Navigation

Inhaltsbereich

Postulat concernent l'assegnaziun da secturs specifics als departaments

Sessiun: 07.09.2001

Cun il conclus dals 14 d'avust 2001 ha la regenza transferì, cuntrariamain a l'art. 25 cifra 2 lit. b da l'urden da gestiun per la regenza (UGR; DG 170.320), ils secturs specifics "polizia chantunala" e "polizia d'esters" cun effect immediat dal departament da giustia, polizia e sanitad al departament substitut da construcziun, traffic e selvicultura (guarda Fegl uffizial nr. 33 dals 16-08-2001, p. 2690). Quest pass è vegnì fatg en connex cun la proposta da la procura districtuala III per il chantun Turitg e da la cumissiun da giustia dal cussegl grond da revocar l'immunitad da cusseglier guvernativ Peter Aliesch, per pudair extender sin sia persuna l'inquisiziun penala en l'uschenumnà "cas Papadakis".

Pervia dals fatgs areguard il "cas Papadakis" che cusseglier guvernativ Peter Aliesch ha confermà publicamain sco er pervia da ses cumportament suenter ch'igl è vegnì enconuschent ch'el aveva acceptà regals, n'è el betg pli credibel politicamain sco magistrat tenor l'avis da las sutsegnadas e dals sutsegnads, e quai independentamain dal resultat da la procedura penala. Plinavant ha el er chaschunà in grond donn a la reputaziun da la regenza e dal chantun Grischun. Per las sutsegnadas e per ils sutsegnads cuntegna il cumportament da cusseglier guvernativ Aliesch ina dimensiun politica che surpassa il simpel fatg d'evitar eventualas collisiuns d'interess en il rom da l'inquisiziun penala davart pussaivels causals penals relevants.

In commember da la regenza sto demussar d'avair in grond senn da responsabladad, integritad e da credibladad. Sut questas premissas n'èsi betg pli pussaivel che cusseglier guvernativ Peter Aliesch possia represchentar en il cussegl grond ed en la publicitad la revisiun da la constituziun chantunala, en la quala vegnan tractadas dumondas fundamentalas da la concepziun e da las structuras dal stadi. Er per la gestiun dal sectur "dretg penal, persecuziun penala ed execuziun dal chasti" ch'è sociopoliticamain fitg delicat, spezialmain sch'el pertutga recurs, en ils quals è da gronda impurtanza la reputa-ziun da l'autoritad che decida, manca a cusseglier guvernativ Peter Aliesch la credibladad politica necessaria. Igl è da sa dumandar, sch'il sectur da sanitad che pretenda ina collavuraziun intensiva cun la confederaziun e cun auters chantuns possia anc vegnir represchentà da cusseglier guvernativ Peter Aliesch.

En questa situaziun excepziunala èsi da prender mesiras efficazias almain per ils secturs giustia e polizia, e quai per mantegnair l'abilitad politica d'agir e la credibladad dals organs chantunals.

Per ils impurtants motivs surmenziunads envidan las sutsegnadas ed ils sutsegnads la regenza:

1. d'examinar quant envant ch'ins possia repartir egualmain ils secturs giustia e polizia sin ils auters departaments, e quai cun effect immediat e fin che cusseglier guvernativ Peter Aliesch banduna la regenza;
2. d'examinar quant enavant che cusseglier guvernativ Aliesch possia surprender incumbensas spezialas internas;
3. da tractar il preschent postulat durant la sessiun d'october 2001.

Cuira, ils 7 da settember 2001

Name: Arquint, Vetsch, Suenderhauf, Casanova (Cuira), Ambühl, Augustin, Bachmann, Bär, Barandun, Battaglia, Beck, Berther (Sedrun), Biancotti, Bischoff, Brasser, Brüesch, Brunold, Bucher, Bühler, Büsser, Cahannes, Capaul, Casanova (Vignogn), Cathomas, Catrina, Caviezel (Cuira), Caviezel, (Pitasch), Cavigelli, Christoffel, Claus, Conrad, Crapp, Dalbert, Demarmels, Dermont, Donatsch, Frigg, Furrer, Geisseler, Giovannini, Göpfert, Gross, Hanimann, Hardegger, Hartmann, Heinz, Hess, Hübscher, Jäger, Joos, Juon, Kehl, Keller, Kessler, Lardi, Lemm, Locher, Loepfe, Looser, Luzi, Maissen, Märchy, Marti, Meyer, Michel, Möhr, Montalta, Nick, Nigg, Noi, Parolini, Parpan, Patt, Peretti, Pfenninger, Pfiffner, Pleisch, Portner, Ratti, Righetti, Rizzi, Robustelli, Roffler, Sax, Scharplatz, Schmid (Sedrun), Schmid (Spleia), Schmid (Val S. Pieder), Schmutz, Schütz, Stiffler, Telli, Thomann, Thöny, Tramèr, Tremp, Trepp, Tscholl, Tuor (Mustér), Tuor (Trun), Valsecchi, Walther, Wettstein, Zanolari, Zarn, Zarro, Zegg, Zindel

