Navigation

Inhaltsbereich

Interpellaziun concernent la "colliaziun da via en Surselva"

Sessiun: 09.10.2001

Ina da las premissas las pli impurtantas per ina promoziun activa da las regiuns da muntogna en favur dal mantegniment da la structura d'urbanisaziun decentrala è in sistem da traffic cumplettà correspundentamain ed accordà cun la dimensiun dal traffic ch'è da spetgar dal traffic da persunas e da martganzia. Il sistem sto sa basar sin concepts che sa cumpletteschan per il traffic individual e per il traffic public e che satisfa als basegns da traffic tant da la populaziun indigena sco er dals giasts da vacanzas.

Economicamain s'orientescha la Surselva vers la Val dal Rain grischuna; l'avertura puncto vias durant l'entir onn funcziuna sulettamain nà da questa regiun. Ultra d'ina lingia da viafier efficazia èn perquai er las colliaziuns da via La Punt/Reichenau - Glion da gronda muntada per l'avertura dal traffic.

Tenor la documentaziun da l'uffizi da construcziun bassa che stat a nossa disposiziun vegn prognostitgà ina rata d'augment annuala da 2.5 fin 3.0%, quai sin basa d'in augment da traffic probablamain retardà suenter l'onn 1995. La consequenza da quai vegnan ad esser grevezzas insupportablas per ils vischins ed ils participants dal traffic sin la via sursilvana A 19, e quai surtut tranter Tumein e Glion. Tras il tunnel realisà per il sviament da Trin sco er a basa dal tunnel che vegn construì per il sviament settentriunal da Flem han ins gia realisà pass essenzials per meglierar la situaziun dal traffic en direcziun da la Surselva.

Perquai ch'ils sviaments da Flem e Trin vegnan ad esser per la proxima generaziun - e forsa schizunt per las proximas generaziuns - ina part da la via che serva a l'avertura da basa da la regiun Surselva ed a la suletta colliaziun longitudinala entaifer las Alps, duess ins prevegnir ad uras a stagnaziuns dal traffic programmadas che vegnan chaschunadas sin quest traject surtut da camiuns.

Or da la vista dals interpellants pon ins perquai cuntanscher la meglieraziun urgentamain necessaria per l'avertura da la Surselva sulettamain cun terzs vials cun la funcziun da vials plauns tranter La Punt/Reichenau e Glion.

Per ils motivs menziunads supplitgeschan ils interpellants la regenza da respunder la sequenta dumonda:

Quant enavant e nua sin quest traject pon ins construir tals vials durant il proxim temp per evitar ch'ins stoppia charrar en Surselva sin gronds trajects che na porschan naginas pussaivladads suffizientas per surpassar?

Cuira, ils 9 d'october 2001

Name: Dermont, Cavigelli, Casanova (Vignogn), Augustin (Cuira), Bachmann, Berther (Sedrun), Biancotti, Bundi, Cahannes, Capaul, Carisch, Cathomas, Cavegn, Caviezel, Claus, Dalbert, Demarmels, Federspiel, Feltscher, Geisseler, Joos, Keller, Kessler, Lardi, Loepfe, Maissen, Montalta, Portner, Righetti, Robustelli, Roffler, Sax, Schmid (Sedrun), Schmid (Val S. Pieder), Telli, Tramèr, Tuor (Mustér), Tuor (Trun), Zanolari, Zegg

Session: 09.10.2001
Vorstoss: rg Interpellation


Resposta da la regenza


La regenza è conscienta da la muntada da la via sursilvana per l'avertura da la Surselva. La realisaziun dals gronds projects da sviament da Trin e Flem accentuescha quai cleramain.

Sin differentas parts dal traject tranter La Punt/Reichenau ed il pass da l'Alpsura impedescha la colliaziun, concepida sco via da muntogna cun bleras stortas, pendenzas, lieus stretgs ed ina substanza antiquada il moviment dal traffic. Il mantegniment necessari ed eventualmain ina correctura moderada stattan consequentamain en il center da las mesiras architectonicas, e quai er sut il puntg da vista da meglierar il moviment dal traffic.

A basa da l'augment da traffic prognostitgà ch'è dal reminent da spetgar sin l'entira rait da vias dal chantun teman ils interpellants ch'i saja da quintar cun dapli stagna-ziuns dal traffic, e quai surtut pervia dal volumen dal traffic pesant. Per evitar stagnaziuns dal traffic nungiavischadas tranter la Punt e Glion vegn perquai pretendida la construcziun d'in terz vial cun la funcziun d'in vial plaun. Cun la pussaivladad da surpassar che vegn creada uschia duai vegnir meglierà il moviment dal traffic.

Senza dubi è il basegn d'edifizis novs e da cumplettaziuns anc adina considerabel sin la gronda rait da vias da noss chantun caracterisà dal turissem. Ultra da quai creschan permanentamain las pretaisas concernent la tscherna libra dal med da traffic sco er concernent la qualitad dal sistem da traffic. Cun lur dumonda per in vial plaun tranter La Punt e Glion pervia da las pussaivladads restrenschidas da surpassar sin ina via da muntogna pledentan ils interpellants la capacitad da recepziun da questa colliaziun. En il rom da las reparaturas fa il chantun bain levas correcturas dal trassé existent. Oz mancan dentant per gronda part ils meds finanzials per cumplettaziuns da vias cun l'intent d'augmentar la capacitad. Cleramain en il center stattan con-
strucziuns novas e cumplettaziuns per garantir la segirezza dal traffic en cas da privels da la natira resp. per proteger ils umans cunter las immissiuns dal traffic da transit. En vista al stadi architectonic da differents trajects parzials ha la regenza finalmain accentuà pliras giadas ch'i vegnia a duvrar sforzs intensivads sin il sectur dal mantegniment.

Per entschaiver novs projects da cumplettaziun da pli grondas dimensiuns, sco ch'i vegn pretendì dals interpellants, na datti durant ils proxims onns deplorablamain nagina libertad d'acziun pervia da las stgarsas resursas finanzialas. Cun la restricziun ch'ins possia eliminar singuls lieus da privel cun levas correcturas dal trassé en il rom da la reparatura na po la regenza sut las circumstanzas explitgadas betg metter en vista la planisaziun e la realisaziun d'in vial plaun tranter La Punt e Glion, e quai er betg a pli lunga vista.