Navigation

Inhaltsbereich

Interpellaziun concernent il concept chantunal per stabiliments da golf

Sessiun: 08.10.2001
Il boom dals ultims onns sin il sectur dal sport da golf ha chaschunà ch'ins ha construì e surtut er planisà numerus stabiliments da golf en il chantun. Ils effects dals stabiliments da golf concernent l'aspect da la cuntrada, l'agricultura, ma er concernent las dumondas ecologicas èn da gronda muntada.

Las consequenzas d'ina taxaziun memia optimistica dal potenzial sin il sectur dal sport da golf na dastgan plinavant betg vegnir sutvalitadas. Surtut ston ins qua er resguardar l'incalculabilitad da sports da moda. Per part datti grondas resalvas visavi ina creschientscha nuncontrollabla cun consequenzas negativas concernent ils differents interess da protecziun e d'utilisaziun sco era concernent l'incumpatibilitad cun auters giavischs turistics.

Ultra da quests problems stattan er en discussiun dumondas da la rentabilitad, da la cumprova dal basegn sco er d'eventualas renaturalisaziuns.

Nus envidain la regenza da respunder las sequentas dumondas:

    1. Co taxescha la regenza il svilup dal sport da golf ed il basegn correspundent da stabiliments en il chantun Grischun?
    2. Vesa la regenza in basegn da coordinaziun pli ferm concernent ils differents projects per ils stabiliments da golf? Tge è sia opiniun concernent l'idea d'in concept chantunal per stabiliments da golf?
    3. Co taxescha la regenza il mussament dal basegn sco er las vistas concernent la rentabilitad ed il profit per l'economia publica dal project "regiun da golf Surselva"?
    4. Co vegnan garantids auters interess turistics u da la protecziun da la cuntrada (sco p. ex. las stentas per in parc da natira Ruinaulta) en ils territoris correspundents?
    5. Co vegn garantida la renaturalisaziun da tals stabiliments che po sut circumstanzas esser necessaria en in pèr onns e tge criteris vegnan applitgads?
    6. Considerescha la regenza quai sco ina procedura da planisaziun raschunaivla sch'in plan directiv regiunal vegn tractà resp. midà trais giadas entaifer 10 onns (p. ex. concept stabiliments da golf Surselva)?
    7. Co valitescha la regenza ils effects da la perdita da terren cultivà sin l'agricultura en general e sin ils bains agriculs pertutgads en spezial?

Cuira, ils 8 d'october 2001

Name: Pfenninger, Schütz, Arquint, Augustin (Almen), Bucher, Frigg, Jäger, Locher, Looser, Meyer, Noi, Pfiffner, Schmutz, Trepp, Zindel

Session: 08.10.2001
Vorstoss: rg Interpellation


Resposta da la regenza


Tar dumonda 1

Il sport da golf è sa sviluppà durant ils ultims onns er en Svizra cun ina sveltezza
enorma. Da quai dattan perditga il grond dumber da giugaders e giugadras da golf e las activitads creschentas da reclama che la branscha da turissem fa per vacanzas da golf. Igl è da spetgar che quest boom vegnia a sa mantegnair er en il futur. Or dal puntg da vista d'in chantun da turissem è quest svilup da taxar sco positiv per l'economia publica (il turissem da stad vegn rinforzà; las stagiuns mortas daventan pli attractivas). Sut ils aspects dals giavischs da l'agricultura sco er da la protecziun da la natira e da la cuntrada n'è quest svilup dentant betg nunproblematic, sch'ins resguarda il diever da surfatschas considerabel da las plazzas da golf cun las consequenzas sin il territori e l'ambient che resultan da quai.

Tar dumonda 2

Pervia dal grond effect sin il territori è il basegn da coordinaziun tar plazzas da golf da taxar sco aut. La creaziun d'in concept chantunal per stabiliments da golf na para dentant betg opportun a la regenza. Anzi, er tenor il nov plan directiv chantunal duain planisaziuns da stabiliments da golf en il futur succeder en emprima lingia sut la responsabladad da las regiuns che pon fixar novs lieus adattads per questas interpresas, e quai mintgamai correspundentamain a lur qualitads e lur potenzials territorials ed a basa d'examinaziuns duvrablas dal basegn e dal lieu. L'influenza dal chantun ed ils basegns da coordinaziun interregiunals èn garantids en il rom da las proceduras d'approvaziun.

Tar las dumondas 3, 4 e 6

La Surselva è ina regiun da grondas dimensiuns cun potenzial turistic. Perquai ch'ella dispona da preschent sulettamain d'in stabiliment a 9 rusnas en la part suprema da la regiun e perquai che las capacitads da la proxima plazza da golf extraregiunala da Domat èn utilisadas è cumprovà il basegn d'ulteriuras purschidas. La regiun ha l'intenziun da sa posiziunar sco regiun da golf. Il project prevesa ina colliaziun da pliras plazzas da different gener cun ina cumparsa communabla ed in marketing communabel en la regiun. Igl è anc memia baud da valitar la rentabilitad ed il profit per l'economia publica da quest'idea. Giuridicamain pon ins adattar plans directivs, sche las relaziuns èn sa midadas u sch'incumbensas novas daventan actualas. En vista a la creschientscha constanta sin il sectur dal sport da golf sco er en vista a la muntada creschenta dal martgà da vacanzas da golf na po perquai strusch vegnir contestada la futura repassada dal plan directiv en quai che pertutga la procedura. La garanzia d'auters interess (p. ex. stentas Ruinaulta) succeda medemamain tras la planisaziun regiunala.

Tar dumonda 5

La garanzia da la renaturalisaziun da stabiliments da golf ch'èn eventualmain nunrentabels succeda mintgamai en il rom da las proceduras d'approvaziun. Tenor il manual davart l'examinaziun ecologica (EE) da l'UFAGC furma la tematica da la renaturalisaziun ina part dals interess da project ch'èn d'examinar. Uschia vegn per exempel pretendida ina cartaziun dal terren per avair ina survista cumpletta davart la situaziun da partenza. Ultra da quai vegnan er pretendidas infurmaziuns davart las finamiras d'ina eventuala renaturalisaziun. Tut tenor la situaziun vali la paina d'examinar er garanzias finanzialas sco p. ex. garanzias da bancas.

Tar dumonda 7

Tar ils projects per stabiliments da golf ch'èn vegnids realisads ils davos onns han ins pudì schliar problems cun bains agriculs pertutgads tenor ils cas singuls, perquant ch'els na stevan betg en connex cun manaschis che sa chattavan tuttavia avant la liquidaziun natirala. Pli probelmaticas èn las consequenzas per l'agricultura en general, sche plazzas da golf vegnan construidas en il terren il pli fritgaivel. Qua fan las perditas particularmain mal ed ina ponderaziun exacta dals interess sa mussa sco spezialmain impurtanta.