Navigation

Inhaltsbereich

Postulat concernent la colliaziun da las diversas purschidas da la cussegliaziun da scola e d'educaziun e dals differents servetschs da terapia per uffants e giuvenils

Sessiun: 10.10.2001
Als uffants e giuvenils cun problems da scola u autras difficultads stat a disposiziun ina purschida differenziada da pussaivladads da cussegliaziun e da terapia en il chantun Grischun. Questas purschidas èn daventadas pli e pli impurtantas en il decurs dals ultims decennis. En cas da problems tschertgan ils geniturs ed il persunal d'instrucziun pli e pli savens l'agid da persunas dal fatg. Quai è adina puspè collià cun temps da spetga pli lungs, quai che po chaschunar en il cas singul grondas grevezzas tar ils pertutgads.
La cussegliaziun da scola e d'educaziun è organisada en il servetsch psicologic da scola (SPS) sco post da servetsch dal departament d'educaziun. Ultra da la cussegliaziun da famiglias, da geniturs, dal persunal d'instrucziun, da las mussadras e d'auters pertutgads presta il SPS savens lavur individuala cun uffants e giuvenils en il rom da problems da scola u d'autras difficultads persunalas. Il servetsch da pedagogia curativa dal Grischun (SPC) è organisà sco fundaziun. L'indemnisaziun per sias expensas succeda tras la AI ed il chantun. Il servetsch psi-chiatric per uffants e giuvenils dal Grischun (SPUG) è medemamain ina fundaziun che vegn principalmain finanziada dal chantun. En ils ambulatoris da Cuira, Tavau, Glion e Tusaun vegnan uffants e giuvenils cun disturbis dal cumportament e da la prestaziun tractads en sesidas singulas. Uffants en la vegliadetgna da scola che dovran pervia da lur disturbis dal cumportament e da la prestaziun in tractament en ina clinica dal di u in tractament staziunar pon vegnir recepids en la chasa da terapia Fürstenwald (18 plazs).
Ord vista dal pertutgà che tschertga agid è la structura da la purschida actuala savens memia pauc transparenta. Savens passa memia bia temp fin ch'igl è fixà tge instituziun ch'è cumpetenta. La purschida existenta fiss orientada meglier als basegns da la clientella sch'i dess per l'entir chantun in sulet post da consultaziun (per exempel tar il SPS). Quest post pudess far senza perder temp tant la triascha sco er la coordinaziun per l'attribuziun da l'entira purschida da cussegliaziun e da terapia.
La regenza vegn envidada da controllar las structuras da las purschidas menziunadas sin il sectur d'agid, da cussegliaziun e da terapia e da restructurar questas en in emprim pass uschenavant che tut las purschidas stattan a disposiziun via in sulet post da consultaziun. En in segund pass duessan las incumbensas menziunadas vegnir unidas en il medem departament sut in sulet tetg.

Cuira, ils 10 d'october 2001

Name: Jäger, Scharplatz, Demarmels, Ambühl, Arquint, Augustin (Almen), Barandun, Beck, Biancotti, Bühler, Butzerin, Cahannes, Carisch, Catrina, Cavegn, Cavigelli, Christ, Dalbert, Dermont, Donatsch, Feltscher, Frigg, Geisseler, Giuliani, Gubelmann, Hanimann, Hardegger, Hübscher, Hug, Kessler, Lardi, Locher, Loepfe, Looser, Maissen, Marti, Meyer, Nick, Noi, Pfenninger, Pfiffner, Portner, Robustelli, Roffler, Sax, Schmid (Spleia), Schmutz, Schütz, Stiffler, Suenderhauf, Suter, Thomann, Tremp, Trepp, Tuor (Trun), Valsecchi, Walther, Zanolari, Zegg, Zindel

Session: 10.10.2001
Vorstoss: rg Postulat


Resposta da la regenza

Sco ils postulants explitgeschan correctamain exista en il chantun Grischun cun il servetsch psicologic da scola (SPS), il servetsch da pedagogia curativa (SPC) sco
er cun il servetsch psichiatric per uffants e giuvenils (SPUG) ina purschida profes-
siunala da pussaivladads d'agid, da cussegliaziun e da terapia. Las persunas che tschertgan agid manchentan dentant savens la necessaria transparenza.

Sin fundament da l'attribuziun dals pensums en il departament d'educaziun, cultura e protecziun da l'ambient (DECA) è il SPS suttamess a l'uffizi per secturs spezials da scola, USS (cfr. l'art. 3 da l'ordinaziun davart il SPS). L'USS è sco post executiv en il sectur da la lescha d'impedids er l'instanza da coordinaziun e da surveglianza per il SPC (cfr. l'art. 12 da las disposiziuns executivas tar la lescha d'impedids). Puncts cuminaivels tar l'USS datti er da vart dal SPUG perquai ch'il SPUG è renconuschì tant da l'assicuranza d'invalids sco er dal chantun sco instanza cun dretg da proposta per mesiras spezialas da scolaziun e purtader d'ina scola speziala cun ina purschida psichiatrica per uffants e giuvenils (chasa da terapia Fürstenwald). Per la part medicinala dal SPUG è il departament da giustia, polizia e sanitad l'autoritad da surveglianza (cfr. l'art. 6 al. 1 e 3 da la lescha da sanitad). Per las dumondas da subsidis pertutgant il SPUG è responsabel l'uffizi da sanadad.

En singulas situaziuns da cussegliaziun pon vegnir en dumonda per la medema incumbensa dus u schizunt tuts trais servetschs da cussegliaziun (p.ex. scleriment da la dumonda da scolarisaziun en cas d'in uffant cun disturbis massivs da cumportament en la vegliadetgna prescolara). En talas situaziuns s'occupa per il solit l'ins-
tanza da cussegliaziun ch'è vegnida contactada en il cas concret dal problem da la persuna pertutgada. Cunzunt las attribuziuns e las sferas da cumpetenza, ma er ils puncts cuminaivels dals servetschs numnads cun l'USS èn memia pauc enconuschents en il ravugl dals pertutgads sco per exempel tar las autoritads, las organisaziuns da cussegliaziun sco er tar ils medis. Perquai duain vegnir examinadas las structuras per cuntanscher ina meglra transparenza e per nizzegiar meglier las sinergias.

La regenza è pronta da prender encunter il postulat e d'examinar a vista mesauna la structura da las purschidas d'agid, da cussegliaziun e da terapia menziunadas e da sclerir sch'i fiss pussaivel da coordinar tut las purschidas via in post da consultaziun unifitgà. Plinavant duai er vegnir intercurida la pussaivladad d'unifitgar ils pensums numnads en il medem departament sut il medem tetg. En cas d'in transferiment da las sferas da cumpetenza stuess ins surtut er tegnair en egl las consequenzas persunalas. Igl è perencunter da desister d'endrizzar in post da coordinaziun entaifer in post da cussegliaziun effectiv (p.ex. tar il SPS) per prevegnir uschia a conflicts d'interess.