Navigation

Inhaltsbereich

Interpellaziun concernent l'onn dals voluntaris 2001 declerà da la ONU

Sessiun: 01.06.2001
En sia 52avla radunanza generala han las naziuns unidas declerà l'onn 2001 sco onn internaziunal dals voluntaris. La ONU tegna quint dal fatg ch'ils voluntaris en l'entir mund gidan considerablamain a segirar il provediment social ed a meglierar il stadi economic e social da la populaziun.

Las finamiras da quest onn da la ONU èn:

    - renconuscher las prestaziuns dals voluntaris
    - etablir ina rait tranter las organisaziuns da voluntaris
    - promover la lavur voluntara
    - mobilisar novs voluntaris

Tenor il resultat da la retschertga svizra davart las forzas da lavur 2000 (SAKE) ha ina da quatter persunas fatg almain ina lavur en uffizi d'onur u voluntara. Senza quest engaschament gratuit en instituziuns ecclesiasticas, socialas, caritativas, en uniuns d'interess, uffizis politics, en il sport ed en la cultura fiss nossa societad periclitada fermamain. La dimensiun stimada da l'uffizi federal da statistica da la lavur prestada è enorma: 44 milliuns uras per mais, ina summa che correspunda a 248'000 plazzas a temp cumplain.

La lavur voluntara è necessaria, savens schizunt indispensabla, per il bainstar da nossa societad. Perquai po ella far valair la medema stima e renconuschientscha sco l'activitad da gudogn.

En quest connex fan las interpellantas ed ils interpellants las suandantas dumondas a la regenza:

    1. Tge muntada dat la regenza a la lavur voluntara che vegn prestada sin il champ social, cultural, sportiv e politic en tut las valladas da noss chantun?
    2. Tge experientschas da la lavur famigliara e voluntara valitescha il chantun oz sco qualificaziun cardinala en il cas d'in return en la professiun?
    3. Il iyv-forum.ch (International Year of Volunteers Forum Schweiz) s'engascha per la renconuschientscha publica da la lavur voluntara e promova l'idea d'in attestat social valaivel en l'entira Svizra. Renconuscha il chantun Grischun attestats davart lavur voluntara prestada e dovra el er tals per ils collavuraturs voluntars dal chantun?
    4. Tge mesiras cun cleras finamiras prevesa la regenza per che la lavur voluntara possia vegnir appreziada en nossa societad er en il futur e per ch'il chantun possia contribuir exempels positivs?

Cuira, il 1. da zercladur 2001

Namen: Cavegn, Casanova (Vignogn), Trachsel, Arquint, Bär, Battaglia, Berther (Mustér), Berther (Sedrun), Biancotti, Brüesch, Bucher, Bühler, Cahannes, Cathomas, Catrina, Caviezel, Cavigelli, Christoffel, Conrad, Crapp, Demarmels, Dermont, Farrér, Federspiel, Feltscher, Frigg, Geisseler, Giovannini, Giuliani, Gross, Hanimann, Hardegger, Hartmann, Jäger, Jenny, Joos, Juon, Keller, Koch, Kollegger, Lardi, Lemm, Locher, Loepfe, Looser, Luzi, Luzio, Maissen, Märchy, Meyer, Möhr, Montalta, Noi, Parolini, Parpan, Peretti, Pfenninger, Pfiffner, Portner, Quinter, Robustelli, Sax, Schmid (Sedrun), Schmid (Spleia), Schmid (Val S. Pieder), Schütz, Stiffler, Suenderhauf, Suter, Thomann, Tremp, Trepp, Tuor (Mustér), Tuor (Trun), Valsecchi, Zanolari, Zegg, Zindel

Session: 1.06.2001
Vorstoss: rg Interpellation


Resposta da la regenza

La lavur dals voluntaris è fitg impurtanta per nossa societad. Bleras raits socialas en nossa societad funcziunan be perquai ch'i vegn prestà lavur voluntara che na vegn betg indemnisada cun daners. Lavur voluntara vegn fatga surtut en la vischinanza, en il conturn social, tar l'assistenza a persunas cun basegn da tgira, en organisa-ziuns ecclesiasticas, socialas e culturalas, en la politica ed en il sectur dal temp liber e dal sport.

Ultra dal sectur da l'activitad voluntara vala er la lavur en chasa e per la famiglia, pia il far l'economia da chasa e la tgira dals uffants sco lavur nunpajada.

Ils umens prestan lur lavur voluntara per gronda part en structuras d'uniuns ed en il sectur politic (lavur voluntara organisada). Tar las dunnas vegn fatga la lavur voluntara per gronda part ordaifer in rom organisà (lavur voluntara informala). Savens vegn la lavur voluntara da las dunnas prestada en il sectur social che na vegn en general betg percepì tant bain. Da menziunar èn en quest connex surtut la tgira da confamigliars, l'agid als vischins, tgirar uffants per terzas persunas e prestaziuns d'agid persunal per conuschents u parents.

Cun l'idea d'in certificat naziunal da temp social vul il International Year of Volunteers Forum Schweiz (iyv-forum.ch) promover la renconuschientscha da la lavur voluntara.

Resposta a las dumondas:

    1. La regenza renconuscha la gronda impurtanza da la lavur voluntara en tut ils
    secturs da la societad. Ella sustegna activitads correspundentas en il rom da la basa legala e da las pussaivladads finanzialas.

    2. Lavur en la famiglia e lavur voluntara porscha conuschientschas, experientschas ed abilitads custaivlas sco er cumpetenza sociala. Activitads correspundentas vegnan resguardadas commensuradamain tar las annunzias per plazzas tar il chantun, ultra da la furmaziun e la carriera professiunala. En il rom da la revisiun da las disposiziuns executivas tar l'ordinaziun dal persunal che vegn da preschent preparada èsi previs en quest senn d'agiuntar en l'art. 17 in alinea cun il sequent cuntegn: "Experientschas acquistadas ordaifer la professiun sin il sectur d'educaziun, da tgira u d'organisaziun vegnan resguardadas commensuradamain".

    3. Il chantun renconuscha certificats davart lavur voluntara prestada en il senn da las explicaziuns precedentas. Per lavurs voluntaras vegn concedì als collavuraturs da l'administraziun chantu nala sin dumonda in congedi (parzialmain) pajà, surtut sch'i sa tracta d'activitads sin il sectur cultural e politic, ma er sin il sectur da sport e da giuventetgna. Igl è pussaivel che talas activitads vegnian administradas en il sistem d'infurmaziun dal persunal dal chantun. I sto vegnir examinà pli detagliadamain sche quai duai suc ceder. En quest connex sto er vegnir sclerì, sch'il patrun u l'instituziun che profita da la lavur voluntara duai eventualmain emetter e conceder certificats dal temp social.

    4. La regenza vegn ad examinar, en il rom da la revisiun da las disposiziuns executivas tar l'ordinaziun dal persunal che vegn da preschent preparada, quant enavant ch'ins duai crear impuls per promover l'activitad voluntara da collavuraturs da vart dal chantun sco patrun.