Navigation

Inhaltsbereich

Interpellaziun concernent la realisaziun dal concept da linguas sin il stgalim superiur da la scola publica

Sessiun: 27.11.2001
L'avust 2002 duai il nov concept da linguas vegnir realisà sin il stgalim superiur da la scola publica. Ils novs uraris èn vegnids relaschads da la regenza e surdads a las scolas da noss chantun per conuschientscha. Uschia duain ils uffants da scola da la 1. secundara/reala vegnir instruids a partir da l'atun proxim durant quatter lecziuns en anglais e durant trais lecziuns en talian.
En il fratemp è vegnida lantschada ina iniziativa d'in comité cun commembers da pliras partidas che pretenda insaquantas modificaziuns dal concept da linguas ch'è avant maun. Plinavant duai il pievel avair la pussaivladad da s'exprimer a chaschun d'ina votaziun davart las linguas estras che duaian vegnir instruidas sin il stgalim superiur.
L'iniziativa ha, tenor las pli novas infurmaziuns, gia cuntanschì il dumber necessari da suttascripziuns, gea ha schizunt surmuntà il dumber, quai ch'intimescha ils interpellants da tschentar las dumondas suandantas a la regenza:
1. Tge conclusiun tira la regenza ord il fatg che l'iniziativa è reussida uschè spert?
2. È la regenza pronta da realisar l'avust 2002 sulettamain las parts dal concept da linguas che na pregiuditgeschan betg las pretensiuns da l'iniziativa?
3. Èsi insumma pussaivel da realisar il concept da linguas l'avust 2002, uschia sco quai ch'el è previs, ed èn avant maun avunda persunas d'instrucziun che disponan da las qualificaziuns pretendidas per instruir l'englais ed il talian?
4. Po la regenza s'imaginar da conceder a las vischnancas diversas soluziuns transitorias fin ch'il pievel ha decidì definitivamain davart il concept da linguas?
5. Tge spazi da temp prevesa la regenza per suttametter l'iniziativa a la votaziun dal pievel grischun?

Cuira, ils 27 da november 2001
Name: Butzerin, Bucher, Dermont, Bachmann, Battaglia, Beck, Berther (Sedrun), Brüesch, Büsser, Campell, Caviezel, Christoffel, Claus, Conrad, Dalbert, Davaz, Feltscher, Giacometti, Gunzinger, Hardegger, Heinz, Hübscher, Jeker, Joos, Kehl, Lemm, Luzi, Parolini, Patt, Rizzi, Robustelli, Schmid (Sedrun), Stiffler, Suter, Trepp, Valsecchi, Vetsch, Zinsli

Session: 27.11.2001
Vorstoss: rg Interpellation

Resposta da la regenza

Sa basond sin la decisiun strategica dal cussegl grond da l'october 2000 revisiun parziala da l'ordinaziun executiva tar la lescha da scola concernent l'instrucziun da las linguas estras sin il stgalim superiur da la scola publica a partir da l'onn da scola 2002/03 ha la regenza prendì mesiras per realisar il concept da linguas sin il stgalim superiur da la scola publica. Uschia offerescha il chantun a persunas d'instrucziun dal stgalim superiur ina scolaziun supplementara che cuntanscha il nivel universitar; 43 persunas d'instrucziun han gia frequentà cun success questa scolaziun supplementara ed 85 persunas d'instrucziun fan quest mument part dals curs correspundents da scolaziun supplementara. La regenza ha revedì l'urari e mess en vigur quel cun il 1. d'avust 2002. Ella ha ultra da quai fixà quals meds d'instrucziun ch'èn d'applitgar sco meds d'instrucziun obligatoris per l'instrucziun da linguas estras sin il stgalim superiur da la scola publica.

"L'iniziativa per mantegnair l'egualitad da las schanzas per la giuventetgna grischuna", lantschada il matg 2001 ed inoltrada il december 2001, ha duas finamiras principalas: L'iniziativa dal pievel vul d'ina vart cuntanscher ina midada dal concept da linguas sin il stgalim superiur da la scola publica. Da l'autra vart duai la cumpetenza per fixar ils roms obligatoris, ils roms d'elecziun obligatoris en il champ da l'instrucziun da linguas sin il stgalim superiur da la scola publica, confidada al cussegl grond a basa da l'artitgel 20 da la lescha da scola dals 26 da november 2000, vegnir retratga al cussegl grond e vegnir surdada al pievel.

Quellas dumondas da l'interpellaziun, che sa refereschan sin "l'iniziativa per mantegnair l'egualitad da las schanzas per la giuventetgna grischuna", pon quest mument be vegnir respundidas en il rom d'ina emprima giudicaziun generala. Ina discussiun differenziada suenter che las examinaziuns necessarias èn fatgas po succeder a basa dal messadi da la regenza al cussegl grond. Las singulas dumondas respunda la regenza sco suonda:

1. L'iniziativa è vegnida inoltrada entaifer il termin da rimnada fixà da la lescha ed ils sutsegnads han fatg diever d'in dretg constituziunal. La regenza ha prendì conuschientscha da quest fatg senza trair conclusiuns ordlonder.

2. A la regenza cumpeta en quest cas l'execuziun d'in conclus legal dal cussegl grond. La regenza sto e vul ademplir l'incarica obtegnida. L'inoltraziun d'ina iniziativa dal pievel na chaschuna betg effects giuridics preleminars. Per quest motiv fiss be ina realisaziun parziala da l'incarica dal cussegl grond betg admissibla tenor lescha ed er betg pratitgabla.

3. Scolaras e scolars da las emprimas classas dal stgalim superiur disponan en l'onn da scola 2002/03, a basa da l'instrucziun absolvida a la scola primara en duas linguas, da las premissas per pudair suandar las cundiziuns dal concept da linguas. Essend che mo in terz dals scolars dal stgalim superiur èn pertutgads dals novs uraris en il proxim onn da scola, e che gia dus curs da scolaziun en englais ed en talian per las forzas d'instrucziun èn a fin, e ch'in terz curs cumenza la primavaira 2002 ed ils purtaders responsabels da las scolas han pudì far ad uras lur planisaziun dal basegn a vista da l'onn da scola 2002/03, pon ins partir da la situaziun che persunas d'instrucziun en diember suffizient stattan a disposiziun per l'instrucziun da linguas estras a partir da l'atun 2002.

4. La revisiun parziala da l'ordinaziun executiva concludida dal cussegl grond na prevesa betg "schliaziuns transitorias". Ina instrucziun coordinada da las linguas estras sin il stgalim superiur da la scola publica è en l'interess dals giuvenils che van a scola. I na fiss betg da responsar, sche giuvenils stuessan acceptar dischavantatgs pervi da schliaziuns transitorias tar la frequentaziun da scolaziuns cuntinuantas (emprendissadi u scola media).

5. La regenza vegn uschenavant che l'iniziativa è reussida ad observar ils termins fixads en l'artitgel 54 al. 1 da la lescha davart il diever dals dretgs politics, tenor ils quals iniziativa e messadi èn da suttameter al cussegl grond entaifer in onn dapi l'inoltraziun. Ina votaziun dal pievel è pussaivla suenter ch'il cussegl grond ha tractà la fatschenta.