Navigation

Inhaltsbereich

Interpellaziun concernent la recrutaziun da forzas da lavur

Sessiun: 10.10.2001
La branscha dals servetschs da la hotellaria e restauraziun ch'è d'impurtanza existenziala per il Grischun sco er ils asils, spitals e las clinicas, demussan adina dapli fadia da recrutar collavuraturs qualifitgads, ma cunzunt er tals che fan lavurs pli simplas. En emprima lingia sa tracti da lavurs davos las culissas, a la derschentera, en la lavandaria e la linscharia, sin l'etascha ed al buffet.
Cunquai ch'i manca tenor la regulaziun linguistica da Berna a tut questas forzas da lavur il status „qualifitgà“ n'è betg pussaivla ina recrutaziun or da pajais na commembers da la UE resp. tenor il model dals dus circuls e tenor il sboz da la „nova legislaziun davart ils esters“. A Portugal, il sulet pajais aifer la EU nua ch'igl existeva fin qua in pitschen potenzial da forzas auxiliaras n'èn las pussaivladads da recrutar persunal praticamain betg avant maun.
Malgrà l'engaschament intensiv directamain al lieu n'èsi betg pussaivel da cuntentar gnanc per part ils basegns da noss chantun da turissem. Latiers èsi da patertgar ch'anc autras regiuns da turissem pateschan pervia da las medemas situaziuns catastrofalas da recrutaziun. En quest reguard èsi da menziunar ch'il chantun Vallais ha rendì attent energicamain la cussegliera federala Metzler a quellas difficultads; deplorablamain fin uss senza il sustegn d'auters chantuns.
Cunquai che la qualitad dals manaschis d'hotel e da restauraziun, mo er da blers ospitals ed asils na dependa betg sulettamain d'ina buna direcziun e dal management da qualitad ch'è oz tant popular, mabain en la medema mesira cunzunt er da nundumbraivlas prestaziuns da lavur che na pon betg vegnir automatisadas è l'avertura da novs pajais da recrutaziun ina necessitad absolutamain indispensabla.

Per ils motivs numnads dumandain nus la regenza:
1. sch'ella saja er da l'avis dals interpellants concernent las difficultads da recrutar persunal,
2. nua ch'ella vesa las pussaivladadas da proponer insistentamain meglieraziuns a l'adressa da la confederaziun,
3. sch'ella vesa la pussaivladad d'examinar la recrutaziun d'uschenumnà persunal „nunqualifitgà“ er or da pajais ch'èn candidats d'entrar en la UE, numnadamain da la Tschechia, Slovachia e l'Ungaria e sche la regenza fiss pronta da s'engaschar en favur da quai a Berna,
4. sch'ella è ultra da quai pronta da promover la pussaivladad d'occupar a temp limità studentas e students dals pajais dals Stadis Unids da l'America, da Canada, da l'Australia e da la Nova Zelanda.

Cuira, ils 10 d'october 2001

Name: Kessler, Zegg, Hardegger, Ambühl, Arquint, Augustin (Almen), Bachmann, Bär, Barandun, Berther, Bischoff, Bucher, Büsser, Butzerin, Carisch, Casanova (Cuira), Cathomas, Catrina, Cavegn, Caviezel, Christ, Christoffel, Claus, Crapp, Feltscher, Giacometti, Giuliani, Gross, Hanimann, Hug, Jeker, Joos, Juon, Lardi, Loepfe, Marti, Nick, Parolini, Pfiffner, Pleisch, Portner, Rizzi, Robustelli, Roffler, Scharplatz, Schmid (Sedrun), Schmid (Spleia), Schütz, Stiffler, Suter, Telli, Thomann, Thöny, Thurner, Tramèr, Tscholl, Tuor (Trun), Vetsch, Walther, Zarro

