Navigation

Inhaltsbereich

Sessiun: 28.11.2001
L'onn 1996 è vegnida fundada l'Università della Svizzera Italiana en il Tessin. Questa universitad, in term impurtant en la istorgia da la Svizra taliana, vegn er frequentada da la populaziun dal chantun Grischun.
Resguardond la vischinanza geografica ed il fatg che noss chantun posseda quatter valladas talianas sa tschenta per nus la dumonda davart ina collavuraziun cun l'Università della Svizzera Italiana francada entras il chantun.
Nossas dumondas sa cloman en quest connex sco suonda:
1. Exista oz ina collavuraziun tranter il chantun Grischun e l'Università della Svizzera Italiana? Sche gea, co vesa quella ora concretamain?
2. È gia vegnida fatga ina retschertga davart la necessitad d'ina collavuraziun e co quella pudess vegnir schlargiada?
3. Prevesa la regenza mesiras per motivar studentas e students dal chantun Grischun da studegiar a l'Università della Sviz-zera Italiana? Quai betg il davos per intensivar las relaziuns tranter quels dus chantuns.
4. È la regenza er da l'avis che la diversitad linguistica en noss chantun sco er ils contacts cun il spazi cultural talian sur-vegnissan in augment da valur entras ina permissiun d'access per nossas studentas e noss students a l'Università della Svizzera Italiana?
5. Èn gia vegnids elavurads scleriments dal basegn da vart da noss chantun en reguard als interess giavischaivels a scienza e perscrutaziun a l'Università della Svizzera Italiana?
6. Parta la regenza l'opiniun ch'i fiss cunvegnent da tschertgar ina colliaziun instituziunala da noss chantun cun l'Università della Svizzera Italiana? Collià cun quai fiss ina pussaivladad da cogestiun dal Grischun en dumondas da structuras sco er en il rom da la scienza e da la perscrutaziun.

Cuira, ils 28 da november 2001
Name: Noi, Arquint, Claus, Davaz, Frigg, Giuliani, Jäger, Joos, Lardi, Locher, Looser, Peretti, Pfenninger, Pfiffner, Plozza, Righetti, Schmutz, Schütz, Toschini, Trepp, Zanolari, Zinsli

Session: 28.11.2001
Vorstoss: rg Interpellation

Resposta da la regenza

Las universitads na s'orienteschan betg tar la determinaziun dal territori, nua ch'ina gronda part da lur activitads han lieu, tenor ils cunfins da chantuns. Quai che pertutga l'Università della Svizzera Italiana USI, uschia inditgescha gia il num, ch'i sa tracta d'ina universitad d'ina regiun linguistica e betg d'in singul chantun. Cunquai ch'il mandat da prestaziun universitar pretenda ina collavuraziun ed activitads sur ils cunfins chantunals, statals e linguistics, appartegnan tant las valladas talianas dal Grischun sco er l'Italia dal nord tar il territori cumpiglià da la USI. Aifer la Svizra ed il Principadi da Liechtenstein sa manifestescha quest element sur ils cunfins er en la libra circulaziun da las studentas e dals students ch'è usitada en il sectur da las scolas autas, sco er en la participaziun als custs dals chantuns en il rom da la gulivaziun da la grevezza interchantunala sin la basa da la cunvegna da las universitads. La regenza respunda las singulas dumondas sco suonda:

1. + 2. + 5. Ils 4 da fanadur 2001 ha gì lieu a Grono en preschientscha dals cussegliers guvernativs Gabriele Gendotti e Claudio Lardi sco er da diversas autras persunas ord las spartas da l'administraziun pertutgadas da domadus chantuns, da las scolas autas sco er da las organisaziuns linguisticas e culturalas ina discussiun davart il tema "Collaborazione Ticino Grigioni, scambe di carattere culturale e scolastico". Là èn vegnidas discutadas tranter auter er furmas pussaivlas da collavuraziun tranter ils chantuns Tessin e Grischun en il sectur d'infurmaziun e da documentaziun. Per elavurar quest project è vegnì concludì d'incaricar ina gruppa da lavur. L'incumbensa da questa gruppa da lavur è d'elavurar in'analisa da la necessitad, models e pussaivladads da cooperaziun sco er d'elavurar recumandaziuns communablas per mauns dals cussegliers guvernativs Gendotti e Lardi.

3. + 4. La maxima da la libra circulaziun da las studentas e dals students cumpiglia la libra elecziun da l'universitad e na furma per regla betg in tema d'intervenziuns statalas. La legitimaziun d'access ad ina universitad sa drizza tenor las qualificaziuns e betg tenor la derivanza geografica da las interessentas e dals interessents per in studi. Il departament d'educaziun dal Grischun ha ademplì sia incarica d'infurmaziun, per exempel ils 21 da favrer 2001 cun infurmar, en preschientscha da signur prof. Baggiolini e dal schef dal departament, a la scola chantunala a Cuira ed al Lyceum Alpin a Zuoz davart la purschida da studis a la USI. Ils ulteriurs gimnasis da l'Engiadina èn vegnids rendids attents a quest'occurrenza.

6. Ina colliaziun instituziunala dal Grischun a la USI n'è betg intenziunada. En quest connex è da menziunar che la concepziun dal sectur da la scienza e da la perscrutaziun appartegna a l'autonomia da l'universitad en il rom das meds che stattan a disposiziun. Quest'autonomia è cuntegnida explicitamain en l'art. 2 da la lescha davart la USI.