Navigation

Inhaltsbereich

Sessiun: 30.05.2001

La nova legislaziun en vigur davart las acquisiziuns publicas e las consequenzas dals contracts bilaterals tranter la Svizra e l'Uniun europeica han sfurzà tut nossas interpresas d'agir en in ambient d'ina concurrenza creschenta e da pli gronda cumpetitivitad.

L'incumbensa dal stadi sa restrenscha en quest connex a la fixaziun da reglas transparentas e chapaivlas per garantir la surdada da las lavurs al meglier offerent.

Per che quest mecanissem funcziunia èsi dentant necessari che la documentaziun da las offertas vegnia survegliada permanentamain e saja fatga da maniera che mintga concurrent possia sa participar.

L'ultim temp nun èsi adina stà pussaivel da far quai per il sectur da la furniziun da material. Tants auturs da project incumbensads dal chantun excludan tar la glista d'offertas ils materials grischuns e svizzers prevesan il diever exclusiv da material ester. Independentamain dal pretsch na vegnan quests materials a priori betg resguardads.

Quai è per exempel stà il cas tar la sanaziun da la clinica psichiatrica Beverin nua ch'ins ha pretendì per las cuvridas da funs da crap natiral ch'i vegnia duvrà obligatoriamain plattamorta Porto (serizitphyllit da Calongo/Portugal). Uschia han ins cun il conlcus da l'autur dal project e senza examinaziun da vart dal patrun da construcziun, numnadamain dal chantun Grischun, excludì ils craps natirals dal Grischun e da la Svizra.
Per evitar en il futur tals eventiments deplorabels che fan donn a l'economia grischuna e svizra, preschent jau las sequentas dumondas a la ludaivla regenza:

1. È la regenza pronta d'introducir ina procedura da controlla preliminara da quellas offertas che vegnan preparadas dals auturs externs da project per examinar sche las normas da tractament egual dals interprendiders grischuns e svizzers vegnian respectadas?
2. È la regenza pronta d'obligar ils auturs externs da project tras ils contracts da mandat da duvrar almain sco alternativa ils materials grischuns e svizzers da la medema qualitad?

Cuira, ils 30 da matg 2001

Namen: Keller, Zarro, Lardi, Conrad, Geisseler, Giovannini, Giuliani, Gross, Loepfe, Parolini, Peretti, Plozza, Quinter, Righetti, Schmid (Sedrun), Tuor (Trun), Zanolari

Session: 30.05.2001
Vorstoss: rg Interpellation


Resposta da la regenza

Tar las acquisiziuns publicas na dastgan incumbensas da princip betg vegnir circumscrittas cun specificaziuns tecnicas che cuntegnan impediments tecnics nun-giustifitgads per il commerzi. Igl è perquai inadmissibel da formular las pretaisas da maniera che products indigens u da l'exteriur u tscherts offerents vegnan u discriminads u privilegiads. Pretaisas concernent tschertas marcas commerzialas u tscherts nums commerzials, patentas, musters u tips sco er concernent ina tscherta derivanza u in tschert producent n'èn da princip betg admissiblas, nun ch'i n'exista nagina descripziun suffizientamain exacta e chapaivla dal basegn d'acquisiziun e sch'i vegnan includids en la documentaziun d'attribuziun ils pleds "u equivalents" (mira
art. 18 al. 2 DERtCIAP, art. 9 al. 1 Osub).

La pretaisa ch'i saja vegnì pretendì da duvrar obligatoriamain la plattamorta Porto tar la sanaziun da la clinica psichiatrica Beverin sto vegnir precisada. Il concept general artistic dal project elegì definitivamain en il rom d'ina concurrenza è sa basà sin il diever da sablun da plattamorta e tavlas da plattamorta. Ultra da quai èsi da dir che las disposiziuns spezialas duvradas da l'uffizi da construcziun auta dal chantun tar mintga acquisiziun rendan explicitamain attent al fatg ch'i stat liber als purschiders d'offrir er products da concurrenza equivalents en cas che las glistas da prestaziun inditgeschan gia ils nums dals products ch'èn da duvrar resp. ils furniturs. La remar-
tga concernent la plattamorta Porto, fatga en la glista da prestaziun en dumonda, ha pia sulettamain inditgà las caracteristicas da qualitad da las cuvridas da funs or da crap natiral ch'eran da furnir. Tenor la documentaziun da publicaziun e las reglas per l'acquisiziun fissi senz'auter stà admissibel d'offrir plattamorta equivalenta d'autra derivanza. La regenza deplorescha bain ch'ins n'ha betg retschavì plattamorta adattada da provenienza svizra en il preschent cas. Dal puntg da vista giuridic na fissi dentant betg stà giustifitgabel da betg realisar il project che la giuria nominada aveva a ses temp recumandà per la repassada.

A basa da questas explicaziuns pon ins respunder las dumondas concretas sco
suonda:

    1. La regenza renconuscha da princip la significaziun e la necessitad da promover materials indigens. En la glisch da la nova basa legala per las acquisiziuns publicas pon ins realisar quests giavischs - sche insumma - be anc a moda fitg restrenschida.

Grazia a la protecziun legala concedida garanteschan las novas prescripziuns da submissiun suffizientamain che tut ils offerents pon sa participar a la concurrenza cun schanzas identicas e ch'els han access liber al martgà senza vegnir discriminads. Per quest motiv considerescha la regenza sco betg inditgà d'introducir ina procedura preliminara speziala per examinar sch'il princip dal tractament egual vegnia observà.

    2. A basa da las reglas existentas per l'acquisiziun sa chapeschi da sasez ch'i stettia liber als offerents da pudair far amogna materials equivalents grischuns e svizzers, schizunt sche quai na duess betg esser menziunà expressivamain en la documentaziun da publicaziun. Per quest motiv n'èsi er betg necessari d'intimar ils auturs externs da project mintgamai tras contract da far diever sco alternativa dals materials grischuns e svizzers da medema qualitad.