Navigation

Inhaltsbereich

Interpellaziun concernent la participaziun finanziala dal chantun a la visita da la EXPO da las scolas popularas grischunas

Sessiun: 26.11.2001
Dals 15 da matg fin ils 20 d'october 2002 ha lieu en il territori dals trais lais (Lai da Neuchâtel, Lai da Bienna, Lai da Murten) l'exposiziun naziunala "EXPO.02". En il program annual 2002 da la regenza vegn menziunada medemamain la EXPO 2002. En il rom dal di dal chantun duai esser preschent il chantun Grischun.
In'exposiziun naziunala è er cunzunt per la giuventetgna in grond eveniment ed ina pussaivladad d'inscuntrar nua ch'ils giu-venils pon barattar experientschas. Gia a chaschun da las exposiziuns naziunalas da pli baud viagiavan bleras classas da scola dal Grischun tar ils loghens d'exposiziun.
Per fortuna exista per las scolas a la EXPO 2002 ina purschida speziala relativamain attractiva. En il pretsch da 48 francs èn cumprais l'entrada sco er il viadi cun ils meds da transport publics (independentamain da la distanza!). Divers chantuns han concludì da sa participar vi dals custs da la visita da lur classas a la EXPO. Uschia surpiglian per exempel en il chantun da Berna il chantun e las vischnancas mintgamai ina terza dal pretsch da 48 francs. En il chantun da Lucerna è previs ch'il chan-tun e las vischnancas surpiglian mintgamai ina quarta dal pretsch. Cun quai tutgan là custs da 24 francs als autorisads d'educar; ils custs dal nutriment ed ils ulteriurs custs n'èn naturalmain betg inclus en quest pretsch. En auters lieus ha il maun public schizunt concludì da surpigliar tut ils custs da la visita da las classas da scola a la EXPO (citad da Son Gagl, chantun Zug). Per diversas scolas grischunas è colliada sfurzadamain la visita a la EXPO cun ina pernottaziun, e quai sin fundament da la distanza da viadi. Bain datti en quest reguard purschidas favuraivlas, p. ex. en implants da protecziun civila. Tuttina èsi inditgà gist en noss chantun ch'il chantun paja confurm als exempels d'auters chantuns ina contribuziun da viadi.
Ils sutsegnads tschentan a la regenza las suandantas dumondas:
1. È er il chantun Grischun pront da sa participar vi dals custs da las visitas dal onn proxim a la EXPO da las classas da scola dal Grischun almain en l'autezza da las contribuziuns numnadas dals chantuns da Berna e da Lucerna?
2. Pon las classas da scola ord las valladas grischunas che han in lung viadi quintar cun ina contribuziun supplementara?

Cuira, ils 26 da november 2001
Name: Schütz, Pfiffner, Jäger, Berther (Mustér), Cathomas, Cavigelli, Dermont, Frigg, Giuliani, Gubelmann, Koch, Locher, Looser, Luzio, Meyer, Noi, Quinter, Righetti, Sax, Schmutz, Trepp, Zanolari, Zindel

Session: 26.11.2001
Vorstoss: rg Interpellation

Resposta da la regenza

La regenza grischuna considerescha ina visita da l'exposiziun naziunala da nossas scolas popularas per significativa e bainvegnida. I n'è dentant betg l'incumbensa dal chantun da subvenziunar ils viadis da scola a la Expo.02. Igl è chaussa dals purtaders da la scola populara d'organisar, da preparar ed er da subvenziunar ils viadis.

D'impurtanza particulara per il chantun Grischun è il di uffizial dal chantun a la Expo.02, ils 31 d'avust 2002. Il chantun sa participescha a quel cun ina contribuziun finanziala dad 850'000 francs. La contribuziun principala da noss chantun en la summa dad 1.4 milliuns francs per la Expo.02 cula en il project d'exposiziun cuminaival dals chantuns da la Svizra orientala "aua extrema extreme Wasser" ch'è perceptibel sin la arteplage a Neuchâtel. Plinavant sa participescha il chantun Grischun a lavurs da translaziun rumantschas en connex cun la Expo.02.

La regenza piglia suandantamein posiziun tar las dumondas:

1. Il chantun na paja naginas contribuziuns regularas a las classas da las scolas grischunas vi dals custs da las visitas a la Expo, perquai ch'i manca la basa legala per la participaziun dal chantun als viadis da scola. Consequentamain n'è betg vegnida fatga ina budgetaziun per l'onn da gestiun 2002. Ina participaziun dal chantun cun 24 francs per scolar avess sulettamain per consequenza expensas da scola populara en l'autezza da circa in mez milliun.
L'organisaziun e la concepziun pli stretga da las activitads da la scola populara cumpetan per il solit a las vischnancas resp. als purtaders da las scolas. Ils purtaders pon sbursar contribuziuns per viadis da scola, excursiuns, emnas da project.

2. Il chantun na presta nagina contribuziun supplementara per il viadi extremamain lung da las classas da las scolas popularas ord las valladas grischunas. En collavuraziun cun ils responsabels da la Expo ed il departament d'educaziun, cultura e protecziun da l'ambient han ins pudì cuntanscher in cler meglierament da la "purschida dal di" che va er en favur da las scolas grischunas. La purschida dal di per 48 francs è concepida uschia ch'ella è valaivla per tut las classas da scola dal Grischun durant 2 fin 3 dis e cumpiglia in di da visita a la Expo.02 Cun questa purschida speziala vegn resguardà il lung temp impundì che resulta per las classas da scola grischunas per il viadi d'ir e turnar.