Navigation

Inhaltsbereich

Dumonda en scrit concernent las mesiras da protecziun cunter attatgas biologicas en noss chantun

Sessiun: 11.10.2001

Ils eveniments dal davos temp sin plaun internaziunal e naziunal mussan ch'er noss pajais, sco tut tschels, po esser pertutgà d'incidents che pon periclitar la segirezza e schizunt la vita da ses abitants.

Tenor ils pleds dal manader dal laboratori federal da bacteriologia ch'è s'exprimì en las transmissiuns da la "Tagesschau" da mardi, ils 9 d'october 2001, èn las mesiras da controlla e da protecziun en cas d'attatgas biologicas chaussa dals chantuns.

Perquai dumond jau la ludaivla regenza:

    1. A) Vegnan fatgas controllas en noss chantun concernent la protecziun cunter armas biologicas?
B) En cas da gea, tge cumpiglian talas controllas?

    2. A) Èn previsas acziuns sanitaras da grondas dimensiuns en il cas d'ina attatga biologica?
B) En cas da gea, da tge gener èn questas acziuns e co vegnan ils organs da sanitad preparads per in tal incident?

Cuira, ils 11 d'october 2001

Name: Noi

Session: 11.10.2001
Vorstoss: rg SchriftlicheAnfrage


Resposta da la regenza


Durant ils ultims dis e las ultimas emnas ha la cumparsa da scherms infectus da la fevra antraxa chaschunà ina gronda malsegirezza tar la populaziun, l'emprim en ils Stadis Unids, alura er en Europa. Er en il Grischun han uschenumnads delinquents imitaturs tramess spediziuns da posta cun in cuntegn en furma da puder. En il cas da l'uffizi da posta dal Kornquader a Cuira han ins posteriurmain identifitgà la pulvra alva sco amet da tirc. Ulteriurs eveniments da quest gener en il Grischun vegnan da preschent examinads.

Tenor l'avis da la regenza datti da patratgar fitg che delinquents imitaturs sajan stads activs er en il Grischun. I na dettia dentant nagin motiv da vegnir en panica. A quest fatg renda attent er l'uffizi federal da sanitad en ina directiva davart il contact cun antrax e cun autras smanatschas cun substanzas activas biologicas (agents).

Il scherm infectus d'antrax, la bacteria "bacillus anthracis", respectivamain ses sparuns, pon chaschunar infecziuns da la pel, dal tract digestiv u dal lom. Per cuntanscher quai sto l'organissem vegnir sfruschà en pel scurtgada u en plajas u el sto vegnir traguttà u inhalà sco pulvra fina. La malsogna po vegnir tractada ad uras cun antibiotica correspundenta. Antrax n'è betg transmissibel d'in uman a l'auter.

Las dumondas pon vegnir respundidas sco suonda:

1. a) En temps senza eveniments particulars (cas normal) vegn examinada la toxicitad da victualias, dal provediment d'aua e d'auters secturs da l'ambient periodicamain e cun provas da controlla tras ils uffizis cumpetents. En cas extraordinaris vegnan fatgas ulteriuras controllas sistematicas en connex cun l'eveniment. Apparats correspundents da mussament èn avant maun. Per la realisaziun da controllas cunter armas biologicas n'hai fin uss dà nagina raschun en il chantun Grischun.

b) Las controllas vegnan fatgas en emprima lingia tras spezialists dal laboratori chemic, da l'uffizi per l'ambient e da l'uffizi da veterinari. Las prelevaziuns da prova vegnan fatgas da persunal qualifitgà cun scolaziun speziala da quests uffizis, resguardond las mesiras da precauziun necessarias. Il laboratori veterina bacteriologic dispona da las pussaivladads professiunalas e tecnicas da cumprovar l'existenza da scherms infectus da la fevra antraxa tant vi da la prova sco er en la cultura. Quest uffizi dispona d'ina unitad mobila da dischinfecziun che po vegnir duvrada per decontaminar il lieu nua ch'igl è succedì in donn.

2. a) En il cas d'in attentat biologic concret èn pussaivlas intervenziuns sin in vast stgalim sanitar. Ils princips dal servetsch da sanitad coordinà en il cas da catastrofa prevesan in'acziun specifica da tut ils partenaris dal sectur da medischina e dal servetsch sanitar. Qua ston ins patratgar a l'acziun da teams da dischintoxicaziun, al manaschi da posts da sanitad e posts da dischintoxicaziun, integrond er ils posts da servetsch sanitar da la protecziun civila, a l'utilisaziun dals centers d'operaziun protegids en ospitals u eventualmain a l'endrizzament d'ospitals d'urgenza avanzads cun staziuns da dischintoxicaziun.

b) En il cas da catastrofa sto l'apparat sanitar vegnir transfurmà per correspunder als basegns specifics dal cas concret e sto vegnir equipà e cumplettà cun il material necessari or dals effectivs da la protecziun civila e da l'armada. A medem temp èn da tegnair liber capacitads da persunal e da letgs sco er d'endrizzar posts da triascha, da tractament e da giaschair. Quai pudess chaschunar restricziuns dals decurs individual-medicinals per pudair dumagnar ina gronda quantitad da persunas tissientadas e blessadas. Cunter substanzas biologicas vegni ultra da quai intervegnì cun agid da proceduras da dischintoxicaziun ed injecziuns da cuntraremedis.