervia da las largezzas limitadas da las vias. Deplorablamain na devi e na datti anc adina nagina colliaziun alternativa valaivla. A Tusaun ed a Casti vegn renvià cun signals spezials sin las relaziuns criticas e recumandà da chargiar ils velos en il tren. L'illuminaziun en ils tunnels Solas e Passmal che vegn taxada sco plitost insuffizienta è vegnida renovada durant ils ultims dus onns correspundentamain a las pretensiuns actualas, quai che ha per consequenza che l'illuminaziun è oz considerablamain meglra che pli baud.

Fin uss n'han ins per fortuna stuì registrar nagins accidents da velocipedists en il tunnel. La regenza vegn dentant ad observar vinavant il problem dals velocipedists en il Schin.