Navigation

Inhaltsbereich

Interpellaziun concernent l'utilisaziun futura da la caserna a Cuira

Sessiun: 10.10.2001

Il chantun Grischun s'engascha en pliras furmas per la promoziun da l'economia. La finamira da la promoziun da l'economia è da vegnir en il Grischun cun plazzas da lavur e cun chapital d'investiziun.
Sco ch'igl è generalmain enconuschent reducescha l'armada en il rom da la refurma da l'armada l'occupaziun dals stabiliments en il Grischun. La caserna da Cuira vegn er ad esser pertutgada da quai. En divers models da pensar han ins gia discurrì da spustar la caserna pli datiers als plazs d'exercizi sin il Rossboden. Ina construcziun nova d'ina caserna a Cuira stgaffiss meds e plazzas da lavur.
La caserna a Cuira sa chatta amez la citad ed occupa ensemen cun las localitads dal PAA ed ils areals da las hallas ina surfatscha ch`è interessanta per la citad e per il chantun. Quella surfatscha da terren stess a disposi-ziun per in'autra utilisaziun sche la caserna vegniss bajegiada sin il Rossboden. Quai purtass danovamain plazzas da lavur e chapital d'investiziun en il Grischun.
Sin fundament da quella situaziun da partenza preschentan ils interpellants las suandantas dumondas a la regenza:
1. È il chantun er da l'opiniun che la surbajegiada da l'areal da la caserna ed ina construcziun nova da la caserna sin il Rossboden mettessan en moviment considerabels chapitals d'investiziun?
2. Po il chantun s'imaginar d'elavurar ensemen cun la citad da Cuira in studi d'utilisaziun per questa parcella ch'è impurtanta ord vista da la promoziun da l'economia? Fiss il chantun pront da discurrer sur dals resultats cun la confederaziun?
3. Mancan al chantun en il futur localitads da biro, da scolaziun, da tgira e.u.v.?
4. Co giuditgescha il chantun la pussaivladad da duvrar tschertas surfatschas da biro e da cuvrir futurs basegns da biro sin l'areal da la caserna u sco locatari d'in investitur grond u alura sco proprietari?

Cuira, ils 10 d'october 2001

Name: Marti, Casanova (Cuira), Tscholl, Augustin (Cuira), Bachmann, Bär, Berther, Brunold, Bucher, Büsser, Cahannes, Casanova (Vignogn), Caviezel, Christ, Claus, Conrad, Crapp, Dalbert, Demarmels, Donatsch, Giovannini, Giuliani, Hanimann, Jäger, Juon, Keller, Kessler, Lardi, Meyer, Nick, Peretti, Pfiffner, Rizzi, Roffler, Scharplatz, Schmid (Spleia), Schütz, Suter, Telli, Trepp, Tuor (Mustér), Zanolari

Session: 10.10.2001
Vorstoss: rg Interpellation


Resposta da la regenza

Dapi insaquants mais èsi sin fundament da rapports correspundents da medias enconuschent a la publicitad che l'effectiv da l'armada XXI vegn reducì per la mesadad en cumparegliaziun cun l'armada 95. Quai ha consequenzas concretas sin l'occu-
paziun e l'utilisaziun da las casernas e da las plazzas da tir en l'entira Svizra. Tenor il stadi actual da la planisaziun vegn la plazza d'armas a Cuira ad esser duvrada pli fitg che fin qua, betg il davos pervia da sia buna infrastructura e pervia da las plazzas d'exercizi per part fitg idealas en noss chantun. En auters lieus vegnan tschertgadas novas pussaivladads d'utilisaziun per casernas ch'èn pli novas che quella da Cuira damai che questas casernas na vegnan betg pli duvradas uschè savens u na vegnan betg pli duvradas per lur intent oriund.

En vista a quella situaziun da partenza èsi silmain intschert sche la confederaziun è pronta da bajegiar ina nova caserna sin il Rossboden sche autras casernas èn il medem mument vidas.

Las dumondas pon vegnir respundidas suandantamain:

    1. Ina construcziun nova d'ina caserna sin il Rossboden ed ina surbajegiada da l'areal odiern da la caserna chaschunass senza dubi grondas investiziuns. Oravant tut fiss dentant da sclerir il basegn. Medemamain fiss d'examinar l'emprim sche il stabiliment a la Via da la caserna ch'è vegnì bajegià en ils onns 1880 fin 1887 da l'architect Johannes Ludwig pudess vegnir demolì senz'auter.


    2. L'elavuraziun d'in studi d'utilisaziun ensemen cun la citad da Cuira na maina - ord vista dal chantun - betg ad ina finamira. Il chantun sez na vesa oz nagin basegn per la surfatscha da construcziun en la citad da Cuira. Dal reminent stuess tenor l'opiniun da la regenza vegnir collavurà directamain en questa chaussa tranter la citad da Cuira e la confederaziun sco possessura da l'areal.

    3. Dumondas tar ils posts responsabels cumpetents han mussà ch'il chantun n'ha betg in grond basegn essenzial per ulteriuras surfatschas da biro, da scolaziun e da tgira en il proxim futur. Il basegn usità ch'è enconuschent sin fundament da las experientschas da plirs onns po vegnir realisà durant ils proxims onns sin parcellas dal chantun.

    4. Cunquai ch'il chantun ha garantì il basegn per localitads da biro per ils proxims onns resp. po garantir quel sin parcellas dal chantun n'exista ord vista dal chantun nagin basegn da s'engaschar sco investur u sco locatari en ina surbajegiada „Kasernenareal“.