Navigation

Inhaltsbereich

Postulat concernent garantir mesiras da prevenziun e reparaziun dals donns da guaud

Sessiun: 27.11.2001
Tar l'examinaziun dal preventiv 2002 constatescha l'emprim sutsignà ch'igl èn previsas tar l'uffizi forestal sulettamain contri-buziuns da 1'140'000 francs per la prevenziun e la reparaziun dals donns da guaud (conto 6400 362101). L'onn precedent èn stads necessaris perquai incl. in credit posteriur 2'100'000 francs ed en il sboz dal preventiv 2002 èn stads previs 1'800'000 francs. La reducziun da 1'800'000 francs sin 1'140'000 francs è stada necessaria sin fundament d'ina pretensiun da spargn en l'intern dal departament.
Da princi sa tracti tar l'uffizi forestal d'in servetsch da pilot da la Griforma cun in credit global correspundent. Igl è dentant cler ch'in servetsch ha da definir ils "products" ch'èn da prestar sin fundament dals credits globals.
Las mesiras per la prevenziun e reparaziun dal guaud èn da grond'impurtanza, cunzunt per ils guauds da protecziun da noss chantun. Ils davos onns èn cumprovadas, cunzunt durant far urden cun la lenna da stemprà suenter il stemprà "Vivian" e l'enviern da lavinas 1998/99, las mesiras prendidas dals servetschs forestals locals e chantunals. Las contribuziuns ch'èn vegnidas pajadas en quest connex da la confederaziun e dal chantun als proprietaris da guaud han manà tar ina cuvrida dals custs che ha distgargià decisivamain ils manaschis forestals ed uschia las vischnancas.
Las expensas necessarias per la prevenziun pertutgan tut las mesiras preventivas che vegnan prendidas avant che laschar resul-tar novs u ulteriurs donns da guaud. Ellas pon er servir a la surveglianza (monotoring). Sut la reparaziun dal guaud èn da chapir tut las mesiras cun las finamiras sequentas:
- evitar u limitar la derasaziun dals organissems nuschaivels, p. ex. baus-scorsa
- allontanar ils ristgs directs per ils umans e per valurs realas considerablas, p. ex. per lung da las vias chantunalas e dal traject da la VR
- allontanar ils ristgs indirects per ils umans, numnadamain impedir che l'aua dals uals vegnia retenida da lainoms e sbu-vaditschs
Ils sutsegnads dumondan la regenza d'examinar en quest connex, sche
- las mesiras da prevenziun e da reparaziun dals donns dal guaud pon er vegnir segiradas en il futur;
- las contribuziuns previsas en il preventiv 2002 tanschan;
- (evtl.) ina redistribuziun dals meds è necessaria en il rom da la budgetaziun globala en l'uffizi forestal.

Cuira, ils 27 da november 2001
Name: Patt, Butzerin, Luzi, Ambühl, Bachmann, Bär, Battaglia, Beck, Berther (Sedrun), Biancotti, Brüesch, Campell, Cathomas, Catrina, Christoffel, Conrad, Dalbert, Davaz, Donatsch, Fallet, Giovannini, Gunzinger, Gubelmann, Hanimann, Hardegger, Hübscher, Joos, Lemm, Parolini, Pitsch, Rizzi, Roffler, Sax, Schmid (Sedrun), Schmid (Val S. Pieder), Stiffler, Trachsel, Tuor (Mustér)

Session: 27.11.2001
Vorstoss: rg Postulat

Resposta da la regenza

1. Il chantun sustegna en collavuraziun cun la confederaziun mesiras per impedir e reparar donns dal guaud (LfoC art. 35). I sa furma donns dal guaud, sche plontas vegnan attatgadas da malsognas u d'insects (bausscorsa) u vegnan donnegiadas entras eveniments da la natira sco stemprads, lavinas, naiv, incendis da guauds e.u.v. L'allontanaziun da quests donns vegnan alura sustegnids, sch'i sorta da quels donns privels considerabels per ils umans u per grondas valurs realas entant che la funcziun da protecziun vegn p. ex. restrenschida. Perencunter na vegn betg subvenziunà il lavurar si las plantas derschidas e donnegiadas da las qualas resultan negins donns consecutivs, u l'allontanament preventiv da plontas saunas p. ex. per lung da meds da traffic uschenavant che quellas lavurs van sut il titel reparaziun da donns da guaud. Tenor questas directivas vul la regenza er segirar en l'avegnir las mesiras da prevenziun e da reparaziun dals donns da guaud e metter a disposiziun ils meds necessaris persuenter.

2. Las contribuziuns chantunalas previsas en il preventiv 2002 da 1'140'000 francs èn veramain calculadas vaira bassas, duessan dentant tanscher per in "onn normal". Sa mussan percunter eveniments da la natira extraordinaris che han per consequenza donns da guaud en pli grondas dimensiuns èn eventualmain ulteriuras contribuziuns necessarias. Sche las modalitads da pajament sa retardan, e stuessan lavurs ch'èn vegnidas exequidas l'onn 2001 vegnir finanziads cun credits budgetads l'onn 2002, sche stuessan quellas perditas vegnir cumpensadas cun transfers u cun credits posteriurs.

3. Ina repartiziun dal credit è malgrà la budgetaziun globala be pussaivla restrenschidamain, cunquai che la posiziun da contribuziun (pos. 3610 3650) è danov vegnida approvada dal cussegl grond separadamain da las ulteriuras posiziuns dal quint current. Con lunsch ed en tge dimensiun ch'ins po far diever d'in transfer dal credit sa mussa pir suenter ils pajaments da las mesiras 2001 e tenor il svilup da la situaziun dals donns dal guaud durant l'onn 2002. En il senn da las ponderaziuns è la regenza pronta da prender encunter il postulat.