Session: 07.09.2001
Vorstoss: rg Postulat


Resposta da la regenza

A la sessiun extraordinaria dal cussegl grond dals 7 da settember 2001 han ils presidents da las fracziuns crititgà il cumportament da cusseglier guvernativ Peter Aliesch en connex cun il cas „Papadakis“. Els han constatà la perdita da la credibladad e da l'abilitad politica d'agir e pledà il medem mument per ina privaziun da la confidenza tras il cussegl grond. Quest davos fatg han documentà 108 deputadas e deputads cun inoltrar il preschent postulat che pretenda essenzialmain da retrair cumplettamain ils champs d'incumbensa giustia e polizia da cusseglier guvernativ Aliesch.

Gia cun ses conclus dals 14 d'avust 2001 ha la regenza surdà en enclegientscha ils secturs specifics polizia chantunala e polizia d'esters al departament da construcziun, traffic e selvicultura substitut. Per quest intent è ella sa basada sin l'art. 26 al. 1 da da ses urden da gestiun (UGR). Questa disposiziun prevesa che per motivs impurtants, particularmain per evitar collisiuns d'interess, possia ella divergiar da la repartiziun d'incumbensas tenor l'urden da gestiun. Sustegnida tras la posiziun clera dal parlament a la sessiun extraordinaria vul la regenza garantir er vinavant che fa-tschentas impurtantas, dossiers delicats sco er tschertas incumbensas da rutina possian vegnir represchentadas libramain, a moda politicamain effizienta e cun credibladad envers il cussegl grond e la publicitad. Pertutgà spezialmain da quest conflict è, tenor l'avis da la regenza, il sectur da giustia cun ils fatgs da dretgira, las dumondas constituziunalas generalas inclusiv la revisiun totala da la constituziun chantunala e las cumpetenzas per il dretg penal, l'execuziun da chastis e mesiras. Da quests davos secturs fan part la persecuziun penala e l'execuziun da chastis e mesiras sco er la praschun dal Sennhof ed il stabiliment da Realta. Per evitar ulteriuras collisiuns d'interess è la regenza pronta da transferir ils secturs specifics menziunads dal champ d'incumbensas giustia ad auters departaments, e quai sin fundament da l'art. 26 al. 1 UGR. Sco ch'il cussegl grond pretenda, duai la surdada valair fin a l'abandun da cusseglier guvernativ Aliesch da la regenza.

En la cumpetenza da cusseglier guvernativ Aliesch restan pia en emprima lingia il champ d'incumbensas sanitad cun ils secturs specifics sanadad ed agid social sco er il champ d'incumbensas giustia e polizia cun ils secturs specifics dretg da burgais e dretg civil, traffic sin via e navigaziun.

Ulteriuras mesiras na vul la regenza betg ordinar per il mument, e quai sin fundament da la disposiziun excepziunala da l'art. 26 al. 1 UGR. Medemamain resguarda ella sco in fatg nunpussaivel e nunraschunaivel da surdar incumbensas spezialas a cusseglier guvernativ Aliesch. Ma, tut tenor il svilup da la situaziun, sa resalva la regenza il dretg da far in nov giudicament e da prender las mesiras adattadas.

La regenza sa declera pia pronta d'acceptar il postulat en quel senn che, cuntrariamain a l'art. 25 cifra 2 lit. A UGR, vegnan transferids ils secturs specifics giustia, dretg penal, persecuziun penala ed execuziun dal chasti dal departament da giustia, polizia e sanitad ad auters departaments. Ils detagls organisatoris regla la regenza.