Navigation

Inhaltsbereich

Dumonda en scrit concernent l'integraziun da las dunnas en il project "200 onns adesiun dal Grischun a la Confederaziun" a chaschun da las festivitads da giubileum 2003

Sessiun: 26.11.2001
En connex cun las festivitads da giubileum 2003 ha la regenza incumbensà Mariano Tschuor cun la direcziun dal project "200 onns adesiun dal Grischun a la Confederaziun". Il concept general cun il titel "chaus e culms" elavurà dad el cumpiglia diffe-rents projects. Il pensum principal da la direcziun dal project è d'elavurar in concept detaglià cun preventiv per ils singuls projects, la furmaziun tematica ed exteriura dals singuls projects e la realisaziun da quels e la surveglianza dals custs. Quest project vegn dirigì strategicamain e surveglià d'ina cumissiun da coordinaziun. Questa cumissiun sa cumpona da sis umens. Ils pensums principals da questa cumissiun èn l'approvaziun dal concept detaglià, la supervisiun e la controlla sco er la garan-zia da la circulaziun d'infurmaziuns tranter la direcziun dal project e la politica.
En quest connex sa dattan las suandantas dumondas:
1. Ha la regenza er tratg en consideraziun ed examinà tar l'occupaziun da la direcziun dal project ina co-direcziun d'ina dunna e d'in um?
2. Ord tge motivs n'ha nagina dunna fatg part da la giunta directiva?
3. Èsi garantì ch'er "chaus da dunnas" vegnian integrads en la realisaziun dal project?
4. È la regenza pronta en quest reguard da collavurar cun las organisaziuns da dunnas da noss chantun?

Cuira, ils 26 da november 2001
Name: Meyer

Session: 26.11.2001
Vorstoss: rg Schriftliche Anfrage

Resposta da la regenza

Cun la suttascripziun da l'acta da mediaziun ils 19 da favrer 1803 entras Napoleun I. a Paris è vegnì integrà il chantun Grischun ensemen cun tschintg auters chantuns (Argovia, Turgovia, Son Gagl, Tessin e Vad) en la Confederaziun. La regenza ha concludì da commemorar quest eveniment dal bicentenari l'onn 2003 cun festivitads da giubileum particularas. Cun la direcziun dal project è vegnì incumbensà Mariano Tschuor, manader da redacziun per las spartas cultura populara e teater tar la televisiun svizra DRS. La direcziun lavura autonomamain ed independentamain dal chantun sin la basa dal concept general approvà. Quest project vegn accumpagnà strategicamain e surveglià d'ina cumissiun da coordinaziun sut il copresidi dals cussegliers guvernativs Stefan Engler e Claudio Lardi.

Parallelmain a questas festivitads da giubileum "uffizialas" ha la regenza approvà en occasiun dal giubileum 2003 ulteriurs projects, tranter quels il project scientific "dunnas en il Grischun" cun ina contribuziun da 360'000 francs sco er il project "participaziun politica da las dunnas sin plaun chantunal" cun ina contribuziun da 50'000 francs. Per la regenza èsi stà cler da l'entschatta ennà ch'uschenumnads "projects da dunnas" duajan avair ina impurtanza particulara en il rom da las festivitads da giubileum.

Suenter questas remartgas preliminaras pudain nus respunder suandantamain las dumondas:

1. Tar occupar il post da la direcziun dal project è stada en il center, independentamain da las dumondas da la schlattaina, la qualitad dal candidat. Per la nominaziun da Mariano Tschuor èn stadas decisivas sias experientschas professiunalas respectivas, l'existenza d'ina rait da relaziuns, las cumpetenzas linguisticas e.u.v. Ina codirecziun d'ina dunna e d'in um n'è betg vegnida tratga en consideraziun.

2. La cumposiziun da la cumissiun da coordinaziun è sa dada sin fundament da las funcziuns che quellas persunas han en l'administraziun chantunala. Nominads eran ils cussegliers guvernativs Claudio Lardi e Stefan Engler ch'occupeschan probablamain il presidi da la regenza grischuna ils onns 2002 resp. 2003. Er tar ils ulteriurs commembers da la cumissiun da coordinaziun n'han ins betg tratg en consideraziun dumondas da la schlattaina. La regenza è dentant pronta da cumplettar la cumissiun da direcziun cun dunnas.

3. La regenza vegn a s'engaschar tar la direcziun dal project ch'era dunnas vegnian integradas en la realisaziun dal project.

4. La responsabladad principala per l'organisaziun e la realisaziun da las festivitads da giubileum è tar la direcziun dal project. La regenza parta dentant dal fatg ch'i saja da collavurar cun tut las gruppaziuns relevantas en il chantun, uschia evidentamain er cun las organisaziun da dunnas. Ils emprims contacts tranter las organisaziuns da dunnas e la direcziun dal project en quest reguard han gia gì lieu