Navigation

Inhaltsbereich

Dumonda en scrit concernent la transparenza da las pajas e dals bonus en las structuras directivas da la banca chantunala grischuna

Sessiun: 31.05.2001
Durant l'ultim temp han ins adina puspè discutà davart las pajas dal cader e surtut davart ils bonus ch'èn daventads moda.

En il temp odiern vegn pretendì transparenza, surtut en instituziuns dal dretg public sco la banca chantunala grischuna.

En il chantun Turitg han ins creà dacurt publicitad e transparenza concernent las pajas ed ils bonus.

Malgrà che jau hai dumandà duas giadas il president dal cussegl da banca da la banca chantunala grischuna hai jau deplorablamain be obtegnì ina resposta insuffizienta sin mia dumonda respectiva, insumma nagina resposta sin insaquantas dumondas decisivas, sin autras dumondas hai dà be respostas pauc precisas. Jau sun perquai sfurzà da far anc ina giada mias dumondas a la regenza cun agid da questa dumonda en scrit, perquai ch'ellas èn d'interess public tant en il Grischun sco er a Turitg, e supplitgesch da ma respunder correspundentamain.

1. Ha la banca chantunala grischuna durant ils davos onns er pajà or participaziuns al success en il senn da "bonus"?

2. Tge summa totala en francs è mintgamai vegnida impundida per quest intent durant ils davos 5 onns?

3. Co è la summa vegnida repartida proporziunalmain tranter il cussegl da banca, il directori, il cader e las collavuraturas ed ils collavuraturs "ordinaris"?

4. Tge contribuziuns (part da la paja e bonus) èn vegnids conderschids al president dal cussegl da banca, als commembers dal cussegl da banca (inclusiv indemnisaziuns per lavurs en la giunta dal cussegl da banca), al directori ed al cader superiur?


Namen: Trepp

Session: 31.05.2001
Vorstoss: rg SchriftlicheAnfrage


Resposta da la regenza

La dumonda en scrit ha la finamira da palesar las participaziuns al success ch'èn vegnidas pajadas als collavuraturs ed a las collavuraturas da la banca chantunala grischuna (BCG) ed ils salaris che quels retiran.

Giuridicamain sa differenziescha considerablamain il duair d'infurmaziun davart ils cuntegns dals contracts da lavur da las differentas categorias da collavuraturs da la BCG. Sco organ ch'elegia il cussegl da banca (art. 23 da la lescha davart la banca chantunala grischuna LBCG) ha il cussegl grond senz'auter il dretg da s'infurmar davart l'indemnisaziun dals commembers dal cussegl da banca. El ha gia fatg diever da quel dretg avant intgins onns - anc tenor las statutas valaivlas da lez temp - (mira dumonda en scrit Schütz concernent la lavur e l'indemnisaziun dal cussegl da banca da la BCG, sessiun d'october 1996, e la resposta da la regenza).

Las infurmaziuns davart la salarisaziun da las collavuraturas e dals collavuraturs che lavuran en il sectur operativ (commembers da la direcziun, collavuraturs da cader ed auters) da la BCG èn dentant in'autra chaussa. Tut tenor il stgalim vegnan quels collavuraturs engaschads da differentas instanzas; i sa chapescha che la fixaziun da la paja tutga er adina tar l'engaschament. Tenor l'art. 13 al. 3 LBCG elegia il cussegl da banca ils commembers da la direcziun sco er il manader dal post da revisiun intern. I cumpeta pia al cussegl da banca da fixar ils salaris e las indemnisaziuns da quests collavuraturs. Schefs da secziun, collavuraturs da cader ed ulteriuras collavuraturas ed ulteriurs collavuraturs vegnan engaschads, tut tenor lur posiziun, da la direcziun, dal chau d'ina secziun, d'ina persuna responsabla per ina regiun e.u.v.

Decisiv èsi en quest connex che la BCG è ina instituziun independenta dal dretg public chantunal che n'è betg suttamessa a l'ordinaziun dal persunal (OP) dal chantun (art. 1 a OP), cuntrari ad autras instituziuns independentas sco p. ex. l'institut d'assicuranzas socialas u l'institut d'assicuranza d'edifizis. L'engaschament dals collavuraturs da la BCG succeda a basa da las disposiziuns dal DO ed è pia da caracter da dretg privat.

Sco resumaziun resorta ch'il cussegl grond sco organ electoral po prender conuschientscha da l'indemnisaziun dals commembers dal cussegl da banca e ch'el ha gia fatg quai pli baud. Il cussegl da banca da sia vart examinescha en sia funcziun sco organ suprem da surveglianza davart la politica da fatschenta (art. 13 al. 1 LBCG) l'urden da salaris e la politica da bonus da la BCG en general e la salarisa-
ziun dals commembers da la direcziun en spezial. La salarisaziun dals ulteriurs commembers da la BCG perencunter è ina incumbensa operativa ed è aschia da princip chaussa da la direcziun da la banca. Sco cumplettaziun saja be anc menziunà il fatg che - cuntrari a las allusiuns en la dumonda en scrit - er a Turitg n'èn betg vegnids publitgads ils salaris ed ils bonus da las collavuraturas e dals collavuraturs da la banca chantunala che lavuran en il sectur operativ.
La BCG ha palesà a la regenza la moda e maniera da l'indemnisaziun da ses collavuraturs da tut ils stgalims ed ha uschia pussibilità cumparegliaziuns cun ils salaris e bonus che vegnan pajads en la branscha da bancas.

Las dumondas pon vegnir respundidas sco suonda:
1. Gea, en ils onns 1999 e 2000.
2. Totalmain 5,2 milliuns francs.
3. La repartiziun tranter las differentas categorias da collavuraturs da la BCG sa drizza tenor las incumbensas, la responsabladad, la cumpetenza directiva ed ulteriuras caracteristicas objectivas da las differentas funcziuns sco er tenor la prestaziun. Tut las categorias da collavuraturs han pudì giudair participaziuns al svilup. La repartiziun proporziunala sa mussa absolutamain sco realisabla e raschunaivla.
4. La participaziun al success è muntada l'onn 2000 a 30'000 francs per il president da la banca, 18'000 francs per il vicepresident da la banca e 12'000 francs per ils commembers dal cussegl da banca. Concernent las ulteriuras indemnisaziuns dals commembers dal cussegl da banca (fixum e schurnada) pon ins renviar da princip a la dumonda en scrit Schütz da l'october 1996 ch'è gia vegnida menziunada. Quellas cifras valan anc adina, cun duas excep-ziuns. L'indemnisaziun fixa als commembers dal cussegl da banca è vegnida augmentada da 20'000 francs a 25'000 francs, la schurnada è vegnida augmentada per 50 francs. Las indemnisaziuns dal directori e dal cader superiur da la BCG sa chattan en il rom da las valurs medias usitadas en Svizra. Ins sa perquai constatar ch'ils salaris e bonus che vegnan pajads en il Grischun n'èn betg exagerads en cumparegliaziun cun indemnisaziuns conuschentas en auters chantuns e tar bancas organisadas tenor dretg privat.