Navigation

Inhaltsbereich

Dumonda en scrit concernent in center da controlla dal traffic da camiuns pesants sper la A 13

Sessiun: 10.10.2001
Per las controllas dal traffic da camiuns pesants ch'èn supplementarmain necessarias pervia da l'introducziun da la TCPTP duai vegnir installà, sco quai che resorta dal plan directiv chantunal, in center da controlla dal traffic da camiuns pesants en la regiun da Giuvaulta.

Jau supplitgesch la regenza da respunder las dumondas che stattan en quest connex:

1. Han ins, ultra da Giuvaulta, tratg en consideraziun anc auters lieus per quest center da controlla dal traffic da camiuns pesants?
2. Dovri in'ulteriura sortida d'autostrada per quest center?
3. Sche quai duess esser il cas: co giuditgescha la regenza la problematica da 4, en cas d'ina eventuala construcziun dal restaurant d'autostrada Viamala schizunt 5 access a l'autostrada sin var 8 km lunghezza sin la A 13 en la regiun da Tumleastga/Tusaun?
4. Co sa preschenta il plan da termins per la realisaziun da quest plaz?
5. Tge elements duai cuntegnair quest center da controlla dal traffic da camiuns pesants e quants lieus da staziunament per camiuns èn previs?
6. È quest plaz er previs sco eventuala zona da spetga per camiuns?

Cuira, ils 10 d'october 2001

Name: Augustin (Almen)

Session: 10.10.2001
Vorstoss: rg SchriftlicheAnfrage


Resposta da la regenza

Davart il center da controlla dal traffic da camiuns pesants en Tumleastga pudain nus dir il sequent:

    1. Dasper il lieu a Giuvaulta previs en il sboz dal plan directiv n'han ins tratg en consideraziun nagins auters lieus per in center da controlla dal traffic da camiuns pesants en Tumleastga.

    2. L'avertura dal center da controlla dal traffic da camiuns pesants planisà succeda sur l'access existent da Giuvaulta.

    3. In ulteriur access a l'autostrada naziunala n'è betg necessari.

    4. Il project d'exposiziun è vegnì preschentà a l'uffizi federal da vias (UVIAS) per l'approvaziun. Il medem mument ha la confederaziun incumbensà ina gruppa da lavur cun l'incarica d'elavurar ina concept per l'entira Svizra per la construcziun da centers da controlla. Essend ch'il rapport final correspundent n'è anc betg avant maun ha l'UVIAS suspendì ad interim l'examinaziun dal project inoltrà. Cun il conclus en chaussa èsi da quintar il pli baud l'entschatta 2002. Ulteriuras indicaziuns dals termins n'èn da preschent betg pussaivlas.

    5. Quest implant cuntegna dasper la chasa da manaschi d'in plaun ina stadaira da camiuns per las controllas da la paisa sco er in foss da controlla cun in tetg per controllar ils frains ed ulteriurs equipaments tecnics. Plinavant è previs in plaz da deposit per pudair stgargiar la surpaisa ed in parcadi per 8 autos da persunas per il persunal dal manaschi. Per il traffic pesant ch'è da controllar stattan a disposiziun 13 parcadis.

    6. En il concept da stagnaziun dal traffic da la polizia da traffic n'è betg cumpiglià il center da controlla dal traffic perquai ch'il plaz che stat a disposiziun e memia pitschen.