Dumonda en scrit concernent las immissiuns da canera e l'impestaziun da l'aria en la Mesolcina
Sessiun: 01.06.2001
Ils davos onns èn il traffic lev ed il traffic pesant per lung da l'axa da la A 13 s'augmentads permanentamain. Il traffic pesant è s'augmentà per 5 % durant ils onns 1998 - 2000. In'excepziun è l'emprim quartal da l'onn 2001, en il qual è sa diminuì il traffic pervia da las grondas navadas sin il traject tranter Tusaun e Lostallo.
Vers la fin da la primavaira e l'entschatta da la stad (spezialmain durant las fins d'emna da Pasca, Ascensiun e Tschuncaisma ed er durant ils mais da zercladur, fanadur ed avust) èn las colonnas da kilometers daventadas la regla sin quest traject. La fin d'emna passada d'Ascensiun han cuntanschì las colonnas sin la A 13 mintgatant ina lunghezza da bunamain set (7) kilometers. En cumparegliaziun cun l'onn 2000 s'ha il traffic augmentà per 16 milli vehichels (passa 25 % en cumparegliaziun cun l'onn precedent). Questa situaziun provochescha ina gronda malcuntentientscha tar la populaziun da las vischnancas per lung da l'axa da la A 13 en la Val Mesauc (spezialmain a Mesauc) e pliras parts pretendan d'examinar la situaziun e d'intervegnir per reducir las immissiuns sin in minimum. Ils pli gronds quitads a la populaziun fan las immissiuns da canera e l'impestaziun da l'aria.
En vista a questa situaziun dumandain nus la regenza:
1. Qualas mesiraziuns èn vegnidas fatgas fin oz e qualas èn previsas per examinar permanentamain las immissiuns da canera e l'impestaziun da l'aria en la Val Mesauc?
2. Èsi previs da prender mesiras d'infrastructura o d'autra natira a curta ed a media vista?
Cuira, il 1. da zercladur 2001
Namen: Righetti, Zarro, Noi, Cahannes, Luzio, Peretti, Zanolari
Session: 1.06.2001
Vorstoss: rg SchriftlicheAnfrage
Resposta da la regenza
Ils resultats dals dumbraders automatics dal traffic mussan per il temp enturn Ascensiun 2001 vairamain in augment evident. Sch'ins cumpareglia dentant il svilup dal traffic durant ils dis da festa Pasca, Ascensiun e Tschuncaisma cun agid dal dum-
brader automatic a Roveredo durant l'interval dals ultims sis onns, alura na pon ins betg discurrer d'in augment general annual dal traffic. Il dumber da vehichels per la perioda da Pasca 2001 sa chatta per exempel cleramain sut las valurs dals dus onns precedents. Er da Tschuncaisma 2001 na pon ins betg discurrer da frequenzas extraordinarias. En general pon ins constatar ch'il volumen dal traffic durant quels dis da festa dependa fermamain da las relaziuns da l'aura e da las prognosas da colonnas per l'axa dal Gottard. La valur extrema da l'Ascensiun 2001 è vegnida chaschunada cun fitg gronda probabilitad da la colonna da camiuns sin la A2 e dals rapports correspundents tras las medias.
1. L'immissiun da substanzas nuschaivlas en l'aria a Roveredo vegn mesirada dapi 1992 cuntinuadamain en vischinanza directa da la A13. La valitaziun vegn fatga mintg'onn en il rapport "Examinaziuns da l'igiena da l'aria en il chantun Grischun" da l'uffizi per l'ambient che vegn mintgamai tramess tranter auter er a tut las vischnancas ed a tut ils deputads. Ina cumparegliaziun da la grevezza d'oxids da nitrogen dals ultims onns mussa ina tendenza regressiva ch'è surtut d'engraziar a l'effect da las prescripziuns davart las svapurs per vehichels a motor.
Las immissiuns da canera vegnan survegliadas via la mesiraziun da las frequenzas dal traffic cun dumbraders automatics a Roveredo e San Bernardino ch'èn gia dapi onns en funcziun. In monitoring spezial da la canera per la durada da plirs onns per la A13 vegn stgaffì anc quest onn en Tumleastga. Ils resultats vegnan a permetter conclusiuns er per il svilup en la Mesolcina.
2. Las immissiuns da traffic, resp. la capacitad da traffic sin la A13 sco chaschunadra da las emissiuns da canera e d'aria na dastga da princip betg vegnir reducida tras mesiras architectonicas. Tenor la constituziun federala èsi da l'autra vart scumandà d'augmentar las capacitads da las vias che traversan las Alps. Grazia a la sanaziun architectonica da la A13 che vegn a durar anc pli che 10 onns, durant ils proxims onns cunzunt er pervia da la sanaziun dal tunnel dal San Bernardin, èsi da quintar a media vista cun impediments considerabels dal traffic da transit. Ins po supponer che quai vegnia ad influenzar il svilup dal traffic a moda restrictiva. Ultra da quai n'è la via betg adattada per il traffic cun camiuns pesants, in fatg ch'impedescha in transferiment essenzial dal traffic p. ex. dal Gottard sin la ruta dal San Bernardin.
Tar la projectaziun e la realisaziun da las lavurs da cumplettaziun e da sanaziun vegn resguardà l'observanza da las valurs da limita decisivas tenor la legislaziun concernent la protecziun da l'ambient ch'è da preschent en vigur.