Navigation

Inhaltsbereich

Postulat concernent la segirezza dal traffic ed il dumogn dal traffic al San Bernardin

Sessiun: 27.11.2001
Suenter l'accident tragic en il tunnel dal Gottard che ha consternà nus tuts vulain nus l'emprim exprimer nossa sincera condolientscha als survivents.
Suenter la serrada suandanta dal tunnel dal Gottard è vegnì svià la gronda part dal traffic sur la ruta dal San Bernardin. Nus essan ord solidaritad pronts da porscher maun per schliaziuns. Dentant n'è l'axa dal San Bernardin sco er il tunnel dal San Bernardin, avert en ils onns sessanta, betg concepids per il traffic da camiuns pesants.
La regenza grischuna ha gia exprimì avant onns sias resalvas pertutgant la segirezza dal traffic al San Bernardin. Ils privels tar ils camiuns flaivels en consequenza da la surstgaudada dal motor mainan ad ina pli gronda ristga d'incendi. La via taissa cun paucas pussaivladads da vargar, cun stortas stretgas e cun dus vials porta per tut ils utilisaders da la via ina ristga da segirezza enorma. In accident en il tunnel dal San Bernardin sumegliant a quel dal Gottard manass a consequenzas anc pli gravantas. Il tunnel na dispona betg da pussaivladads da fugia e da glischs d'urgenza. Ultra da quai na satisfa la ventilaziun betg als standards che vegnan pretendids ozendi. Plinavant n'è la situaziun tecnica da las punts e dals trajects da vias betg sanadas insumma betg adattada per questa intensitad dal traffic.
Per ils vitgs en directa vischinanza dal tunnel dal San Bernardin resultan sperditas economicas ch'ins na po oz anc betg giuditgar en lur consequenzas. Dal rest fan ils blers accidents da traffic donn a la reputaziun dal turissem d'enviern che cumenza bainprest. Nus pudain dentant constatar che la regenza, la polizia ed ils pumpiers han dumagnà bain lur pensums.
Ins na po betg responsar la situaziun odierna che pretenda mesiras effizientas e persistentas per ils participants al traffic e per ils vischins da la ruta.
Nus supplitgain la regenza d'elavurar ulteriuras schliaziuns ed ulteriurs scenaris ch'èn adattads per meglierar la situaziun dal traffic sin l'axa dal San Bernardin. Latiers èn d'examinar schliaziuns supportablas en vista als donns da l'economia publica per las vischnancas vischinas. Il San Bernardin è per ina gronda part dal Grischun in'avaina da vita impurtanta.
Las mesiras da fin uss da la regenza e da la polizia considerain nus per gistas.

Nus pretendain e sustegnain supplementarmain las suandantas mesiras:

1. A partir d'immediant negins camiuns da 40 t al San Bernardin.
2. Controllas rigurusas dals manischunzs e da la prontadad per il traffic dals camiuns entras la polizia, cunzunt pertutgant la fermezza minimala dals motors. Al cumenzament da l'enviern èn las pretensiuns pertutgant la capacitad d'enviern da controllar.
3. Durant il temp da la bloccada dal Gottahrd è da rinforzar la polizia da traffic cun contingents da polizia d'auters chantuns e la confederaziun ha da sa participar al surpli da custs.
4. Accelerar la sanaziun dal tunnel dal San Bernardin e bajegiar ina galaria da fugia, glischs d'urgenza ed ina ventilaziun che satisfa a las pretensius d'ozendi. Igl è d'intimar la confederaziun d'augmentar ils meds finanzials persuenter.
5. La confederaziun ha da metter spert a disposiziun ils meds finanzials per pudair exequir las lavurs da mantegniment retegnidas sco er per quellas ch'èn da spetgar vi da punts e vias sin l'axa dal San Bernardin.
6. Metter il tunnel dal Gottard il pli spert pussaivel en funcziun per il traffic da camiuns pesants. Nus refusain in'avertura dal tunnel be per il traffic da persunas.
7. Examinaziun dal traffic sin dus vials separads en il tunnel dal San Bernardin, p. ex. cun saivs da segirezza per uschia garantir meglier la segirezza en il futur.
Duessi sa mussar durant l'enviern che questas mesiras na mainan betg a la segirezza dal traffic sco er a las pretensiuns giustifitgadas dals vischins, èsi d'introducir ina contingentaziun dals camiuns da transit sin la ruta dal San Bernardin.

