Navigation

Inhaltsbereich

Postulat concernent l'augment da la segirtad entras la cuntanschibladad integrala sin nossas vias

Sessiun: 09.10.2001
Nossa rait da vias maina sur blers pass, tras nundumbraivels tunnels e profundas chavorgias. En insaquantas parts dal trajet da vias n'è u la recepziun da radio u il diever dal natel betg pussaivel.
La recepziun da radio è impurtanta en situaziuns criticas sco en cass da privel da lavinas, malaura u accidents per pudair informar dapertut ed en scadina situaziun.
In telefon mobil pussibilitescha d'alarmar spert ed aschia purtar agid u schizunt salvament a temp util. Accidents en numerus tunnels da vias dattan da patratgar.
Schizunt l'institut d'assicuranza d'edifizis (IAE) ha interess da la pussaivladad d'optimar ils sistems da communicaziun sin nossa rait da vias.
En il senn da prevenziun dumondan ils sutsegnads sche la regenza è pronta da prender las mesiras necessarias per eliminar quest disturbi en ina moda e maniera adequata.

Cuira, ils 9 d'october 2001

Name: Walther, Tramèr, Roffler, Ambühl, Augustin (Cuira), Bachmann, Bär, Biancotti, Bischoff, Cahannes, Casanova (Vignogn), Christ, Claus, Conrad, Donatsch, Federspiel, Feltscher, Geisseler, Giacometti, Giuliani, Hanimann, Keller, Kessler, Koch, Lardi, Lemm Locher, Loepfe, Maissen, Marti, Parolini, Pleisch, Portner, Quinter, Righetti, Rizzi, Robustelli, Scharplatz, Schmid (Sedrun), Schmid (Spleia), Suter, Telli, Trachsel, Zarro, Zegg

Session: 09.10.2001
Vorstoss: rg Postulat


Resposta da la regenza

Ils basegns d'infurmaziun e da communicaziun da la societad s'augmentan oz ordvart spert. Il svilup tecnic porscha ina gronda quantitad da pussaivladads per garantir ch'ins saja cuntanschibel permanentamain e dapertut. Il niz d'in provediment extendì cun radio e cun telefon mobil sco er cun installaziuns da radiofonia per ils participants dal traffic è incontestà. En quest senn aspirescha il postulat in augment da la segirtad cun ina cuntanschibladad integrala sin nossa rait da vias.

Tenor scleriments da l'uffizi da construcziun bassa è pussaivla la recepziun da radio da preschent sin passa 95% dals trajects en il liber e fin l'onn 2002 en 80% da tut ils tunnels ch'èn pli lungs che 600 m. La recepziun da telefons mobils è oz gia pussaivla sin passa 90% dals trajects en il liber ed en 85% da tut ils tunnels ch'èn pli lungs che 600 m. Malgrà las cundiziuns da basa disfavuraivlas pon ins uschia gia profitar dals avantatgs d'infurmaziun davart privels da lavinas, bloccadas da vias e stagnaziuns dal traffic sin la gronda part da nossa rait da vias. Il medem vala per la pussaivladad d'annunziar svelt p. ex. in accident via telefon mobil.

Ultra da quai han p. ex. l'uffizi da construcziun bassa, la polizia chantunala ed ils servetschs da salvament atgnas raits da radiofonia per garantir il manaschi e la surveglianza da las vias u per pudair communitgar en cas d'acziuns.

In project current cun custs totals da ca. 25 milliuns francs per augmentar la segirezza en ils tunnels ha l'intent da cumplettar en differents tunnels las installaziuns necessarias sco er ils indrizs radiofonics per ch'els possian dumagnar eveniments, da proveder ils programs da radio cun ina pussaivladad da discurrer directamain e d'optimar las colliaziuns dals telefons mobils.

Oravant tut pervia da las relaziuns topograficas difficilas fruntan ils basegns da garantir ina cuntanschibladad permanenta cun las pussaivladads tecnicas d'ozildi en in chantun da muntogna sco il Grischun sin ils cunfins finanzials. Il provediment postulà per l'entir territori dal chantun, cumplet e senza interrupziun sin l'entira rait da vias, na sa lascha perquai betg realisar a curt termin.

La direcziun dal postulat che ha survegnì ina nova muntada cun il grond accident da traffic en il tunnel dal Gottard dals 24 d'october 2001, correspunda er a la voluntad da la regenza. Ella vegn ad instradar en il rom da las pussaivladads finanzialas ulteriurs pass per meglierar la situaziun, malgrà ch'ina cuntanschibladad integrala e per l'entir territori chantunal n'è betg pussaivla tenor la valitaziun dad oz.

En il senn da las explicaziuns è la regenza pronta da prender encunter il postulat.