L'art. 53 al. 1 da la lescha davart las scolas popularas dal chantun Grischun (lescha da scola) determinescha ch'il chantun haja da prestar contribuziuns a scolas publicas vi da la nova construcziun, la renovaziun cumpletta e l'engrondiment da chasas da scola, vi da stabiliments da gimnastica sco er per acquistar mobigliar da scola e meds d'instrucziun generals che vegnan cumprads en connex cun edifizis. Sco ch'i vegn exprimì gistamain en la moziun, na cumpiglia la legislaziun vertenta da scola nagina basa legala per pajar contribuziuns chantunalas vi dals fits-chasa da stabiliments da scola. La moziun inoltrada ha la finamira da fixar en la lescha da scola la pussaivladad da pudair pretender contribuziuns chantunalas en cas ch'ils purtaders da scola prendan a fit a pli lunga vista localitads adattadas per l'instrucziun a las scolas popularas. En la pratica succeda quai fitg darar che purtaders da scola prendan a fit localitads estras. Ina locaziun succeda il pli savens sco soluziun transitoria en connex cun novs edifizis da scola u extensiuns da stabiliments da scola. En quests cas na paja il chantun naginas contribuziuns.

Er en il champ d'applicaziun da la lescha da scolina che prevesa en l'art. 27 al. 4 ch'i saja da pajar en cas motivads ina contribuziun chantunala er vi dals fits-chasa d'edifizis datti be cas singuls, en ils quals il chantun paja talas contribuziuns als purtaders da scolinas, sch'il fit chaschuna pli paucs custs ch'in edifizi nov u in engrondiment, resguardond la tariffa da subvenziun per edifizis.

Avend conuschientscha da quests fatgs na para il basegn d'agir d'esser ni grond ni urgent. Sut ils puntgs da vista economics poi dentant esser raschunaivel en cas particulars e sut tschertas premissas da conderscher contribuziuns chantunalas vi dals fits-chasa da stabiliments da scola. Quai è il cas, sche - empè d'in edifizi nov, d'ina renovaziun e d'in engrondiment - ils fits-chasa per singuls stabiliments adattads als basegns da la scola fissan pli favuraivels e sche las pretaisas vi d'ina instrucziun confurma al plan d'instrucziun en las parts correspundentas dal stabiliment vegnan ademplidas cumplainamain. Da la subvenziun dals fits-chasa na resultan per il chantun probablamain nagins custs supplementars. Da quest puntg da vista èsi tenor l'a-
vis da la regenza giustificabel da fixar en la lescha da scola ina basa correspunden-
ta per contribuziuns.

Per pudair realisar las prestaziuns da contribuziuns dal chantun en connex cun soluziuns da locaziun per stabiliments da scola e da sport da scola dovri ina revisiun da la lescha da scola, in'adattaziun da l'ordinaziun davart la construcziun e l'endrizzament da stabiliments da scola e da sport da scola sco er las directivas respectivas.

Dal puntg da vista da la regenza èsi da dir ch'ins tracta da preschent en differents departaments ina seria d'examinaziuns concernent contribuziuns chantunalas sin il sectur da la scola populara ch'èn sa resultadas da postulats respectivs e directivas dal cussegl grond. Latiers tutgan er ina revisiun previsa da l'ordinaziun davart la salarisaziun da las persunas d'instrucziun, il project per examinar las incumbensas en l'administraziun chantunala sco er il project per examinar las contribuziuns chantunalas. En l'interess da las revisiuns e repassadas da projects che stattan en ina relaziun concernent lur cuntegn èsi perquai inditgà da proceder a moda coordinada cun la finamira d'instradar la medema via.

La regenza beneventa il giavisch fundamental da l'intervenziun parlamentara e sa declera pronta d'acceptar questa sco moziun en il senn da las consideraziuns surmenziunadas. La regenza è pronta da suttametter al cussegl grond a temp vulì ina midada correspundenta da la lescha da scola.