Session: 10.10.2001
Vorstoss: rg Interpellation


Resposta da la regenza

    1. L'examinaziun da la statistica dals esters da noss chantun mussa ch'il dumber total da permissiuns concedidas per stagiunaris, dimorants cun permissiun a curttemp e cunfinaris è s'augmentà da 23'040 l'onn 1998 sin 25'102 l'onn 2000. Repartì sin las differentas categorias da permissiun resulta tar ils stagiunaris in augment da 1'070 permissiuns e tar ils cunfinaris in basegn supplementar da 1'435 permissiuns. Sulettamain tar ils dimorants cun permissiun a curttemp èsi da constatar ina diminuziun da 450 permissiuns. Tenor la dumbraziun federala per il di da referenza per la fin d'avust è il dumber dals stagiunaris portugais s'augmentà da 3'791 per l'onn 1998 sin 3'998 per l'onn 2000. I n'è pia betg uschia che pli paucas forzas da lavur estras fissan stadas occupadas, il cuntrari è il cas, l'onn 2000 èn tut en tut vegnidas concedidas passa 2'000 permissiuns dapli che l'onn 1998. Questas cifras mussan ch'il basegn da forzas da lavur estras è creschì ils onns passads e che quest basegn ha pudì vegnir cuntentà almain per part.

Questa stad han la Gastro Grischun e l'uniun grischuna d'hoteliers incumbensà il biro d'intermediaziun da persunal Gross SA da recrutar persunal en Spagna e Portugal. Damai che quest project ha pir gist cumenzà na pon ins per il mument betg trair conclusiuns. Questas stentas èn da beneventar ed èn fitg impurtantas en vista a futuras tractativas cun la confederaziun. Da quel temp sto pia vegnir cumprovà ch'i na saja betg stà pussaivel da chattar il persunal necessari sin la fiera da lavur da la UE e quai malgrà las stentas da recrutaziun sistematicas e professiunalas.


    2. L'onn passà, a chaschun a chaschun da la procedura da consultaziun tar la revisiun parziala da l'ordinaziun federala che limitescha il dumber dals esters (OLE), ha la regenza rendì attent il cussegl federal als problems dals chantuns da muntogna e da turissem da recrutar persunal e pretendì ina admissiun contingentada da forzas da lavur qualifitgadas or dals uschenumnads pajais ch'èn intenziunads d'entrar en la UE. Il cussegl federal ha signalisà cler e bain ch'ina tala admissiun vegnia en dumonda pir suenter ch'ils contracts bilaterals èn en vigur e ch'ella stoppia sa restrenscher a lavurants fitg qualifitgads. El ha motivà questa politica cun las experientschas fatgas a chaschun da la recessiun dals onns 90 che ha purtà a l'economia svizra dieschmillis da lavurants esters pauc qualifitgads. Ultra da quai vul el far frunt a temas da surpopulaziun cun esters ed ulteriuras iniziativas da 18%, savend che l'acceptaziun d'ina tala iniziativa avess consequenzas catastrofalas per ils chantuns da muntogna e da turissem.

    3. A curt termin ha la pretensiun d'admissiun da lavurants auxiliars ord pajais ch'èn intenziunads d'entrar en la UE strusch schanzas da pudair reussir. Er il departament da l'economia publica dal chantun Vallais na pretenda betg l'admissiun senza restricziun da lavurants auxiliars, mabain la „discussiun davart adattaziuns che duessan resguardar ils criteris qualitativs da la OLE“. La regenza è conscienta da la muntada dal turissem per il chantun Grischun ed observa exactamain la situaziun dal martgà da lavur. Tut tenor il svilup da quest martgà da lavur vegn la regenza a sa drizzar al cussegl federal cun novas pretensiuns. Alura sto dentant vegnir cumprovà che las pussaivladads existentas sajan vegnidas exauridas. Latiers appartegna sper las stentas da recrutar persunal er l'augment da l'attractivitad da las plazzas da lavur. Cun l'auzament da las pajas minimalas ha l'hotellaria fatg in impurtant pass en quella direcziun.

    4. La regenza ha pretendì ils davos onns pliras giadas in'admissiun pli generusa da lavurants ord ils pajais dals Stadis Unids da l'America, da Canada, da l'Australia e da la Nova Zelanda. La regenza sustegna perquai l'occupaziun a temp limità da studentas e students da quests pajais.