Navigation

Inhaltsbereich

Interpellaziun concernent las chasas da dimora per scolaras e scolars da la scola media a Cuira

Sessiun: 27.11.2001
La finamira da la fundaziun da Florentini èsi da manar e mantegnair ina chasa d'abitar (casa Florentini) per dunnas giuvnas ch'absolvan a Cuira ina scolaziun. Ella offerescha a partir da l'onn 1982 ina purschida confurm als basegns e d'auta qualitad a dunnas giuvnas tranter 15 e 22 onns.
Per emprendistas ch'emprendan ina professiun renconuschida dal UFIML survegn la casa subvenziuns sin fundament da la lescha federala davart la furmaziun professiunala. Per scolaras da scola media che survegnan albiert en la casa na paja il chan-tun naginas subvenziuns.
Sin fundament da la lescha davart las scolas medias revedida sustegna il chantun perencunter las duas chasas da dimora con-vict (be per umens giuvens) e Scalära (be per dunnas giuvnas) per scolaras e scolars da scola media. A chaschun da la refurma da la furmaziun (scola media e furmaziun dals magisters) è vegnida averta la chasa da dimora da la scola da dunnas dal Grischun (chasa da dimora Scalära) numnadamain er per las scolaras da la scola chantunala.

Per questas trais chasas da dimora exista pia ina pratica da subvenziun differenta.

L'occupaziun momentana da las trais chasas da dimora vesa ora sco suonda:

convict chasa da dimora Scalära casa Florentini
total letgs 100 74 128
occupaziun 73 42 83 (senza pendularias)

Las cifras d'occupaziun èn pia relativamain bassas e tendenzialmain regressivas.
Nus supplitgain la regenza da rispunder a las suandantas dumondas:
1. Vesa il chantun la necessitad da prender tschertas mesiras sin fundament da las cifras d'occupaziun regressivas?
2. Vul il chantun mantegnair las duas chasas da dimora convict e Scalära a moda separada da la schlattaina u vegn pon-derada en quest reguard ina maschaida?
3. Èsi da quintar cun midadas pertutgant las chasas da dimora en connex cun l'introducziun da la scol'auta professiunala da pedagogia?
4. Per tge raschuns existan per las trais chasas da dimora che dattan tuttas albiert a scolaras ed a scolars da scola media ina practica differenta da subvenziun?

Cuira, ils 27 da november 2001
Name: Meyer, Christoffel, Cavegn, Arquint, Brüesch, Bucher, Caviezel, Dalbert, Dermont, Frigg, Hardegger, Hess, Jäger, Keller, Kessler, Locher, Looser, Luzi, Luzio, Maissen, Noi, Pfenninger, Pfiffner, Righetti, Scharplatz, Schmutz, Schütz, Trepp, Wett-stein, Zindel

Session: 27.11.2001
Vorstoss: rg Interpellation

Resposta da la regenza

La lescha da las scolas medias cuntegneva gia avant la revisiun parziala dals 24 da settember 1998 en l'art. 11 la basa legala per manar il Convict, nua - uschia il text da la lescha - ch'ils scolars da la scola chantunala obtegnian en ina cuminanza famigli-ara e per pretschs commensurai dunsena ed albiert. En la sessiun da mars 1998 ha il cussegl grond en accordanza cun la missiva da la regenza (carnet nr. 9/1997-98, pagina 572) fixà la direcziun futura per ils convicts dal chantun. En il senn da l'egualitad da las schlattainas è vegnida averta la chasa da dimora da la scola da dunnas dal Grischun che porta oz il num chasa da dimora Scalära, per scolaras da la scola chantunala. Il medem mument è vegnì fixà l'auzament graduà dals pretschs da pensiun per las chasas da dimora Scalära e Convict a Cuira fin ch'ils custs da mana-schi èn curclads. Ins ha desistì sapientivamain da subvenziunar cun contribuziuns chantunalas il manaschi da chasas da dimora privatas (protocol dal cussegl grond dals 25 da mars 1998, pagina 689). Questa reglamentaziun che vala en il sectur da las scolas medias visavi las scolas medias privatas è lianta a Cuira er per las chasas da dimora che n'èn betg en possess dal chantun e che dattan albiert a scolaras ed a scolars da la scola media. A las singulas dumondas respunda la regenza suandan-tamain:

1. Tant il Convict a Cuira sco er la chasa da dimora Scalära porschan excellentas purschidas d'albiert per las scolaras e per ils scolars da la scola media. La pur-schida da la chasa da dimora Scalära per las scolaras da la scola media n'è anc betg uschè enconuschenta. Perquai han ins gia prendì a temp mesiras per infurmar ils geniturs da las scolaras e dals scolars che vegnan en dumonda per far diever da questas chasas da dimora. L'occupaziun da las chasas da dimora è suttamessa a tschertas variaziuns. Midadas en il sectur da furmaziun, uschia surtut la midada da la scolaziun al seminari da scolastas e da scolasts u la scursanida dal temp da scolaziun gimnasiala per in onn pon vegnir en dumonda per l'occupaziun momentana betg optimala da las chasas da dimora. Da l'autra vart po l'auzament dals pretschs avair per consequenza ch'i vegn fatg pli savens diever d'autras purschidas d'abitar e da mangiar. En quest connex èsi impurtant ch'il Convict da Cuira e la chasa da dimora Scalära possian far attent pli fetg che enfin uss sin las relaziuns fitg favoraivlas da pretsch e da prestaziun da lur purschidas.

2. + 3. La separaziun da las schlattainas en il sectur d'abitar è cundiziunada istoricamain e scrudass cun gronda probabilitad tar ina construcziun nova d'ina chasa da dimora. Cunquai che l'aboliziun posteriura da questa situaziun è colliada cun in considerabel engaschament supplementar finanzial ed organisatori stuessan ulteriurs meds vegnir mess a disposiziun quai che na lascha betg realisar cun las cundiziuns finanzialas ch'èn uss avant maun. L'influenza da la distanza pli lunga tar il campus da la scola chantunala sin l'occupaziun da la chasa da dimora Scalära n'è anc betg sclerida cunquai ch'ils lieus differents d'abitar da las chasas da dimora Convict e Scalära possedan mintgamai differents avantatgs e dischavantatgs. Cun l'introducziun da la scol'auta professiunala da pedagogia mida la scolaziun per las persunas d'instrucziun da la scola preliminara e da la scola primara dal stgalim secundar II sin il stgalim terziar per il qual è previsa nagina purschida d'alloschament dal chantun. L'avust 2001 ha la regenza fixà che las planisaziuns per il center da scolaziun futur per las professiuns da la sanadad publica e da las clamadas socialas han da referir sin l'areal Kantengut che cunfina cun la chasa da dimora Scalära. La realisaziun da quest center da scolaziun dal chantun pudess avair per consequenza che la dumonda per las purschidas d'alloschament en las chasas da dimora Scalära ed en il Convict vegnessan augmentadas.

4. Il tractament egual necessari da la Casa Florentini da pajar subsidis per las purschidas d'alloschament dals gimnasis privats vegn impedì a basa da la lescha da las scolas medias.