Navigation

Inhaltsbereich

Interpellaziun concernent ina meglra colliaziun dal Grischun cun las citads svizras e cun la rait d'auta sveltezza da las viafiers europeicas (rait TAS)

Sessiun: 08.10.2001

Ils 23 da settember 2001 ha il chantun Turitg approvà cun passa 80% ina segunda staziun da transit sut la staziun principala da Turitg. Questa staziun da transit dat novs impuls per il traffic public en l'entira Svizra.

Grazia a meglras purschidas èsi da spetgar a partir da l'onn 2012 in augment da l'interess da 70% tar il traffic da persunas naziunal ed in augment da l'interess da 100% tar il traffic da persunas internaziunal. I sa tracta d'ina purschida attractiva per il svilup economic en las regiuns periferas e betg il davos er per ils giavischs da la politica da l'ambient. Il Grischun pudess senz'auter profitar da las meglras purschidas.

En sia vista generala per il traffic public sin binaris "Zu(g)kunft Graubünden" ha il chantun Grischun sviluppà pliras entschattas per la meglra colliaziun dal chantun Grischun cun la plazza aviatica a Turitg-Kloten. Uschia vegn mussà in in nov traject Schmerikon/SG-Rüti/ZH ina colliaziun directa a partir da Ziegelbrücke via la Part-sura turitgaisa-Effretikon-plazza aviatica.

Sco mesira impurtanta per l'augment da prestaziun tranter la regiun da Cuira e Turitg vegni considerà en il rapport sco fitg necessari d'eliminar il davos traject cun be in binari per lung dal Lai Rivaun tranter Tiefenwinkel e Mühlehorn.

Il chantun Grischun ha medemamain laschà analisar la situaziun concernent la colliaziun cun la la rait TAS, spezialmain en direcziun da la Germania dal sid (Minca/Augsburg/Ulm). La posiziun-clav ha qua la cumplettaziun da la lingia da VFF Sargans-St. Margrethen.

En quest connex sa preschentan las sequentas dumondas:

1. È la regenza pronta, ensemen cun la confederaziun e la VFF, d'orientar il concept da purschidas existent da la viafier tenor novas opziuns?
    2. Tge concentraziuns dal tact e tge meglieraziuns dal temp da viadi èn pussaivlas tranter Cuira e Turitg, ma er tranter Cuira ed auters centers, grazia a la staziun da transit Löwenstrasse?
    3. Tge colliaziuns directas pudessan/duessan vegnir creadas da nov tranter Cuira ed ils centers svizzers ed europeics grazia a la staziun da transit? Basilea-Paris, plazza aviatica-Schaffusa-Stuttgart, Berna-Genevra e.u.v.
4. È la regenza da l'avis che l'eliminaziun da la mancanza d'in binari dubel per lung dal Lai Rivaun (sper Mühlehorn) duai valair sco project da l'emprima etappa da la viafier 2000 e duai perquai vegnir realisada sche pussaivel a partir da circa 2003/2004?
    5. Co vesa la regenza la realisaziun da la colliaziun directa Grischun-plazza aviatica via Ziegelbrücke-Part-sura turitgaisa-Effretikon?
    6. Tge muntada ha la cumplettaziun da la lingia da VFF Sargans-St. Margrethen per la regenza? Co è integrà il chantun Grischun en la planisaziun e projectaziun da questa colliaziun da la Svizra orientala cun la rait TAS?

Cuira, ils 8 d'october 2001

Name: Zanolari, Tuor (Mustér), Tremp, Berther (Sedrun), Biancotti, Bundi, Büsser, Casanova (Vignogn), Cathomas, Cavegn, Cavigelli, Crapp, Demarmels, Dermont, Federspiel, Geisseler, Giuliani, Keller, Koch, Lardi, Locher, Loepfe, Maissen, Noi, Parpan, Peretti, Portner, Quinter, Righetti, Sax, Schmid (Sedrun), Schmid (Val S. Pieder), Schütz, Thurner, Zegg

Session: 08.10.2001
Vorstoss: rg Interpellation


Resposta da la regenza


Da preschent vegn preparada sin differents plauns la realisaziun da la segunda
etappa da Viafier 2000, per la colliaziun da la Svizra occidentala ed orientala cun la rait d'auta sveltezza da las viafiers europeicas (colliaziuns TAS) sco er per il "Plan sectoral binaris". Quests projects gronds da la confederaziun han intimà il chantun da laschar elavurar en il studi "Zu(g)kunft Graubünden" (fanadur 2001) ina vista generala cumplessiva davart il traffic public sin binaris entaifer il chantun Grischun e sin ils corridors d'access impurtants. Quest studi furma ina basa impurtanta per elavurar il plan directiv chantunal. Ins ha er examinà co ch'ins pudess meglierar la purschida e tge ulteriurs moduls d'infrastuctura (cumplettaziuns e trajects che ston esser construids da nov) ch'èn necessaris.

Cun la construcziun da la segunda staziun sutterrana a Turitg e cun il nov tunnel en direcziun d'Oerlikon vegn augmentada marcantamain la capacitad da la staziun principala a partir da l'onn 2012, quai che vegn ad avair in effect positiv sin l'entira rait da viafiers en il nordost da la Svizra. La nova staziun sutterrana vegn er ad obtegnair in access nà da Cuira e po vegnir duvrada per colliaziuns directas p. ex. a Schaffusa-Stuttgart. Colliaziuns directas a Basilea e Paris u a Berna-Genevra ston circular er en il futur sur terra cun ina storta a piz. L'augment da la capacitad vegn dentant a facilitar talas colliaziuns directas. La regenza spetga che la VFF, sco gia planisà senza staziun da transit, possia introducir a partir da la midada da l'urari 2004 ultra dal Inter Regio mintg'ura trens InterCity Turitg-Cuira cun in temp da viadi da sulettamain 72 minutas che vegnan colliadas cun Basilea (nonstop u via Aarau-Liestal). La regenza giavischa ultra da quai novas colliaziuns - senza midar tren - da la Svizra bassa (Berna/Biel-Olten) en il Grischun. Ultra da quai vegn ella a s'engaschar cun il chantun Son Gagl ch'il davos traject che ha be in binari e che sforza da sbassar la spertadad per lung dal Lai Rivaun (Tiefenwinkel-Mühlehorn) vegnia eliminà sche pussaivel fin 2006/08.

Cun la colliaziun directa dal Grischun - plazza aviatica via la Part sura turitgaisa - Effretikon po il Grischun vegnir collià directamain e senza ch'ins stoppia midar tren cun la plazza aviatica. La ruta via la Part sura turitgaisa n'è betg previsa sco substituziun per la colliaziun sperta IC Turitg - Cuira, mabain sco ulteriura purschida cun fermadas a las staziuns las pli impurtantas.

La regenza dat auta prioritad a la vasta cumplettaziun cun binaris dubels e l'augment da la spertadad da la lingia Sargans (resp. Weite-Wartau) - St. Margrethen en vista a colliaziuns pli spertas e senza ch'ins stoppia midar tren dal Grischun en il territori da la Germania dal sid: La colliaziun cun Ulm/Augsburg/München è daventada anc pli impurtanta tras il conclus ch'ins ha fatg dacurt da construir il traject nov Stuttgart-Ulm sco part d'in traject europeic d'auta sveltezza da Vienna-Minca-Strassburg-Paris. La regenza spetga perquai che la cumplettaziun sin dus binaris dal traject St. Margrethen-Weite succedia fin l'onn 2006/08 a quint dal credit restant Viafier 2000, 1. etappa (1.5 milliardas francs) sco er or da meds da la NVTA.