Navigation

Inhaltsbereich

Sessiun: 09.10.2001
Cun la publicaziun dals 24 da matg 2001 èn la populaziun e las persunas interessadas vegnidas intimadas d'inoltrar en scrit al departament responsabel lur remartgas ed objecziuns concernent il plan directiv chantunal.
Sco documents da publicaziun han servì il PDChant ordinari, la carta da sintesa 1:50000 e sco aschunta al PDC la carta 1:25000 davart ils territoris sut protecziun da la natira (PN).
En consequenza da questa procedura da consultaziun èn vegnidas inoltradas numerusas posiziuns che vegnan ussa valitadas da l'UP e che obtegnan vigur legala tras il conclus da la regenza. En quest rom legal na po il cussegl grond sco autoritad legislativa betg vegnir integrà.
In plan directiv chantunal duai exprimer la direcziun strategica dal futur svilup dal chantun. A quest svilup satisfa il sboz be per part. El è fixà memia fitg sin la enumeraziun aschi cumpletta sco pussaivel dals territoris da protec-ziun, er sche quests èn anc uschè pitschens. Quella fixaziun sin in spazi uschè pitschen va en direcziun planisaziun d'impediment.
A chaschun d'occurrenzas d'orientaziun è vegnì declerà dals represchentants da l'UP e da l'UNC che la carta da sintesa e la carta PN n'hajan nagina valur lianta per autoritads e che quests plans sajan sulettamain da caracter informativ. Plinavant è visibel or dals documents d'exposiziun publica che sbagls tecnics èn avant maun, p. ex. tar la separaziun da zonas per la protecziun da la cuntrada e tar la fixaziun d'inventaris per la protecziun da la natira, quai che na duess en scadin cas betg pli esser ina noziun da la planisaziun dal territori. Sch'i dat tals sbagls tar las planisaziuns localas, sto l'exposiziun publica vegnir repetida en las vischnancas.
En consideraziun da la muntada d'in tal instrument da planisaziun dumondan ils sutsegnads la regenza da far in rapport per mauns dal cussegl grond suenter la valitaziun da la consultaziun.

Cuira, ils 9 d'october 2001

Name: Telli, Möhr, Bär, Ambühl, Bachmann, Barandun, Bischoff, Bühler, Butzerin, Capaul, Casanova (Vignogn), Cathomas, Catrina, Christoffel, Claus, Conrad, Dalbert, Demarmels, Dermont, Donatsch, Farrér, Federspiel, Feltscher, Geisseler, Giacometti, Hanimann, Hardegger, Hartmann, Heinz, Hübscher, Hug, Jeker, Juon, Lardi, Lemm, Locher, Loepfe, Maissen, Montalta, Nick, Parolini, Parpan, Patt, Pleisch, Ratti, Righetti, Rizzi, Robustelli, Roffler, Scharplatz, Schmid (Sedrun), Schmid (Spleia), Stiffler, Thomann, Thöny, Trachsel, Tuor (Trun), Valsecchi, Walther, Zarro, Zegg, Zinsli

Session: 09.10.2001
Vorstoss: rg Postulat


Resposta da la regenza

Cun il preschent postulat vegn pretendì che la regenza fetschia in rapport davart il nov plan directiv chantunal (PDCant) e da suttametter quest al cussegl grond confurm a l'art. 50c da l'urden da gestiun dal cussegl grond.

A questa damonda s'oppona la regenza ord las suandantas ponderaziuns:

In rapport en il sectur dal plan directiv chantunal cun ina debatta correspundenta en il cussegl grond cun la pussaivladad d'influenzar para gia problematic perquai ch'i sa tracta tar il plan directiv chantunal - cuntrari als auters secturs da la politica ch'èn stads en il passà object da rapports al cussegl grond - d'in champ d'incumbensas cun in agen dretg da procedura specific. Tenor quest dretg da procedura cumpeta l'elavuraziun ed il decret dal plan directiv expressivamain a l'administraziun resp. a la regenza. Ina participaziun dal parlament n'è betg previsa tenor la lescha davart la planisaziun dal territori per il chantun Grischun (LPTC) ch'è actualmain (anc) en vigur legala, e quai ni en furma da „discussiun/decleraziun/orientaziun“ ni en furma da „approvaziun u conclus“. Ina proposta d'integrar il cussegl grond en la planisaziun directiva dal chantun è vegnida refusada expressivamain (cfr. PCG matg 1986, p. 155 - 158). En quest connex èsi problematic sch'i vegn uss empruvà da tuttina dar access al cussegl grond a la planisaziun directiva dal chantun tras l'instrument dal rapport.

Almain sa referind al plan directiv ch'è uss avant maun è da metter en dumonda in rapport cun l'intent da pussibilitar ina debatta en il cussegl grond cunzunt er per motivs causals. Correspundentamain a la filosofia dal Grischun da la planisaziun da sutensi sa basa il PDChant en blers secturs sin ils plans directivs regiunals che han vigur legala uschia tranter auter er en ils secturs ch'èn la raschun per quest postulat, sco p. ex. la protecziun da la cuntrada ed il turissem. En auters secturs, sco per exempel tar la protecziun da la natira, sa basa el sin lungas tractativas e cunvegnientschas cun las regiuns. Resguardond il caracter specific dal PDChant, ch'è d'explitgar cun la grondezza e la diversitad dal chantun para ina debatta davart il plan directiv chantunal en il cussegl grond problematica. Ina tala debatta pudess periclitar la stabilitad cuntanschida cun ils plans directivs da las regiuns ed ulteriuras cunvegnien-tschas tranter ils interess da schurmetg e d'utilisaziun sco er da provocar novas malsegirezzas. Ord questa vista para l'integraziun dal cussegl grond en la planisaziun directiva dal chantun Grischun da bell'entschatta be pussaivla plitost areguard la formulaziun da la politica surordinada da l'urden da territori. En il rom da las lavurs tar la revisiun da la LPTC vegn l'integraziun dal cussegl grond en quest rom er examinada concretamain. Per quai che reguarda il plan directiv chantunal ch'è uss avant maun na fiss l'integraziun postulada dal parlament er lu betg pli opportun, sche l'integraziun sa referiss sulettamain al chapitel che tracta la politica surordinada da l'urden dal territori. Ina tala debatta en il cussegl grond davart la finamira fundamentala da la politica da l'urden dal territori avess stuì avair lieu avant l'elavuraziun da las parts operativas dal plan directiv, damai che questas sa drizzan directamain a la finamira fundamentala.

Sin fundament da questas ponderaziuns propona la regenza da refusar il postulat.