Cuira, ils 27 da november 2001
Name: Zinsli, Peretti, Schmid (Spleia), Ambühl, Bachmann, Barandun, Battaglia, Beck, Berther (Sedrun), Brüesch, Brunold, Büsser, Butzerin, Campell, Catrina, Cavegn, Caviezel, Christ, Christoffel, Conrad, Farrér, Feltscher, Geisseler, Giacometti, Giovannini, Giuliani, Göpfert, Hardegger, Hartmann, Heinz, Hess, Hübscher, Jeker, Joos, Juon, Keller, Kessler, Koch, Lardi, Lemm, Locher, Luzi, Maissen, Marti, Meyer, Möhr, Montalta, Nigg, Noi, Parolini, Parpan, Patt, Plozza, Quinter, Ratti, Righetti, Robustelli, Roffler, Sax, Scharplatz, Schmid (Sedrun), Schmid (Val S. Pieder), Stiffler, Suter, Telli, Thöny, Toschini, Trachsel, Tremp, Tscholl, Tuor (Mustér), Tuor (Trun), Valsecchi, Vetsch, Wettstein, Zanolari, Zegg

Session: 27.11.2001
Vorstoss: rg Postulat

Resposta da la regenza

Suenter l'incendi en il tunnel dal Gottard ed il traffic da sviada en quest connex èn succedids sin la ruta dal San Bernardin enconuschentamain plirs accidents da traffic. En consequenza da frains surstgaudads han camiuns cumenzà a brischar. Numerusas pannas han impedì ulteriuramain il moviment dal traffic.

Il chantun Grischun ha optimà cuntinuadamain las mesiras necessarias per augmentar la segirtad dal traffic e la protecziun da la populaziun. Las plazzas da construcziun ch'impedeschan il traffic èn vegnidas suspendidas, la surveglianza dal traffic entras la polizia è vegnida intensivada, igl è vegnì installà pussaivladads da parcar per ils camiuns e las forzas dals pumpiers e da la sanitad èn vegnidas augmentadas.

La regenza prenda suandontamain posiziun tar las dumondas:

1. Ils problems actuals sin la ruta dal San Bernardin èn ina consequenza dal dumber dals participants al traffic e betg da la paisa dals vehichels. Tut ils camiuns flaivels e cun frains insuffizients han consequenzas negativas sin la segirtad. In scumond per vehichels da 40 tonnas sin il San Bernardin na pudess il chantun betg cuntanscher ord motivs legals.

2. A chaschun da las controllas dal traffic da camiuns pesants coordinadas e concepziunalas vegnan prendidas en mira tenor pussaivladad tut las prescripziuns decisivas. Uschia vegnan ils manischunzs controllads areguard la permissiun dal vehichel ed areguard l'observaziun dal temp da guida, da paus sco er ils vehichels areguard la massa, la paisa, l'equipament e durant las relaziuns d'enviern vegnan er controllads ils pneus.

3. En consequenza da l'accident en il tunnel da via dal Gottard han ins relaschà al San Bernardin ulteriuras mesiras e restricziuns dal traffic. Per la realisaziun e surveglianza da questas mesiras è vegnida rinforzada la polizia da traffic en in'emprima fasa entras collavuraturs interns sco er entras la Securitas. Dapi ils 3 da december vegn la polizia da traffic dal Grischun sustegnida da funcziunaris d'auters chantuns. Il chantun spetga che la confederaziun sa participeschia al surpli da custs.

4. Per las lavurs actualas da reparatura vala in program da construcziun optimà che resguarda tut las cundiziuns da basa, l'andament e las dependenzas. La sanaziun vegn reglada en in temp uschè curt sco pussaivel. In'acceleraziun da la sanaziun n'è betg pussaivla senza mesiras rigurusas en connex cun l'avertura dal tunnel durant las lavurs da construcziun. La finanziaziun da las lavurs previsas è garantida da la confederaziun.

5. L'uffizi da construcziun bassa dal Grischun ha elavurà l'ultim onn in program da mantegniment per ils proxims 10 onns per il toc via da Tusaun fin Mesocco da la A13. Quel resguarda la situaziun odierna dal trassé. En pli vegnan ils impediments da traffic che resultant durant las lavurs da construcziun reducids sin in minimum giustifitgabel.

6. La regenza grischuna na po betg influenzar directamain las lavurs da sanaziun vi dal tunnel dal Gottard. Cun la decisiun dal schef dal DATEC dals 10 da december 2001 d'avrir il tunnel dal Gottard il medem mument è vegnida ademplida la pretensiun dumandada da la regenza.

7. La construcziun d'ina separaziun da la direcziun dals vials n'è ord divers motivs betg pussaivla en il tunnel dal San Bernardin. Uschia na tanscha la ladezza disponibla betg persuenter; ils vehichels da la sanitad e dals pumpiers na pudessan betg avanzar al lieu da l'eveniment, i na fiss generalmain betg pussaivel da sa volver cun ils vehichels en cas d'urgenza en il tunnel e per mintga lavur da mantegniment anc uschè pitschna stuess vegnir serrà l'entir tunnel.

La regenza tschertga e realisescha ensemen cun la confederaziun ed ils ulteriurs chantuns da transit schliaziuns per la reducziun dals viadis dals camiuns. Ultra da quai vegnan realisadas en il decurs da la sanaziun dal tunnel dal San Bernardin e dals tschancuns da rampa anc ulteriuras mesiras per pudair augmentar la segirtad.

En il senn da questas ponderaziuns ed uschè lunsch ch'i n'è betg gia realisà è la regenza pronta da prender encunter quest postulat.