Dumonda en scrit concernent la cumpensaziun dals deficits linguistics a la scol'auta professiunala da pedagogia
Sessiun: 10.10.2001
Las futuras studentas ed ils futurs students da la scol'auta professiunala da pedagogia vegnan a disponer, sin fundament da lur furmaziun preliminara da differentas cumpetenzas linguisticas. En l'emprima lingua rumantsch e talian s'inscuntran student(a)s cun ina maturitad bilingua cun 8 lecziuns da rumantsch per emna (emprima lingua + 4 roms d'immersiun) cun maturandas e maturands cun 2 lecziuns da rumantsch per emna sco er cun absolvent(a)s da la maturitad professiunala.
Per pudair garantir ina buna scola rumantscha e taliana ston las futuras magistras ed ils futurs magisters disponer d'ina auta cumpetenza linguistica sco emprima premissa.
Oz frequenta gia la terza annada da las futuras studentas e dals futurs students da la scol'auta professiunala da pedagogica il gimnasi e nagin sa en tge maniera ch'i duain vegnir cumpensads ils deficits ch'èn la consequenza da la differenta furmaziun linguistica.
È la regenza pronta da decider e d'infurmar immediatamain co ch'i vegn garantida la cumpetenza linguistica e tge consequenzas che quai ha per scolaras e scolars che vulan entrar en la scol'auta professiunala da pedagogia?
Cuira, ils 10 d'october 2001
Name: Dermont
Session: 10.10.2001
Vorstoss: rg SchriftlicheAnfrage
Resposta da la regenza
La regenza è da la medema opiniun sco l'interrogatur, numnadamain ch'ina auta cumpetenza da l'emprima lingua è ina cundiziun essenziala per ina instrucziun cun success. Perquai vegn dà gronda paisa a quest champ durant la scolaziun a la scol'auta professiunala da pedagogia (SAP).
En l'art. 8 da la lescha davart la scol'auta professiunala da pedagogia è fixà che la regenza relascha disposiziuns davart l'admissiun spezialmain er da glieud da professiun. La regenza ha schlargià essenzialmain la basa da recrutaziun per il futur persunal d'instrucziun cun il conclus da promover l'admissiun da titularas e titulars d'ina maturitad professiunala, d'in diplom d'ina scola media da diplom u d'in diplom d'ina scola media commerziala. Quest avantatg ston ins uss trair a niz per la scola publica dal Grischun. L'instrucziun sto tegnair quint da questa circumstanza entant ch'ella resguarda la differenta furmaziun linguistica preliminara dals students en sia purschida d'instrucziun. Decisiv èsi che la cumpetenza linguistica saja garantida cun l'entschatta da la vita professiunala, pia a la fin da la scolaziun a la SAP.
La regenza prenda suandantamain posiziun tar las dumondas:
Che las persunas d'instrucziun han da disponer d'ina auta cumpetenza linguistica
en l'emprima lingua (tudestg, talian u rumantsch) sco er en ina segunda lingua chantunala è ina premissa a la scol'auta professiunala da pedagogia e correspun-
da a las pretensiuns dal plan d'instrucziun da la scola publica. Entant che la scola-
ziun fin uss al seminari sin il stgalim secundar II vegn purschida en partiziuns tudestgas, rumantschas e talianas, duain ils students a la SAP - ch'è d'attribuir al
sectur da la scol'auta - vegnir instruids en la dotaziun da lecziuns equilibrada en l'emprima lingua talian resp. rumantsch ed en la segunda lingua tudestg. La cum-
petenza linguistica necessaria vegn segirada sco suonda:
1. La furmaziun preliminara en l'emprima lingua ed en la segunda lingua chantunala vegn examinada al mument da l'entrada en la SAP.
2. Per students che na disponan betg da las cumpetenzas linguisticas necessarias a l'entschatta dal studi vegn messa a disposiziun ina purschida da curs preparatoris, da sustegn e da promoziun che duai pussibilitar da cuntanscher il nivel necessari enfin la terminaziun dal studi.
3. Tant en l'instrucziun a la SAP sco er durant ils praticums èn l'emprima lingua e la segunda lingua chantunala d'applitgar commensuradamain.