Interpellaziun concernent la pratica d'arrest da repatriament en il chantun Grischun
Sessiun: 09.10.2001
Il repatriament d'in requirent d'asil è ina incumbensa fitg difficila. Ins ha da realisar cun ina directadad consequenta ils conclus da l'uffizi federal da fugitivs resp. da la cumissiun da recurs concernent l'asil. Ma gist quai duai succeder en ina moda e maniera che respecta absolutamain la dignitad dal requirent d'asil pertutgà ch'è vegnì refusà.
En il cas da Hamid Bakiri n'è quai cun gronda probabilitad betg succedì. Tenor las constataziuns dal HEKS, d'Amnesty International e d'ulteriuras organisaziuns hajan nus generalmain in problem cun la realiaziun dal repatriament en il chantun Grischun, ed i dettia in basegn d'agir. N'ha nossa pratica da repatriament nagina fatscha umana?
Tar la situaziun da partenza actuala: Ils 20 da settember ha il praschunier da repatriament da l'Algeria commess suicid en ina cella da polizia a Cuira. Dapi mez fanadur vegniva Hamid Bakiri tegnì en arrest isolà. El n'aveva nagin access a medias, be fitg paucs contacts cun il mund ordaifer la cella, el passentava per regla 23 uras en arrest isolà en ina cella singula, a partir da las 18.00 n'era nagin pli en chasa, ed il praschunier stueva communitgar via interfon cun la centrala da polizia a Cuira.
Las motivaziuns uffizialas per questas mesiras (renitenza, motivs medicinals) na pon betg persvader.
Il cas Bakiri pretenda in'examinaziun exacta da las cundiziuns d'arrest da fugitivs da repatriament en il chantun. En quest connex preschentan las interpellantas ed ils interpellants las sequentas dumondas:
1. Ha la regenza er tema che las cundiziuns d'arrest da Hamid Bakiri na correspundian betg a la pratica dal dretg federal (DTF 122 II 299)?
2. En cas da gea, tgi surpiglia la responsabladad?
3. Correspundan las cundiziuns d'arrest en la praschun da repatriament a Tavau a las pretensiuns dal dretg federal?
4. Co sa preschenta exactamain la statistica d'occupaziun da la praschun da repatriament da Tavau dals 10 da fanadur fin ils 20 da settember (capacitad, plazzas libras)?
5. Co intenziunescha la regenza, en il senn d'ina "pratica da repatriament cun ina fatscha umana", da schliar il problem che praschuniers da repatriament na dastgan betg vegnir en contact cun persunas chastiablas, in fatg che vegn savens interpretà en lur disfavur e che chaschuna arrest isolà, fin ch'ins po retrair las novas infrastructuras per praschuniers da repatriament?
6. Tge furmaziuns supplementaras, supervisiun u coaching e tge mesiras da controlling retschaivan ils manaders responsabels ed ils policists ch'èn incumbensads cun l'incarica fitg differenziada da la pratica da repatriament?
Cuira, ils 9 d'october 2001
Name: Zindel, Frigg, Schmutz, Arquint, Augustin (Almen), Jäger, Locher, Looser, Noi, Pfenninger, Pfiffner, Schütz
Session: 09.10.2001
Vorstoss: rg Interpellation
Resposta da la regenza
La lescha federala vertenta davart mesiras repressivas en il dretg dals esters
prevesa la pussaivladad d'ordinar l'arrest da preparaziun e da repatriament. Tut en
tut duain quests novs geners d'arrest garantir ina meglra realisaziun dal dretg dals
esters e dal dretg d'asil. Tar las dumondas dals interpellants pon ins prender posiziun sco suonda:
1. Er sche nus deplorain fitg il suicidi na datti per la regenza nagins indizis che las cundiziuns d'arrest per Hamid Bakiri n'avessan betg correspundì a las premissas, sco ch'ellas èn vegnidas definidas tras la giurisdicziun dal tribunal federal. In recurs inoltrà posteriurmain al tribunal federal ha sco tema l'examinaziun da las cundiziuns concretas da l'arrest. Las cundiziuns d'arrest n'èn dal reminent betg vegnidas contestadas, ni al mument da l'ordinaziun giudiziala ni al mument da la prolungaziun en il cas singul.
2. Perquai che las premissas da l'arrest han ademplì las pretaisas dal tribunal federal è davanz la dumonda concernent la responsabladad per eventualas omissiuns.
3. La praschun d'inquisiziun a Tavau è vegnida modifitgada en il senn d'ina soluziun transitoria ed a basa da las directivas dal tribunal federal per executar l'arrest da preparaziun e da repatriament. Per quest intent stattan oz a disposiziun tschintg cellas d'arrest cun mintgamai dus letgs, in local da segiurn, in local per las visitas sco er ina curt per spassegiar. Sulettamain la purschida d'occupaziun na po betg vegnir ademplida a Tavau. Uschiglio è la regenza da l'avis che la praschun per executar l'arrest da preparaziun e da repatriament a Tavau correspundia a las pretaisas legalas.
4. La praschun per executar l'arrest da preparaziun e da repatriament a Tavau dispona da maximalmain diesch plazzas en cellas. A basa da la repartiziun particulara da las cellas n'han ins fin uss tenor pussaivladad betg occupà tut las plazzas il medem mument. Plinavant vulan ins evitar in'occupaziun dubla da las cel las. Quai è pussaivel betg il davos perquai che persunas che ston passentar ma ximalmain ina u dus notgs en arrest vegnan messas en cellas da la polizia en ils conturns da Cuira. En il temp dals 10 da fanadur fin ils 20 da settember 2001 han ins tegnì en arrest a Tavau en media trais persunas.
5. La nova praschun per executar quest arrest a Realta vegn probablamain a star a disposiziun a partir da primavaira/stad 2003. Fin a quest termin succeda l'arrest da preparaziun e da repatriament a Tavau. Sch'i vegn a dar mintgatant execuziuns singulas dependa da differents facturs che n'han per regla betg da far cun la persuna da l'arrestant isolà. Ins sto dentant dir ch'ins prova adina, sco er en il cas da Hamid Bakiri, d'evitar sche pussaivel l'ordinaziun d'arrest u, sche questa na sa lascha betg evitar, da la tegnair uschè curta sco pussaivel.
6. Las collavuraturas ed ils collavuraturs pledentads da la polizia d'esters disponan d'ina lunga experientscha professiunala. Lur furmaziun e lur furmaziun supplementara succeda tras occurrenzas da furmaziun supplementara sco er tras ina participaziun regulara a seminaris spezials da la partiziun sustegn da l'execuziun, organisads dal departament federal da giustia e polizia. Ina supervisiun particulara u in coaching da quests collavuraturs na datti betg.
Ils collavuraturs e las collavuraturas da la polizia chantunala che surveglian ils arrestants da repatriament durant la fasa transitoria disponan da princip d'ina furmaziun da basa sco policists e da curs correspundents da furmaziun supplementara. Sin il sectur psicologic vegnan realisads surtut curs da tact e curs da repetiziun per dumagnar conflicts.