Navigation

Inhaltsbereich

Moziun concernent las contribuziuns da manaschi e da lieu

Sessiun: 31.05.2001
a la scol'auta teologica Cuira

Ils certificats finals da la scol'auta teologica Cuira (SAT) vegnan renconuschids publicamain dapi 25 onns dal chantun Grischun. En il rapport da la cumissiun da gestiun dal cussegl grond 1999/2000 vegni constatà (p. 26) che la regenza observa sia obligaziun da surveglianza envers la SAT e ch'ils certificats da la SAT pon vegnir renconuschids publicamain er en il futur. Perencunter vesa la CdG in privel per Cuira sco instituziun da scolaziun teologica, e quai pervia dal regress dal dumber da students.

Il fanadur 2000 ha il cussegl da l'uvestg orientà che la scolaziun teologica a la SAT duaia succeder tenor in nov concept che dat l'accent a l'orientaziun pastorala per mantegnair la qualitad academica, a moda ch'il studi a la SAT vegn a daventar spezialmain attractiv per futurs collavuraturs en la pastoraziun. Il medem mument ha il cussegl da l'uvestg rinvià al fatg che la premissa per cuntinuar cun l'instrucziun a la SAT saja ina situaziun finanziala solida, e che la garanzia dal deficit annual stoppia esser segirada. Per garantir ina vasta e constanta prontezza da sustegnair la SAT èn entradas numerusas donaziuns da persunas privatas sco er contribuziuns da pravendas, cumins-baselgia, da la baselgia chantunala sco er da la fundaziun „Amitgs da la SAT“ stabilida per quest intent. Entant ch'il chantun Grischun presta als chantuns cun in'universitad contribuziuns annualas vi dals custs da scolaziun da ses abitants via la cunvegna interchantunala davart las universitads (CIU), manca a la SAT che scolescha bain sin in nivel universitar, ma che n'è betg suttamessa al champ d'applicaziun da la CIU, fin uss la pussaivladad d'obtegnair contribuziuns chantunalas.

En vista a la normalisaziun da las relaziuns en l'uvestgieu ed en renconuschientscha da las grondas stentas da la SAT per augmentar il dumber da students tras ina offerta attractiva da studi che stat averta er per commembers d'autras confessiuns, sto il chantun esser en il cas da sustegnair la finanziaziun da la SAT a Cuira sco lieu universitar tras contribuziuns da manaschi e da lieu.

Perquai vegn la regenza giavischada d'elavurar la basa legala per la prestaziun da contribuziuns da manaschi u da lieu a la SAT e da la preschentar al cussegl grond.

Cuira, ils 31 da matg 2001

Namen: Suenderhauf, Geisseler, Augustin, Arquint, Barandun Berther (Mustér), Berther (Sedrun), Biancotti, Brüesch, Büsser, Cahannes, Capaul, Casanova (Vignogn), Cathomas, Cavegn, Caviezel, Cavigelli, Conrad, Crapp, Demarmels, Dermont, Farrér, Federspiel, Feltscher, Frigg, Giuliani, Jäger, Jenny, Juon, Keller, Koch, Lardi, Locher, Loepfe, Luzio, Maissen, Marti, Nick, Noi, Parpan, Peretti, Portner, Quinter, Righetti, Sax, Schmid (Sedrun), Schmid (Spleia), Schmid (Val S. Pieder), Schmutz, Stiffler, Thomann, Tremp, Tuor (Mustér), Tuor (Trun), Walther, Zanolari, Zegg, Zindel, Zinsli

Session: 31.05.2001
Vorstoss: rg Motion


Resposta da la regenza

Dapi 1976 renconuscha il chantun Grischun ils certificats finals da la scol'auta teologica Cuira (SAT). Sco basa serva l'ordinaziun davart la renconuschientscha publica dals certificats da la SAT (DG 427.700) ch'il cussegl grond ha decretà il medem onn. Tant 1995 sco er 2000 ha la regenza examinà manidlamain l'adempliment da las premissas per la renconuschientscha tras la SAT. Cun conclus dal 1. da favrer 2000 ha ella constatà che la qualitad da la scolaziun e las premissas per la renconuschientscha publica sajan garantidas tras la SAT e ch'i saja impurtant per la regenza che la SAT existia vinavant e ch'ins mantegnia la renconuschientscha publica dals certificats finals. Dapi 1999 rapporta il rectorat da la SAT en intervals regulars ed a moda detagliada davart la scol'auta e davart sias persunas d'instrucziun. Quellas sa cumponan d'ina professuressa e set professers sco er da differents professers ospitants, professers onuraris e docents. Uschia han ins pudì reglar a moda correcta ed a cuntentientscha da domisduas varts las dumondas davart la qualitad da la scola-ziun e da la dimensiun da l'influenza publica concernent la renconuschientscha dals certificats finals. I dat dentant dus problems che ston vegnir schliads per segirar la SAT: Il pitschen dumber da students, numnadamain 21 durant l'onn da studi 2001, dals quals 10 derivan da l'exteriur, e la finanziaziun da la scol'auta. La situaziun midada en l'uvestgieu, mesiras persunalas sco er surtut concepts da studi reponderads che han sco model ina scolaziun cumplessiva per la pastoraziun duain gidar en il futur a render pli attractiva la scol'auta als students.

La finanziaziun da la SAT succeda tras la fundaziun seminari da spirituals Son Luzi. Las entradas da questa n'èn betg pli stadas suffizientas durant ils davos onns per cuvrir las expensas da la scol'auta. Essend che privats, differentas instituziuns ecclesiasticas sco er la fundaziun "Amitgs da la SAT", fundada l'onn 2000 per quest intent, pajan contribuziuns considerablas vi dal deficit annual, considerescha la regenza er sco adequat da pajar contribuziuns annualas, quai sin dumonda ed en ina dimensiun limitada. La basa legala necessaria po vegnir creada tras l'adattaziun da l'ordinaziun existenta dal cussegl grond. A medem temp èn da fixar las cundiziuns da basa per la concessiun da las contribuziuns. La limita superiura da las contribuziuns annualas è da fixar maximalmain aschia ch'ella, en applicaziun da l'art. 15 al. 4 construcziun 2 da la constituziun chantunala, croda en la cumpetenza definitiva dal cussegl grond.

En vista a la situaziun finanziala precara dal chantun sco er da la finamira da limitar la creschientscha da las contribuziuns a terzs na pon ins betg approbar senz'auter ina subvenziun da la SAT. La regenza sustegna en quest connex las stentas da la SAT d'obtegnair contribuziuns a basa da la lescha per promover las universitads u a basa da la cunvegna interchantunala davart las universitads. Per quest intent èn dentant necessaris in augment considerabel dal dumber da students sco er l'introducziun d'ina administraziun da la scol'auta cun atgna contabilitad. In sustegn finanzial da la SAT n'è previs ni en il program da la regenza ni en il plan da finanzas 2001 - 2004. La SAT cumplettescha dentant Cuira sco lieu da scol'auta che dispona tras quai da purschidas en ils secturs tecnica, economia, teologia ed a partir da 2003 er pedagogia.

En il senn da las explicaziuns precedentas è la regenza pronta d'acceptar la moziun.