Navigation

Inhaltsbereich

Interpellaziun concernent intervenziuns da construcziuns illegalas en ils territoris da skis dal Grischun

Sessiun: 28.11.2001
Entaifer paucs onns è enconuschent uss, suenter il San Bernardin, las Sportbahnen Danis SA e las novas intervenziuns da construcziun en la Arena Alva a Laax, gia il terz cas da planaziuns da pistas da skis resp. d'intervenziuns da construcziuns illegalas en in territori da skis. Las intervenziuns èn puspé succedidas senza ina permissiun correspundenta resp. en violaziun da las permissiuns ch'eran avant maun. Tals schabetgs portan cun sai dasper ils donns ecologics e l'inobservanza da las pre-missas legalas èr in donn da reputaziun per noss chantun da turissem. Ina reputaziun che viva essenzialmain er da la natira e d'ina cuntrada intacta.

Nus supplitgain la regenza da respunder las sequentas dumondas:
1. Co giuditgescha la regenza ils svilups da las midadas illegalas da terren en ils territoris da skis dal Grischun?
2. Co giuditgescha la regenza la creaziun d'ina instanza da controlla correspundenta tar il chantun ch'è responsabla per las intervenziuns da construcziun en ils territoris da skis per uschia distgargiar las vischnancas ch'èn evidentamain surdu-mandadas ord vista dal persunal e professiunalmain e ch'èn ultra da quai savens er en conflicts d'interess?
3. Co vul la regenza grischuna evitar en il futur talas intervenziuns da construcziun illegalas en ils territoris da skis? Tge mesiras da sancziun prevesa ella, per che las permissiuns da construcziun vegnian observadas?
4. Co giuditgescha la regenza l'introducziun d'in inventari da las midadas da terren permessas e da las nunpermessas en ils territoris da skis dal Grischun, p.ex. a partir da l'onn 1980, cun il qual i pudess resultar ina tscherta segirtad giuridica e transparenza en la pratica?
5. Considerass la regenza l'introducziun d'ina statistica chantunala annuala per las midadas dal terren permessas en ils territoris da skis dal Grischun analogamain a la statistica per "la surfatscha ennavada permessa en il Grischun" per ra-schunaivla?

Cuira, ils 28 da november 2001
Name: Pfenninger, Trepp, Frigg, Bucher, Jäger, Locher, Looser, Pfiffner, Schmutz, Schütz, Zindel

Session: 28.11.2001
Vorstoss: rg Interpellation

Resposta da la regenza

Tar dumonda 1
Ils cas scuverts il davos temp concernent correcturas da pistas da skis na permessas vegnan sentenziads cleramain da la regenza. Tals cas n'èn betg be adattads da pe-riclitar ils princips da la legalitad e da l'egualitad giuridica, mabain els chaschunan sut cicumstanzas er ina destrucziun materiala illegala da valurs da la natira e da la cun-trada che furman da lur vart potenzials per ina ferma economia turistica.

Tuttina na dastga'ins betg survesair ch'i sa tracta tar ils cas scuverts en relaziun da la summa da tuttas intervenziuns permessas da cas singuls. Generalmain observan las interpresas da pendicularas e viafiers da muntogna l'obligaziun da dumandar la per-missiun da construcziun. Malgrà l'indignaziun giustifitgada pervi da las activitads da construcziuns illegalas en general ed en spezial en territoris da skis, giuditgescha la regenza per deplazzà da disfamar publicamain tuttas interpresas da pendicularas e viafiers da muntogna pervi dals cas discuverts a moda generala e pauschala sco de-linquentas e destruidras da l'ambient sistematicas, cun nauschas intenziuns ed inter-essadas be al profit. Tar la preschentaziun dals schabetgs èsi plitost da mantegnair la dretga mesira tranter bagatellisar ed exagerar. Quai vala particularmain là nua che las inquisiziuns, sco en ils cas dals territoris da skis Planeiras/Danis e Flem/Laax/ Falera, n'én anc betg concludidas.

Tar dumonda 2
Tenor il dretg vertent da planisaziun dal territori dal chantun cumpeta la controlla, sch'insatgi exequescha insanua lavurs da construcziun senza ina permissiun da
construcziun u en divergenza d'ina tala, exclusivamain a las singulas instanzas da construcziun da las vischnancas (art. 57 al. 2 LPTC). Quest'ordinaziun decentrala da las cumpetenzas sin il sectur da las activitads da controlla è segiramain pli cunveg-nenta a vista dal grond spazi dal chantun ed a vista organisatoria, che da crear in'e-quipa da controlla chantunala. Ina tala stuess bain esser dottada cun tozzels da glieud per pudair exequir ina controlla sur l'entir territori en in ritmus necessari. Igl è pussaivel da pretender da las vischnancas en cas da construcziuns ed installaziuns permessas ordaifer las zonas da construcziun mintgamai ina copia dal protocol da collaudaziun.

Tar dumonda 3
Sco sancziun en cas d'activitads da construcziuns illegalas prevesa il dretg vertent d'ina vart ina multa da la polizia da construcziun fin a 30'000 francs; en cas da regl da gudogn po quest limit vegnir surpassà. Da l'autra vart exista là, nua che l'activitad da construcziun na po betg vegnir permessa posteriurmain, l'obligaziun da restabilir il stadi original resp. il stadi legal sco er, sche quai n'è betg (pli) pussaivel, l'obligaziun da prestar ina mesira substitutiva. Cumpetentas per tut questas mesiras da sancziun èn las vischnancas. Sche quellas exequeschan consequentamain lur cumpetenza, exista da princip ina garanzia suffizienta per ina sancziun ed ina prevenziun com-mensurada. Problems naschan be là, nua che las vischnancas - per tge motivs ch'i saja - n'adempleschan betg lur obligaziuns. En il rom da la revisiun currenta da la LPTC vegn ins a stuair s'occupar pli detagliadamain da quest problem.

Tar las dumondas 4 e 5
Ina inventarisaziun davart correcturas da pistas permessas e na permessas po esser cunvegnent nua che quai è necessari punctualmain per motivs legals, q.v.d. per sin-guls territoris da skis, p. ex. en connex cun ina examinaziun ecologica. Ina inventari-saziun per l'entira surfatscha en tuts territoris da skis considerescha la regenza per-cunter per exagerà. Imaginabel èsi da manar ina statistica speziala concernent las correcturas permessas da pistas da skis, uschenavant che quai n'è betg collià cun lavur supplementara sproporziunada; quai fiss dentant anc da sclerir.